E faapefea ona ou taulimaina talanoaga e uiga i le talalelei pe afai o le isi tagata e na o le taumafai e manumalo i se finauga? O tagata faapena e le mananao e faalogo i se molimau.
O le manatu poto ma le faauigaina, e mafai ona fesoasoani ia i tatou e malamalama ai i le upumoni, e moni lava, ma e mafai ona faia finauga talafeagai i le puipuia o le Ekalesia ma ona aoaoga. Peitai, pe a sili atu ona naunau se tasi i le manumalo i se finauga nai lo le malamalama i le talitonuga o se isi tagata, o le a faifai pea ona tulai mai finauga. Ia tu malosi i le tuuina atu o le molimau e uiga i le mea e te talitonu ma iloa e moni.
Afai o le tagata o loo e talanoa i ai, o loo faaauau ona uunaia le mataupu, ia faailoa i lena tagata e te faaaloalo i mea na te talitonu i ai, ae o le a tatau ona e ioe atu ina ia auese ai. O talanoaga e uiga i talitonuga faalelotu e lē tatau ona faatatau i le “manumalo”. Ma afai ua amata ona faafinau po o le ita, o le a lē avea oe o se faataitaiga o le mea o loo e talitonu i ai, pe o le a le faatasi foi le Agaga Paia ma oe.
O Elder Robert D. Hales o le Korama a Aposetolo e Toasefululua, na aoao mai pe a tatou talanoa i tagata e uiga i le Ekalesia, “o lo tatou faamoemoega o le fesoasoani lea ia i latou e malamalama i le upumoni, ae le o le puipuia o o tatou lagona maualuga po o le mauaina o togi i se finauga o mataupu taulotu. O a tatou molimau mai le loto, o le tali aupito sili ona malosi lea e mafai ona tatou tuuina atu i o tatou fili. Ma o na ituaiga molimau e na o le pau le auala e mafai ona tuuina atu ai, o le alofa ma le agamalu.”1
O mea a le Agaga e aoaoina “e le o upu malie o le poto o tagata, ae o le faasino mai e le Agaga ma le mana” (1 Korinito 2:4). E ui lava atonu e le suia ai le mafaufau o soo se tasi, e tatau lava ona tuu atu lau molimau ma faailoa i tagata le mea e te talitonu ai. Ma a e faasoa atu le talalelei, o le auala e te ta’uina atu ai mea, e matua taua e pei lava o le taua o mea o loo e ta’uina atu. Tautala ma le onosai ma le alofa. Mulimuli i le Agaga, ma o le a uunaia oe e iloa mea e tatau ona fai atu ai (ma mea e le tatau ona fai atu ai) ma le auala e tali atu ai.