O Mea Matautia ua Natia
Ina ia aloese mai le pauu atu i lua natia, tutu i luga o le ala!
E latalata i le tumutumu o Sana Cruz, o se motu i le atu Kalapago, e taoto ai Los Gemelos, “le Piilua.” O nei lua magotogoto tetele e lua e mafai ona ofi ai ni malae lakapi se tele. Mai augutu, e foliga mai e pei o lua na eli ai maa e tagata e la’u mai ai le maa mo malumalu ua mavae.
E ui i le matagofie faanatura o le eria, e le matagofie uma e pei ona foliga mai ai. E ufitia e le vao mafiafia le laufanua teropika vagana ai le mea o loo ui atu ai le auala. Na filifilia lelei le auala ia mausali lelei e savavali ai. O le eleele i itu e lua o le ala, e ui o loo ufitia i pupulaau, laau toto, ma laau tetele, e ono lē mausali tele.
Afai e te fia tuua le auala o loo faataaliolio ai Los Gemelos e vaili ai le vaomatua, i soo se minute lava e te ono laa ai i se vaega manunu e le lava le malosi e tatalia ai lou mamafa. O le a le mamao o le a e pau i ai? E te le iloa sei vagana ua e patatu i le ta’ele. O nisi o lua magotogoto i Sana Cruz, e silia ma le 100 futu (30 m) le loloto. E tusa ai ma tala o le vaifanua, o se tasi o lua e matua loloto lava ma e lei maua lava le ta’ele.
O le auala e mulimuli i se ala patino—o se ala atonu e te le fia manao e mulimuli ai. Peitai, o loo i ai le saogalemu i le auala ma se faamautinoaga i le mea e tau i ai.
Faaeteete i le Vaega Manifinifi
I se tulaga faaletalalelei, o na auala taamilo i Los Gemelos e ono avea o ni faatusa o le tele o mea, e pei o poloaiga, o aoaoga a perofeta, fautuaga i le Tiute i le Atua ma le Alualu i Luma o le Tagata Lava Ia, o tulaga faatonuina i le Mo Le Malosi o le Autalavou, ma le talalelei lava ia. A tatou faatinoina le talalelei, a tatou mulimuli i aoaoga a perofeta, a tatou ola e tusa ai ma taitaiga a poloaiga, tatou te maua le saogalemu ma le filemu. A tatou le faia … ia, e ono mafai ona fai si tulaga matautia o mea.
E i ai taimi e ono tofotofoina ai i tatou e tuu le mulimuli i poloaiga pe le amanaia aoaoga a le Ekalesia aua ua tatou lagonaina ua faasasa. Tatou te mananao e filifili lava tatou i le ala e ola ai.
Peitai, e pei lava ona fesoasoani auala taamilo i Los Gemelos i tagata ia aua nei pauu i vaega manifinifi, e le o faasaina foi e poloaiga lo tatou faitalia—ae, latou te saunia le avanoa sili mo le fiafia ma le manuia. E mafai ona tatou filifilia e le aunoa mea tatou te mananao e fai. E mafai ona tatou filifilia lo tatou lava ala e o ai, nai lo le mulimuli i le ala ua faataatia mai e lo tatou Tama Faalelagi mo i tatou. O le a tatou le taunuu vave lava i lo tatou taunuuga nai lo le mulimuli i le auala ua uma ona faamaonia, ma o le sailia o lo tatou lava ala e ono tiga ma faigata.
O le mea lava lea e tasi e faatatau i poloaiga, e pei o le Upu o le Poto. E le aveesea e le Tama Faalelagi ma Lana Ekalesia lo tatou faitalia i le fai faamalosi mai faapea ia tuu lo tatou inu ava malosi. E mafai ona tatou filifili pe tausi le poloaiga pe leai. Ae a tatou faia lena filifiliga, ua tatou filifilia foi ma taunuuga e o faatasi ai.
