Aua Le Faia ni Ufimata
Mai se faigalotu a le Ofisa o Aoga a le Ekalesia mo autalavou matutu na faia i le aso 4 Mati, 2012, i le Iunivesite a Polika Iaga–Idaho.
O se tasi o ou puipuiga aupito sili e faasaga i le faia o filifiliga le lelei, o le lē faia lea o soo se ufimata o le lē faailoaina o le igoa.
A o ou tomanatu i le tulaga po o ai oe, na oo mai ai le lagona ia te au faapea, atonu e te le o faafetaia atoatoa le taua o lou augatupulaga. Ou te talitonu ua ia te outou le iloa ma le faavae ia avea ma augatupulaga aupito sili ona lelei ua i ai, aemaise lava i le faaalualuina i luma o le fuafuaga a lo tatou Tama Faalelagi.
I le vaai atu i le gafatia tele mo le lelei ua outou mauaina, o a o’u atugaluga mo lo outou lumanai? O le a se fautuaga e mafai ona ou tuuina atu ia te outou? O le a i ai le uunaiga malosi sili i o outou luga taitoatasi, ina ia faia mea e tusa ma o outou uiga—e oo lava i le faia o se ufimata—ma avea ai ma se tasi, o le a lē tomanatu moni po o ai outou, pe o le a le ituaiga tagata e te manao e avea ai.
O se faataitaiga mai le Talafaasolopito o le I.S.
I le 2011, na matou fono ai ma Elder L. Tom Perry ma Abraham Foxman, le faatonusili o le Faalapotopotoga Faasaga-I le-Taufaaleaga. O lona faamoemoega o le taofia lea o le faaleagaina o tagata Iutaia.
I la matou fonotaga ma le Susuga a Foxman, na ou fesili atu ai ia te ia po o le a se fautuaga e manao e tuuina mai mo i tatou i le fesootai ai ma o tatou tiutetauave i mataupu tau i le va-i-fafo mo le Ekalesia. Na ia mafaufau loloto mo sina taimi, ona faamalamalama mai lea o le taua o le uunaiina o tagata ina ia le faia ni ufimata. Na ia faamatalaina mai le Ku Klux Klan. O se faalapotopotoga sa matuai tele sona aafiaga ma taufaamatau i le tele o tagata Amerika i le vaega muamua o le seneturi e 20. O le ofuina ai o ofutalaloa ma ufimata tusapau, lea sa faigata ai ona iloagofie sui auai, na latou susunuina satauro i luga o fanua o i latou na faasaga i ai a latou faiga, o ni tagata ua latou ta’ua i latou lava o taifau leoleo. O nisi o i latou na sili ona faatūtū i ai o tagata uli o Amerika, ae na faapea foi tagata Katoliko, Iutaia, ma tagata malaga mai fafo. O tagata fitafita sili o sui auai o le faalapotopotoga na auai i le sasaina, sauaina faaletino, faapea foi ma le fasiotitagata. Na faasino le Susuga a Foxman i le toatele o le faalapotopotoga, na lē faia ni ufimata, sa masani lava o tagata lelei, e aofia ai le au faipisinisi ma tagata lotu. Na ia faasino i le nanaina o o latou tagata moni, ma le faia o se ufimata e mafai ai e i latou ona auai i gaoioiga ia sa masani ona aloese ai. O la latou amio na avea o se aafiaga matua leaga lava mo tagata Amerika.
O le fautuaga a le Susuga a Foxman, o le faamamafa atu lea o le taua o tagata e aloese mai le faia o ufimata ia e natia ai o latou tagata moni.1
O faataitaiga mai le Talafaasolopito o le Ekalesia
I popofou o la tatou talafaasolopito o le Ekalesia, sa nonofo ai le Perofeta o Iosefa, o Ema, ma la laua masaga e 11-masina le matutua i Hiram, Ohio, i le faatoaga a Johnson.
I se tasi po o le Aso Toonai, na feosoi mai ai i le faitotoa se vaega o alii na vali uli o latou foliga, ma toso le Perofeta i fafo, lea na latou sasaina ai o ia ma sasaa le ta i o laua luga ma Sini Rikitone.
