Na Talitonu ia te A’u Lo’u Uso
Na fesoasoani Tanu ia te au e atiina ae se taleni, na ou mautinoa sa le’i i ai ia te au.
Ata na tusia e Guy Francis
Sa 15 o’u tausaga, ina ua ou aoaoina se mea moni e uiga i au taleni—pe o le mea moni lava, o lo’u le mauaina lea—i se tasi vaega patino: sa lē mafai ona ou pese.
Na ou taumafai ia ou i ai i se tala faalenuu, ma o la’u pese toatasi e aunoa ma se meafaifaaili, sa matua lē lelei lava, ina ua afa le pese, na sau se tagata ta laau ma amata ona taina le pese ona o le alofa mai. Ina ua mavae lena, na ou tautino e leai se tasi e toe faalogo lava ia te au o pese. Ua oo i le taimi e tatau ona sui ai, ma saili se isi mea ou te fiafia i ai, ona ua matua lava ma totoe le aafiaga maasiasi e tasi.
Ae ui lea, o lo’u uso matua o Tanu, o le sa avea o se tagata pese sili ona maoae, na ia te ia nisi fuafuaga. I nai masina talu lo’u taumafai ai mo le tala, na ia fesili mai ai pe aisea na ou fefe ai e toe pese.
“E matuā le lelei lava au,” na ou fai atu ai ia te ia. “E le mafai ona ou pese.” Sa lei talitonu Tanu ia te au. E ui i a’u tetee, na ia faatauanauina au e usu se pese i lena lava taimi. Sa ou fefe.
Ou te lē manatuaina le pese na ou usuina, ae sa puupuu, tau le lagona, ma foliga mai o se faamaoniga o le lē i ai ia te au o se taleni pese. O le tala na sosoo ai a Tanu, o le a ou manatuaina pea i lo’u olaga atoa. “Lena,” na ia fai mai ai ia te au, “na ou iloaina lava e lelei lou leo. Na pau lava le mea o lou toaga e faataitai.”
I le Mataupu Faavae ma Feagaiga 38:25 ua tatou aoao mai ai “ia taitasi le tagata ma manatu taua i lona uso e pei o ia lava ia te ia.” Pe ana taufaalili Tanu ia te au ma la’u pese, faapei ona faia e le toatele o tei matutua, o le a mautinoa lava lona faamautinoaina o lo’u lē toe pese lava, atonu mo le olaga atoa. Nai lo lena, na sii au e Tanu i luga. Na ia faamalosiauina au.
I le faaiuga, na ou mulimuli i lana fautuaga ma faataitai. Na ou te’i, na faifaimalie ona lelei la’u pese. O le pese na avea ma se fiafia sili i lo’u olaga. Na ou pese i le tele o aufaipese i le taimi atoa o le aoga maualuga faapea foi i le kolisi ma isi mea. O le pese ua tumau le avea o se tasi o o’u fiafiaga sili ona loloto.
Na aoao mai le Faaola: “Faauta, pe tutu ea e tagata se lamepa ma tuu i lalo o se pusa fua saito? E leai, ae latou te tuuina i luga o se tuugalamepa, ma o le a susulu atu ai lona malamalama ia i latou uma o e o i totonu o le fale” (Nifae 12:15). Sa mafai ona ou faasusuluina lena malamalama, i le fiafia ai ma le faasoaina atu o musika mo le tele o tausaga, ae atonu o le a lē mafai lava ona ou faia, pe ana le seanoa le uunaiga a lo’u uso o Tanu.