Ua Lipotia mai e Elders Oaks ma Bednar le Faatupulaia o le Ekalesia i le Taimi Nei i Amerika i Saute
O le vaega amata o le Mataupu Faavae ma Feagaiga o loo aofia ai le valoaga o le a aumai ai i le Ekalesia “mai le le mailoa ma i fafo o le pouliuli” (1:30). Atonu ua taunuu lena aso i Amerika i Saute.
“Ua tatou o mai i fafo mai le le mailoa ma le pouliuli,” na saunoa ai Elder David A. Bednar o le Korama a Aposetolo e Toasefululua ina ua taliu mai mai Amerika i Saute ia Oketopa. “Ua atagia lenei upumoni i le auala ua iloa ai e taitai o le malo o [Amerika i Saute] ma aloaia le Ekalesia ma le ala o loo talileleia ai sui o le Ekalesia i soo se taimi matou te taunuu ai.”
Na malaga faatasi Elder Bednar ma Elder Dallin H. Oaks, o le Korama a Aposetolo e Toasefululua, i se asiasiga i le aso 19–28 o Oketopa i Amerika i Saute i le Eria a Amerika i Saute Saute, lea e na aofia ai se iloiloga o le eria, fonotaga ma faifeautalai ma le au taitai perisitua, ma faigalotu ma le autalavou ma talavou nofofua matutua, ia sa faasalalauina i Chile, Atenitina, Iurukuei, ma Parakuei.
Na feiloai le au taitai asiasi ma le silia ma le 1,800 faifeautalai o loo galulue ai i atunuu e fa o le eria. “Sa matou faatalofa ma faifeautalai uma na ma feiloai i ai, ma sa foliga o loo lelei,” sa saunoa ai Elder Oaks. “O se autau faagaeetia o faifeautalai mai Amerika i Matu ma Saute.”
Pe tusa ma le 15,000 tagata na maimoaina foi ia faigalotu e lua mo autalavou a le eria ma talavou nofofua matutua. Sa pulefaamalumalu Elder Oaks i le faigalotu a le autalavou nofofua matutua, lea sa faasalalauina i nofoaga e 326 i le eria atoa. O Elder Bednar o le pulefaamalumalu lea i le faigalotu a le autalavou laiti, lea sa matamata ai le tupulaga talavou e ta’i 12 i le 18 tausaga ma o latou matua sa faapotopoto i nofoaga e 439.
I fonotaga taitasi ma faigalotu, sa saunoa ai le Usoga sa asiasi atu, i le taua o le mauaina o se tulaga maualuga atu o le “tuputupu ae moni” e ala i le faateleina o le auai i sauniga faamanatuga, faaeega paia ma faaipoipoga i le malumalu, ma le talavou e auauna atu faamisiona talai.
I le faigalotu a le autalavou, na valaaulia ai alii talavou ma tamaitai talavou e fai ni fesili. Sa tali e le Au Pulega Aoao le mau fesili eseese e uiga i sauniuniga faafaifeautalai ma le tumau i le amiotonu i se lalolagi ua faateleina ai le amioletonu.
Sa fautuaina foi e le Usoga ia taitai perisitua i le lotoifale e faapea, o le tuputupu ae moni e mafai ona ausia i le eria i le na o le faatoateleina o le auaunaga faafaifeautalai ma le faatumauina. E manaomia se vaega malolosi o faifeautalai ua maea misiona e faamautinoa ai ni augatupulaga i le lumanai o ni taitai ua i ai le poto masani, na saunoa ai Elder Oaks.
Na faamatala e Elder Mervyn B. Arnold o le Fitugafulu, lea sa Peresitene o le Eria i le taimi lea, o le asiasi atu a le Au Pulega aoao ma o latou faletua e “musuia, faagaeetia, ma tumu i aoaoga.”
“O le a manatua pea lo latou alolofa, agalelei, ma a latou aoaoga,” na ia saunoa ai.
Na feiloai atu Elder Dallin H. Oaks o le Korama a Aposetolo e Toasefululua i le akiepikopo o Santiago, Chile, o Moseniolo Ricardo Ezzati Andrello.
Ata mai le faaaloaloga a le Misiona a Amerika i Saute Saute ma le Church News