E Aumaia e le Sefuluai le Liuaina

Oleka Nikolaina Kiripo, Iukureine

O le mataupu o le totogiina o le sefuluai na tupu a’e i lo matou aiga, ina ua auai lo ma afafine i le Ekalesia. I lena taimi, sa leai se tasi o i maua ma lo’u toalua na auai i le Ekalesia. Sa mauaina ana lava tupe, ae talu ai sa matou nonofo faatasi ma lo’u toalua, na matou fefaasoaa’i ai a matou tupe maua. Na faigata ia te a’u ona malamalama pe faapefea ona matou ola e aunoa ma le 10 pasene o lona totogi, lea na tonu ia te ia e totogi ai lana sefuluai, ae na amata lava ona ou masani i le faaiuga a la’u tama teine. O le taimi lava e sau ai ma lana siaki, o la’u fesili muamua lava o le, “Ua tuuese lau sefuluai?”

Sa o’o lava ina amata ona ou fiafia i le aoaoina e uiga i le talalelei, ae sa ou filifili ou te le auai i le Ekalesia, aua o lona uiga o le a ou totogiina ai le sefuluai. O le lua o sefuluai e totogi mai le paketi e tasi a le aiga, o se mea ua telē tele!

I le mavae ai o le auai i le Ekalesia mo le silia i le tausaga, na amata ona ou lagonaina le lē faamalieina ma le lē fiafia. A o o’u mafaufau loloto ma tatalo, na ou iloa ai sa ou manao e totogi le sefuluai. Sa faateia a’u i lenei manao, a o lea sa ou tetee i ai muamua.

O le Aso Sa na sosoo ai, na ou fesili ai i le peresitene o le paranesi mo se lisiti o le sefuluai. Na ou le fiafia i le faalogo atu faapea se’i vagana ua avea a’u ma se tagata auai o le Ekalesia, e lē mafai ona totogia sa’u sefuluai. Peitai ane, e mafai ona ou tuuina atu se foai. Ma o le mea lea, na ou foaiina ai le 10 pasene o lo’u totogi i le Ekalesia a le Alii. Na vave ona ou lagonaina le mafanafana, olioli, ma le faamalieina. Na faigata ona ou faatali mo le aso o lo’u papatisoga, ina ia mafai ai ona ou totogia se sefuluai moni.

Ou te iloa o faamanuiaga faaletino tatou te fiafia ai i o tatou aiga, e o’o mai e ala i le totogiina o le sefuluai. Ae, o faamanuiaga silisili lava, o lagona lē mafaatusalia tatou te mauaina, pe a tatou usiusitai i lo tatou Tama Faalelagi: lotomalie ona o le usiusitai, mautinoa o le a le tuulafoaiina i tatou e lo tatou Tama Faalelagi, ma lagona o le filemu ma le fiafia.