“E ui sa gau se nifo o le Perofeta, i ai se manu’a tugā i lona itu, toulu sina vaega o lona lauulu, ma i ai ni mu mai le aseta o le kasa, na ia tuuina atu lava se lauga i le sauniga masani i le Aso Sa. Faatasi ai ma le au paia na faapotopoto iina, pe tusa ma le toafa tagata o le vaega leaga na i ai.”2
O se mea foi e malie ai, o i latou o e na auai i le fasiotiaina o le Perofeta o Iosefa Samita ma lona uso o Ailama, na valiina o latou foliga i se taumafaiga e nana ai o latou tagata moni.3
Aloese mai le Faia o Ufimata ma le Faia o Mea e le Tusa ma Lou Tagata
Ou te le o fautua atu faapea o loo auai soo se tasi o outou i ituaiga gaoioiga leaga ia na faato’ā ou faamatalaina atu. Ou te talitonu, i o tatou vaitaimi, pe afai o le lē faailoaina o lou tagata moni, ua sili atu ona faigofie nai lo se isi lava taimi, faapea o loo i ai mataupu faavae taua o loo aofia ai i le lē faia o se ufimata, ma “tutumau i faatuatuaga, … ma e na fasia.”4
O se tasi o ou puipuiga aupito sili faasaga i le faia o filifiliga lē lelei, o le lē faia lea o soo se ufimata e natia ai lou tagata moni. Pe a e maua oe lava o manao e faia faapea, faamolemole ia iloa o se faailoga matuia lena o se tulaga matautia, ma o se tasi lea o meafaigaluega a le tiapolo ina ia uunaia oe e faia se mea e lē tatau ona e faia.
O se tulaga malie le faapea o tagata o loo aofia ai i ponokalafi, e masani ona tauavea se igoa ese ma natiaina lo latou auai. Latou te ufiufia la latou amio, lea ua latou iloaina e faataumaoi ma faatautala, i tagata uma latou te popole i ai. O le ponokarafi o se mala lea e faaleagaina ai, e le gata i le tulaga o le ola mama o se tagata i le va ma le Atua, ae e mafai foi ona faaumatia ai faaipoipoga ma aiga, ma i ai sona aafiaga matautia i atunuu.
Mo i latou o e ua pau’ū atu i lenei mausa faataumaoi, faamolemole ia mautinoa e mafai ona e salamo, ma e mafai ona faamaloloina oe. O le salamo e tatau ona muamua atu i le faamalologa. O le faamalologa atonu o se faagasologa umi. O lou epikopo po o le peresitene o le paranesi, e mafai ona fautuaina oe i le auala e mafai ai ona e maua le fesoasoani o loo e manaomia e faamaloloina ai.
Ia Faia e Tusa ma ou Talitonuga
Ua taatele i aso nei le lē faailoaina ai o le igoa o se tasi, pe a tusiaina fesootaiga ita, ma malolosi i luga o le initoneti. O nisi ua latou ta’ua lena mea o le faatigā. E i ai faalapotopotoga patino ua taumafai e siakiina faamatalaga. Mo se faataitaiga, o le Taimi a Niu Ioka e le taliaina faamatalaga e i ai “faamatalaga e osofaia ai isi tagata, ata mataga, gagana masoā, uiga mataga, … faafoligaina o tagata, faaseunanui ma le VAVAO. …
“O le Taimi e fautuaina foi le faaaogaina o igoa moni, ona, ‘Ua matou iloaina o tagata o e faaaogaina o latou igoa, e faatautaia talanoaga sili atu ona matagofie, ma faaaloalogia.’”5
Na tusia e le Aposetolo o Paulo:
“Aua ne’i faaseseina outou, o le feoai ma e amio leaga e leaga ai amio lelei.
“Ina ala mai ia i le amiotonu, a e aua ne’i agasala; auā ua pouliuli nisi i la le Atua” (1 Korinito 15:33–34).
Ua manino lava o fesootaiga faatiapolo e le na o se tulaga o amioga leaga, ae, afai e faia e i latou o e o le Au Paia o Aso e Gata Ai, e mafai ona matua aafia ai i latou o e le o i ai le malamalama o le Atua, po o se molimau e uiga i le Faaola.
O soo se faaaogaaga o le initoneti e soona fai, faatamaia ai se igoa o se tasi, po o le tuuina ai o se tagata i se malamalama leaga, o se faiga faataumaoi. O le mea ua tatou vaaia i totonu o atunuu, pe a faaaogaina e tagata ufimata o le lē faailoaina o igoa, ua sili atu ona latou auai i lenei ituaiga amioga, lea e matua faataumaoia ai aoaoga faalemalo. E faapea foi ona solia ai mataupu faavae na aoaoina e le Faaola.
O tagata amiotonu e le manaomia le faia o ufimata e natia ai o latou faasinomaga.
Faatino Lelei Lau Vaega
E i ai lo matou talitonuga ia te outou. E talitonu faamaoni ia taitai o le Ekalesia e mafai ona sili atu lo outou fausiaina o le malo nai lo se isi augatupulaga i luma atu. E le gata ua outou mauaina lo matou alofa ma le lototalitonu, ae faapea foi a matou tatalo ma faamanuiaga. Ua matou iloaina o le manuia o la outou augatupulaga e taua i le faatuina faifaipea o le Ekalesia ma le tuputupu a’e o le malo. Matou te tatalo ina ia outou faatino lelei la outou vaega, a o outou aloese mai le faaaogaina o ufimata.
Ata na tusia e Craig Dimond