Autalavou
Faamolemole, Faamalolo Lo’u Fatu
O Kelsey LeDoux e nofo i Minnesota, ISA.
I le faamanatuina o le tausaga talu le maliu o lo’u uso, na ou toe tomanatu ai i lo’u olaga talu ona maliu o ia. Na le gata ina ou manatuaina le ogaoga o le tiga na ou lagonaina, ae o faamanuiaga na tuuina mai e le Atua ia te a’u.
Sa le’i mafai ona ou malamalama i le mafai ona faapea mai o tagata, o le oti o sē e pele, e mafai ona aumai ai faamanuiaga. Sa faigata ona ou malamalama i le auala e mafai ai ona ou maua le olioli ma le agaga faafetai, mo se mea e sili ona tuia ai a’u. Peitai ane, sa i ai se tasi o po, na suia ai atoatoa la’u vaaiga faalemafaufau o mea.
Na ou ala a’e i luga i le vaeluaga o le po, ma se lagona sili ona mamafa i lo’u fatu ou te le’i o’o i ai muamua. O le tiga na tau uma ai la’u manava. Na ou tootuli ifo i o’u tulivae ma augani atu i se tatalo i lo’u Tama Faalelagi. I lo’u olaga atoa, na aoaoina a’u e uiga i le Togiola ma le mana faamalolo a Iesu Keriso. O lenei la, ua tofotofoina lo’u faatuatua. Pe sa ou talitonu moni ea? Na ou talosaga atu i lo’u Tama i le Lagi, faamolemole faamalolo lo’u fatu. O le tiga, sa matuā tele naua e le mafai ona ou tatalia na o au.
Ona oo mai lea o se lagona o le filemu, mafanafana, ma le alofa, i lo’u tino atoa. Na ou lagonaina ua pei ua opoopoina e le Atua a’u i Ona aao, ma ua Ia puipuia a’u mai le tiga matautia na ou lagonaina. O loo ou misia pea lava lo’u uso, ae na mafai ona ou vaai atu i ni mata ua ese. Na matua tele naua mea ou te aoaoina mai lenei aafiaga.
Ou te iloa, o loo i ai le alofa ma le filemu o le Alii mo i tatou. Na pau le mea tatou te manaomia, o le faaaogaina.