Seia Tatou Toe Feiloai
O Le Laveai i Lua Maina
O Russell Westergard e nofo i Virginia, ISA.
Sa le mafai ona matou o e aumai le fitafita sa punitia, ae sa mafai ona matou faamalosiauina o ia, patipatia ana taumafaiga ma olioli i lona manumalo.
I le taimi o le Taua i le Vaifagaloa, sa ou taitaia se au a fitafita i Kueiti. O le taimi lava na tatala ai le puipuiga, sa matou sailia tulaga tau o le fili ia mautinoa o le a matou saogalemu ma vaavaai mo soo se mea taua e maua ai ni faamatalaga e uiga i le fili.
Faatoa ou tuvae lava i se tulaga e fai ai faatonuga ae ou faalogoina loa se satini Peretania o fono avaavau mai, “Taofi! Aua nei e toe laa!” Na falo atu lo’u ulu mai lo’u lafitaga, ma ou iloa ai se tasi o a’u fitafita ua i ai i se malaia. Ua savali atu i se vaega taalaelae e piki se pepa o faamatalaga a o lea ua tu nei i le ogatotonu o se luamaina tele. Ina ua ia faalogoina le faataio atu a le satini, sa tu o ia ma iloa ai ua lamatia o ia.
Ao faapotopoto ai i le siui o le lua maina, sa mafai ona vaaia e le matou au le matua popole o le fitafita talavou ma ua gatete lona tino. Sa tatau ona vavave a matou gaoioiga ae e le mafai foi ona auina atu ni fitafita e aumai o ia e aunoa ma le lamatia ai o o latou ola faapea ma ia. E aunoa ma se talanoaga po o se faatuatuai, sa amata ona matou talanoa atu i le fitafita, ma tauvalaau atu upu faamafanafana, faamalosiauga, ma faatonuga. Sa mafai ona matou vaaia le tafe ifo o loimata i ona alafau ma lagonaina le fefe i ana tali mai, ae sa amata ona faatoafimalieina o ia i la matou faamalosiauga.
Ina ua mavae sina taimi sa lava lona lototele e toe tilotilo ai i tua i le ala sa sau ai, ma sa ia fai mai na mafai ona ia vaai atu i ona tulagavae tau le iloa i le oneone. Faatasi ai ma la matou faamalosiauga, sa amata ona ia toe solisoli malie lona ala. O le tuu lemu ifo o ona vae i ona tulagavae taitasi na sau ai, sa ia savali ese mai le lua maina, ma faapalasi mai i o matou lima sa faatalitali atu a o faia lana laa mulimuli. Sa feei atu le anoano o fitafita sa i autafa ma le olioli a o matou toe faafeiloaia o ia. Sa suia loimata o le fefe i ataata ma opo.
E feoloolo lava i tatou na tutu i siui o se lua maina moni. Ae o le toatele o i tatou o e ua tuua le eleele saogalemu faaleagaga ina ia punitia ai i lua maina o le olaga. E pei o lena fitafita talavou, atonu e lagona foi e i latou le tuulafoaiina, fefefe, ma le le mautonu. Ae o lena fitafita e lei tuulafoaiina lava o ia. Sa i ai sana ‘au i autafa e patipatia ma faamalosiau atu ia te ia, o uo na manaomia lona toe foi mai ma e lei fiu lava. Sa i ai ia te ia ni taitai sa ofoina atu se taitaiga ma le faamalosiauga. O ia le tagata na tatau ona savali ese mai le lua maina, ae sa matou tutu faatasi e fesoasoani ia te ia ia maua le malosiaga e faia ai. O le faaiuga, sa matou patipatia lona laveai i le alofa moni ma le olioli.
E mafai foi ona maoae ia laveai faaleagaga. Pe tatou te aapa atu o se aiga, o ni uo, po o se uarota po o se paranesi, e mafai lava e a tatou taumafaiga ona faia se eseesega. O upu faamalosiau i le taimi e tatau ai ma le taitaiga sa faasaoina ai le ola o le fitafita. E faapena foi, e mafai ona tatou fesoasoani e laveai isi mai mala o le pogisa faaleagaga e ala i le ofoina atu i ai o le faamalosiauga ma le taitaiga e toe faafoi mai ai i latou. A tatou faia lena mea, o le a tele lo tatou olioli —e le gata mo se taimi i lenei olaga ae faapea foi i le faavavau (tagai MF&F 18:15).
Ata na tusia e Craig Dimond