Aua o Loo Soifua o Ia
“E moni ua toetu le Alii” (Luke 24:34).
Sa tu Watoy i lalo o le fu’a felanulanuai a Filipino i fafo o le aoga a o lei ulu atu i totonu.
“Talofa, tamaiti,” na fai mai ai lona faiaoga. “Ua oo i le taimi o la tatou tatalo o le taeao.”
O ona itu uma, sa pa’i atu uo a Watoy i o latou muaulu, fatafata, ma tauau e fai ai le faailoga o le koluse. Ona latou taulotoina lea o le tatalo e masani ona latou faia i le amataga o le vasega. E pei ona masani ai, e lei auai Watoy. Ae na moeiini ona mata, punou lona ulu, ma fai lemu lana lava tatalo. Sa tatalo o ia i ni mea eseese i taimi taitasi, i le auala sa aoaoina ai o ia i le fale ma le Peraimeri.
Ina ua uma sa ea a’e o ia i luga, ma vaaia lona faiaoga o matauina o ia ma se foliga fenumiai i ona mata.
“E mafai ona ta talanoa pe a uma le aoga?” na ia fai mai ai.
Sa lue atu le ulu o Watoy. Pe ua i ai sana mea sese ua fai?
Ina ua uma ia vasega mo le aso, sa savali atu le faiaoga ia Watoy.
“Ou te vaaia lava oe e le faailogaina lau koluse pe fai tauloto faatasi le tatou tatalo i taeao,” o lana tala lea. “E mafai ona e ta’u maia pe aisea?”
Sa mapuea Watoy ua uma lona popole. E lei ita lona faiaoga, na o le fiailoa lava! Sa ia mafaufau pe faapefea ona tali atu.
“Ia,” na ia amata ai, “i la’u lotu, a matou tatalo, matou te talanoa atu i le Tama Faalelagi e uiga i le mau mea eseese. O le koluse foi e faamanatu mai ai na maliu Iesu. Ae ua le o maliu Iesu. O loo soifua o Ia!”
Na mafaufau lona faiaoga i lenei mea mo sina minute ona luelue malie atu lea o lona ulu.
“Faafetai atu mo le fasoa mai o lenei mea,” o lana tala lea.
A o savali atu Watoy i le a’oga lakapi, sa ia lagona le mafanafana i totonu. Sa fiafia o ia e aoao atu isi e uiga ia Iesu Keriso.
Ata na tusia e Brad Teare