O Le Tusi Fou a Riki
O Laura Byrd e nofo i Oregon, ISA.
“A ou lelei ma agalelei ma fesoasoani i se tasi ou te vaai i ai, ou te fiafia lava” (“A Happy Helper,” Children’s Songbook, 197).
Sa faasolosolo e Riki ona lima i mataitusi auro i le pito i luma o lana tusi fou. Sa lolofi ane ana uo.
“Ta’i manaia!” na fai atu ai Jake. “Ou te lei vaai lava muamua i se Tusi a Mamona lanumumu.”
“E foliga mai e ofi i le taga o lou ofu mumu,” na toe fai atu ai Iaroma.
“E ofi,” le tala a Riki, ma momono ifo i lana taga ma toe aumai i fafo. O le taimi lena na faafeiloai atu ai le peresitene o le Peraimeri i tagata uma mo le taimi o fetufaaiga, ina ia taofi ai le talanoa o tamaiti. Ae sa le mafai lava Riki le autilo i lalo i lana tusi mai lea taimi i lea taimi.
Ina ua uma le Peraimeri, sa alu Riki i le vasega pepe e aumai lona tuafafine laitiiti. A o la ua i ai iina lona Tama.
“Na e vaai ia Tina?” o le fesili lea a Tama.
“E leai, ae talosia ua sauni e alu,” le tala a Ricki. “Ua ou fiaai!”
Ua gogolo lava le manava o Riki i le taimi na latou maua ai Tina, ae na ataata o ia ina ua vaai atu o tutu mai ai ma Uso ma Tuafafine Bird. O la e tu ia Uso Bird. A o la e nofo ia Tuafafine Bird i lona nofoafaataavalevale, e pei ona masani ai. Fai mai Tina e maua ia Tuafafine Bird i se faama’i e aafia ai ona musele ma e faigata ai ia te ia ona faaaoga. O nisi taimi e tiga ai o ia, ae e ataata lava o ia i taimi uma i tagata uma. O Uso ma Tuafafine Bird o nisi o tagata e fiafia lava i ai Riki i le uarota.
“Ei, talofa alii,” o le tala lea a Uso Bird, ma lulu le lima o Riki. “Na a mai le Peraimeri i lenei aso?”
“Manaia. Sa ou faaali i tagata uma le mea lea.” Sa tuu i luga e Riki le tamaitusi lanumumu.
“O le a lena mea?” na fesili ai Tuafafine Bird.
“O la’u Tusi Mamona fou. Na lafo mai i o’u matua matutua,” le tala a Riki a o ia tuuina atu ia te ia.
“Ou te lei vaai lava i se tusi faapea,” le tala a Tuafafine Bird, ma fefulifulisa’i le tamai tusi lanumumu i ona lima. “E ese le laitiiti ma mama. Ou te fia faitau lava i le Tusi a Mamona, ae e augatata o’u lima e uu a’u tusitusiga paia, e ala ai ona na o ni nai minute lava e faitau ai ma tuu. Ae e mafai ona ou uuina le tusi lea mo se taimi umi.” Ona ia toe faafoi atu ai lea.
Na tilotilo Riki i lana tusi manaia. Ona ia toe tilotilo lea ia Tuafafine Bird.
“Ia, Tuafafine Bird. Ou te manao e ave ma oe.” Na toe faafoi atu e Riki le Tusi a Mamona i ona lima.
E te mo’i? o le fesili lea a Uso Bird.
“E mo’i,” o lana tala lea.
“Oi, Riki, faafetai lava.” Na tumu mata o Tuafafine Bird i loimata. “O le faitau o tusitusiga paia e fesoasoani i o’u tiga i aso. O le a fesoasoani moni lava lau tamaitusi ia te au.” Sa aapa atu o ia ma fusi mai [Riki].
A o latou savavali atu i le taavale, sa fai atu Tina, “Ua e le pisa lava. Ua e faanoanoa ua foai lau tusi?”
E le o lena. E manaia, ae o loo i ai le isi a’u Tusi a Mamona i le fale. E le gata i lena, ou te manatu e sili atu ona taua mea o i totonu o le tusi nai lo fafo.”
Sa oomi ma le alofa e le Tina lona tauau.
“Pau lava le mea ou te faamoemoe o le a le fiafia Tinamatua ma Tamamatua ua ou foa’ia la’u Tusi a Mamona.”
“Talitonu mai, Riki, e le feitai.”
Na manatu Riki e sa’o lona tina.
Ata na tusia e Matt Smith