E Tatalaina e le Sefuluai Pupuni o le Lagi

Jacqueline Kirbyson, Egelani

I le tele o tausaga talu ai, na te’a ai lo’u toalua mai lana galuega. Na matou tauivi e totogi a matou pili ma faatau meaai i sina tamai tupe o le penisiona na ou mauaina, ae sa mafai lava ona matou ola.

E ui sa lagolagoina lo’u tuuto atu i le Ekalesia, na le fiafia lo’u toalua i lo’u totogia o le sefuluai, a o faigata ona tautotogi a matou pili. Peitai ane, na ou lagonaina faapea, e tatau ona ou usitaia pea lenei poloaiga.

E ui sa itiiti se tupe na matou mauaina, ae sa i ai si a matou tamai togalaau. Pe a oo i le tautotogo, matou te totoina karoti, pateta, pi, tamato, pepa mumu, ma vaofalī, e ese ai mai isi fualaau faisua. Sa lauolaola la matou togalaau i le taumafanafana, ma sa tele fualaau na seleseleina. O a matou laau fua suamalie na toetoe lava gaui mai lala ona o le fua taufuifui. Na ou faaaluina se taumafanafana pisi tele, i le tuufaguina ma le faafulisaina o fualaau aina ma laau faisua, faia siamu, taoina pai, ma tufatufa atu fua o faatoaga faasili i o matou tuaoi.

I se tasi aso, a o ou savalivali solo i le matou tamai togalaau, na ou manatuaina ai le folafolaga a le Atua e tatalaina pupuni o le lagi ma “sasaa atu le manuia mo outou, ina seia silisili ona tele” (Malaki 3:10).

I le manatunatu ai i la’u pusaaisa ua faatumulia i fualaau, na ou iloa ai na faamanuiaina moni lava matou e le Tama Faalelagi. O la matou tamai togalaau na maua ai meaai e lava mo i matou i taimi o le manaomia ai—ua lava ma totoe. Ou te matuā faafetai ua faamanuiaina e le Atua i matou a o matou usitaia Ana poloaiga.