2013
Tausiga o Fanau ia Maufetuuna’i
Mati 2013

Tausiga o Fanau ia Maufetuuna’i

Saunia e Lyle J. Burrup

Tautua a le AAG mo Aiga

O le tulaga lelei e tali atu ai fanau i faaletonu o le olaga, e faalagolago tele lea i le tulaga lelei e fesoasoani ai o latou matua ia i latou e atiina ae uiga ma tomai o le maufetuuna’i.

Ua tumu le olaga i tofotofoga. Ua fetalai mai le Alii faapea ua Ia filifilia i tatou mai “i le ogaumu o i ai le puapuaga” (Isaia 48:10), lea o le a “tofotofoina, e pei lava o Aperaamo” (MF&F 101:4), ma o le a faapea ai e le tiapolo “ona maua ai [e i tatou] le poto masani, ma o le a avea ma [o tatou] lelei” (MF&F 122:7). O lenei mea e foliga matuā taufaamata’u. Atonu tatou te fesili faapea, pe mafai ona tatou fiafia ma fifilemu i taimi o tofotofoga? Ua aoao mai ia i tatou tusitusiga paia faapea e mafai (tagai i le 2 Korinito 12:10; Eperu 5:7–8; MF&F 127:2).

A o fautuaina ai faifeautalai i le nofoaga autu mo le aoaoina o faifeautalai (NAF) i Provo, Iuta, na ou iloaina ai faapea o le mafuaaga taatele sili o faafitauli faalelagona, o le leai lea o se loto talitonu e mafai ona toe faaleleia. Pe a tauivi se faifeautalai poto, ma talenia, lea e aunoa ma se talaaga o ni faafitauli faalelagona, e masani ona tuufesili taitai perisitua ma isi pe aisea. I le tele o tulaga, o le faifeautalai sa le’i aoaoina e ia le tulaga e taulimaina lelei ai faafitauli. E mafai e matua ona fesoasoani i a latou fanau ina ia foia ia ituaiga o faafitauli, e ala i le aoaoina o mataupu faavae ia e uunaia ai le saga maufetuuna’ia.

Uiga Faaalia o le Maufetuuna’i

O le faauigaga autu o le upu maufetuuna’i e faatatau lea i le gafatia e se mea ona toe maua lona foliga po o le tulaga, pe a uma ona faapi’o, faameme’i, pe faafeoma’i. O aso nei, ua tatou faaaogaina tele le upu e faamatala ai lo tatou gafatia e toe tula’i mai i ni mafatiaga.

Ua tatou iloa mea e lua e uiga i faigata ma le toe vave faaleleia: Muamua, e i ai le “faafeagai o mea uma” (2 Nifae 2:11). Lona Lua, i le mauaina o soo se mea e sili lona taua, e manaomia ai se osigataulaga sili.

Pe a faasolo ina maua e fanau le malosi e toe vave tulai mai ai, o le a latou malamalama ma talia nei mea moni e lua. Latou te vaai atu i le olaga o se tulaga e tumu i luitau ma fesuisuia’i soo, peitai ua latou talitonu e mafai ona latou taulimaina na luitau ma suiga. Latou te mafaufau i mea sese ma vaivaiga o ni avanoa e aoao mai ai, ma latou te taliaina faapea o le malolo, atonu e muamua mai i le manumalo.

A o atiina ae e fanau le maufetuuna’i, latou te talitonu e mafai ona latou uunaia ma e oo lava i le puleaina o taunuuga i o latou olaga e ala i taumafaiga, vaaiga faalemafaufau, malamalama, ma tomai. Faatasi ma lenei uiga, latou te taulai atu ai i mea e mafai ona latou faia, nai lo mea e le mafai ona latou puleaina.

O se isi faailoga o le maufetuuna’i, o le vaai atu lea ma se faamoemoega ma se uiga sili o le olaga ma tagata. O le i ai o se manatu i le faamoemoega o se mea, o le a fesoasoani ai i a tatou fanau e aloese mai le fiu gofie, e ui lava i tulaga faaletonu ma uunaiga malolosi e faia lea tulaga. A oo ina atili maufetuuna’i a tatou fanau, o le a latou atiina ae mea faatauaina loloto ia e taitaia ai i latou: o le alofa moni, mama, amiosa’o, faamaoni, galue malosi, ma le faatuatua i le Atua. O le a latou faaauai i latou lava i mea o loo tutupu i o latou siosiomaga, ma mafaufau mo le tuuto atu i mea faatauaina, nai lo le lagona o le faaesea ma aloese mai le faafitauli.

Ua aoao atu ma faamalosia e le talalelei nei mea faatauaina ma vaaiga.