Afai tatou te filifili e soli na poloaiga, ona tatou lafoai lea o na faamanuiaga uma. O le filifiliga e le pe faataga ea ona tatou inu ava malosi pe fai le mea nei po o le la. O le, pe tatou te mananao i faamanuiaga pe leai o le malo o le lagi, ma le faia o le mea e poloai mai ai le Alii ona tatou te alolofa ia te Ia ma ua liua ia te Ia.
Saogalemu i luga o le Ala
O Jessica P. ma Nory A., o ni tamaitai talavou se toalua e nonofo i Sana Cruz, ua la iloaina lelei lenei mea. O i la’ua oni tagata liliu mai, ua vaai i le eseesega o le tausia o poloaiga. E le toatele ni tagata o le au paia i Atumotu o Kalapago (e na o le 125 tagata o le au paia i la latou paranesi mai le tusa ma le 25,000 tagata o le motu). E mafai ona faigata ona tumau ai i le ala sa’o ma le vaapiapi (tagai 1 Nifae 8:20; 2 Nifae 4:33; 31:17–19; Alema 7:19) i faaosoosoga e pei o ava oona ma fualaau faasaina.
Na vaai Nory i luitau i lona lava aiga. Ina ua mavae se tausaga talu ona papatiso lona aiga, sa faamauina i latou i le Malumalu o Guayaquil Ecuador. Peitai, e lei umi, ae pauu ese nisi o lona aiga. Na umi se taimi ua na o ia ma lona tina sa auai i le lotu. Na faapefea ona tumau lo la malolosi?
“O afiafi faaleaiga,” o lana tala lea. “Mo sina taimi, sa na o lo’u tina lava ma a’u e faia. Mulimuli ane, sa amata ona o mai lo’u tuagane matua ma lo’u tama. Ma o taimi uma lava matou te suesue ai le talalelei, e fai mai ai lo’u tama, ‘O au lea e faatatau i ai le mea lea.’ O lea la ua amata ona malosi mai faapea foi lo’u tuagane.”
Na feagai Jessica ma se tauiviga e ese ai. “Ona e na o au o lo matou aiga e i ai i le Ekalesia, e faigata,” na ia faamatala mai ai. E le fiafia nisi o lona aiga ona e alu i le lotu. O le mea moni, e mafai ona oo ai ina tauaimisa.
“O nisi taimi e te moomoo ai maimau pe ana o ni tagata o le Ekalesia ou matua, ma lou aiga,” o lana tala lea, “ina ia mafai ai ona e faasoa atu i ai. Ese le faigata.
“A i ai ou faafitauli, e le mafai ona e alu e sue i le aualatele pe sue i le ava malosi, aua e le maua ai se fesoasoani. Ae ou te sau i le lotu, lea e i ai au uo lelei.
“Latou te fesoasoani tele ia te au. A ou le fiafia, a o la lava e i ai Nory po o isi tamaitai talavou. A ou sau i le lotu, ou te lagona le ola. Ou te lagonaina se toomaga mai faafitauli uma o lo’u olaga.”
Filifilia o le Ala Sa’o
Ua maua e Jessica ma Nory le olioli i le ola ai i le talalelei. A le o lena, ua la maua le olioli aua ua la ola i le talalelei.
O poloaiga, e pei o auala taamilo i Los Gemelos, e le faasaina ai i tatou. Ua tuuina mai ai le taitaiga e tatau ai ina ia tatou atoatoa ai e ala i le Togiola a le Faaola (tagai MF&F 82:8–9). A tatou filifili e tausi ia poloaiga, ua tatou filifili e faaali atu le alofa ma le tuuto i le Atua. Ua tatou filifili ia agavaa mo le mafutaga a le Agaga Paia. Ua tatou filifili ia agavaa mo le mauaina o musumusuga, ia mafai ona auauna atu, ia mafai ona ulu atu i le malumalu, ma faamamaluina le perisitua.
O le mea e aupito sili ona taua, ua tatou filifili e galulue agai atu i le ola e faavavau i le malo selesitila o lo tatou Tama i le Lagi. O le auala lena i le filemu ma le fiafia.
Ata pue o tamaitai talavou ma ata i tua atu na saunia e Joshua J. Perkey