O Le Manao ia Atoatoa e Faavaivaia ai le Maufetuuna’i

O le tasi tulaga e taofia ai le atinaega o le maufetuuna’i, o se malamalamaaga sesē lea e uiga i le poloaiga ina ia atoatoa (tagai i le Mataio 5:48). O lenei malamalamaaga sesē o le vaega sili ona taatele lea ua ou vaaia, lea e faavaivaia ai le maufetuuna’i o faifeutalai fou. Latou te mananao ina ia atoatoa i mea uma, ona latou te alolofa i le Tama Faalelagi ma Iesu Keriso, ma latou te le manana’o e faatiga ia i Latou. Ae latou te le iloaina o le Alii e galue e ala i auauna vaivai ma faatauvaa (tagai i le MF&F 1:19–23) ma, i le tauivi ai ia atoatoa, e le faapea o le a tatou le faia ai lava ni mea sesē, nai lo lena, tatou te avea ma tagata tuputupu a’e atoatoa e ala i le Togiola a Iesu Keriso, a o tatou tauivi e mulimuli ia te Ia (tagai i le Mataio 5:48, vaefaamatalaga e).

O lenei malamalamaaga sesē atonu e mafua mai foi mai mea o loo aoao atu e atunuu i a tatou talavou: faapea o lo latou taua e faalagolago i taleni ma le faatinoga. I a’oga ma nuu, o nisi taimi, e oo lava i le lotu po o le aiga, e vaaia ai e talavou a latou uo o amanaiaina, taliaina, faatagaina, ma viia mo le talenia i le faia o se mea. O le mea lena, latou te taumafai ai ina ia faia faapea. A o latou faia, e amata ona latou popole i le toilalo ma le faia o mea sese. Latou te filifili le mea e fai, e faalagolago i le tulaga faamanuiaina latou te manatu o le a latou o’o i ai. Latou te faatuutuu i le faia o se mea, pe a latou le lagonaina le lototele e fai ai. Latou te popole i manatu o isi, pe a latou faia mea sese. Latou te popole nei le toe taliaina i latou e a latou uo. Latou te vaai atu i la latou faatinoga, o se fua o lo latou taua. O lo latou manao ia atoatoa, ua avea ma se matai saua, ma faapea ona faavaivaia ai lo latou maufetuuna’ia.

Mo se faataitaiga, talu ai o faifeautalai i le NAF, e le mafai ona filifili le mea o le a latou faia, po o le mea e le tatau ona faia, o se vaega o la latou aoaoga, latou te faia ai mea sese a o latou aoao e tautatala i se gagana fou, aoao atu mataupu o le talalelei, ma faatino a latou galuega faafaifeautalai. Latou te faia nei mea sese i luma o ni tagata ese, ma afai latou te le’i mauaina se agaga ia maufetuuna’i, latou te lagonaina le faanoanoa ma le lofituina.

O Le Fesoasoani i Fanau e Atiina ae le Maufetuuna’ia

E faapefea la ona tatou fesoasoani i a tatou fanau e atiina ae le maufetuuna’i? Ua tuuina mai e lo tatou Tama Faalelagi se ata faataitai. (tagai i le Mose 1:39) ma lo tatou taua tele (tagai i le MF&F 18:10), ia ua faavae i luga o lo tatou tofi o se atalii po o se afafine. Ua Ia tuu mai ia i tatou tulafono, ina ia iloa ai le mea ua Ia faamoemoeina mai (tagai i le MF&F 107:84), faatagaina i tatou e faia filifiliga (tagai i le 2 Nifae 2:15–16), ma faamamaluina a tatou filifiliga (tagai MF&F 130:20). Na te faatagaina le aoaoina ma faatonuga e faasa’o ai mea sese (tagai MF&F 1:25–26) ma le salamo ma le toe totogiina e faasa’o ai le agasala (tagai MF&F 1:27–28).

O nisi nei o fautuaga mo le auala atonu tatou te faaaogaina ai nei mataupu faavae i o tatou aiga:

  • Tatalo ia malamalama i malosiaga o a outou fanau, ma le auala e fesoasoani ai i o latou vaivaiga.

  • Ia onosai ma ia iloa o fanau e manaomia se taimi e atiina ae ai le maufetuuna’i.

  • Tauivi ia malamalama faapea o sesē ma tulaga toilalo, o ni avanoa ia e aoao mai ai.

  • Faataga taunuuga faalenatura, ma talafeagai e avea ma tulaga e aoaia ai.

  • Faaaloalogia faaiuga a fanau, tusa lava pe o a latou filifiliga lē lelei o le a le maua ai avanoa.

  • Aloese mai le tuuina i lalo o fanau mo le solia o tulafono.

  • Aua le faaleaogaina taumafaiga e ala i le soona faitioina.

  • Nai lo le viiaina o mea ua ausia, uunaia ma viia taumafaiga.

  • “Ia sili atu ona tele lau faamalo atu i lau fanau, nai lo le faasa’oina o i latou. Faamalo atu ia i latou e oo lava i mea aupito sili ona faatauvaa ua latou ausiaina” (Peresitene Ezra Taft Benson [1899–1994], “O Le Nofoaga Faamamaluina o Tamaitai,” Ensign, Nov. 1981, 107).

A o tatou galulue ma le agaga tatalo i le galuega faigata o le tausia o fanau ia maufetuuna’i, o le a faamanuiaina i tatou e le Alii i le taitaiga ma musumusuga tatou te manaomia, e fesoasoani ai ia latou maua le malosiaga faalelagona ma le faaleagaga e taulima ai luitau o le olaga.

Ata tusi na saunia e Craig Dimond ma Cody Bell