Savali a le Au Peresitene Sili
Filemu, Filemu
I se tasi aso, i nai tausaga ua mavae, ina ua mae’a galuega i le ofisa, na ou lagonaina ai se uunaiga malosi ina ia asia se tina ua maliu lana tane, o le sa avea ma se tagata mai i se nofoaga autu mo le tausiaina o tagata matutua i le Aai o Sate Leki. Na ou alu sa’o lava iina.
Ina ua ou alu atu i lona potu, sa ou iloa ai e le o i ai o ia. Na ou fesili i se tagata faigaluega e uiga i le mea o i ai o ia, ma sa faasino a’u i se potu malolo. O iina na ou maua ai lenei tina ua maliu lana tane, o talatalanoa ma lona uso ma se tasi uo. Sa manaia la matou talatalanoaga faatasi ma i latou.
A o matou talatalanoa, na sau se alii i le faitotoa o le potu ina ia mafai ona maua se apainu mai le masini. Sa ia vaai mai ia te a’u ma faapea mai, “Ei, o oe o Tom Monson.”
“Ioe,” o la’u tali atu lea. “E pei lava oe o se Hemingway.”
Na ia faailoa mai faapea o ia o Setefano Hemingway, le atalii o Alfred Eugene Hemingway, o lē na avea o se tasi o o’u fesoasoani, a o avea a’u ma se epikopo i le tele o tausaga talu ai, ma o lē sa ou valaauina ia Gene. Na ta’u mai e Setefano ia te a’u faapea o lona tama, o loo i ai foi i le fale lava lea e tasi, ma ua latalata ona oti. Sa faapea ona tauvalaau Gene i lo’u igoa, ma sa mananao le aiga e faafesootai a’u, ae sa le mafai ona maua se numera o la’u telefoni.
Na vave ona ou faamavae ma ma o atu faatasi ma Setefano i le potu o lē sa avea muamua ma o’u fesoasoani, i le mea na faapotopoto ai isi o lana fanau, a o lona toalua na maliu i nai tausaga na muamua atu. Na manatu tagata o le aiga i le ma feiloaiga ma Setefano i le potu malolo, o se tali mai lo tatou Tama Faalelagi i lo latou mana’oga sili, ina ia ou vaai i lo latou tama a o le’i maliu o ia ma tali atu i lana valaau. Sa ou lagonaina foi o le tulaga lena, aua ana le alu atu Setefano i totonu o le potu, lea sa ou i ai, i le taimi tonu lea na ia oo atu ai, semanu o le a ou le iloaina o loo i ai foi Gene i lena fale.
Na ma tuuina atu ia te ia se faamanuiaga. O se agaga o le filemu na i ai i lena taimi. Na matou maua se talatalanoaga matagofie, ina ua mae’a, ona ou tuumuli lea.
O le taeao na sosoo ai, na faailoa mai ai i se valaau i luga o le telefoni faapea o Gene Hemingway ua maliu—i le 20 minute talu ona mae’a ona ia maua le faamanuiaga mai ia i maua ma lona atalii.
Na ou faia se tatalo le leoa o le faafetai i le Tama Faalelagi mo Lana taitaiga mamana, lea na faaosofia ai la’u asiasiga i le nofoaga autu mo le tausia o e matutua, ma taitai atu ai a’u i le la’u uo pele o Alfred Eugene Hemingway.
Ou te fia mana’o e mafaufau faapea o manatu o Gene Hemingway i lena afiafi—ina ua matou lagonaina le Agaga, auai faatasi i le tatalo faamaualalo, ma tuuina atu se faamanuiaga faaleperisitua—na faamautuina ai upu ua taua i le viiga “Matai e, Ua Sou le Vasa”:
Le Faaola e, aua ne’i!
Toe tuua na’o a’u,
Ou te maua ai le fiafia
I lou maota paia.
Ou te fiafia pea lava i lena viiga, ma molimau atu i le mafanafana na te aumaia:
Matagi ma galu, malu ia oe
Sou, po o fili, po o tagata,
Leai o se sami na te malua, Le vaa e tofa ai
Le Pule o lalo nei ma luga.
E usitai ia oe, Iesu:
Filemu, filemu1
E ala i loimata ma tofotofoga, e ala i popolega ma faanoanoaga, e ala i le lotomafatia ma le tuua toatasi ona o le maliliu ai o e pele ia i tatou, o loo i ai le faamautinoaga faapea e faavavau le olaga. O lo tatou Alii ma le Faaola o le molimau ola o lena mea.2 Ua lava Ana afioga ua tuuina mai i tusitusiga paia: “Ina soia, ma ia iloa o a’u lava o le Atua” (Salamo 46:10). Ou te molimau atu ai i lenei upumoni.
Aoao Atu mai Lenei Savali
O lenei savali e mafai ona faamafanafana ai i latou o e ua misia se tasi e pele ona o le maliu, po o i latou o e o loo tauivi ma se tofotofoga. I le faaopoopo atu ai i le savali a Peresitene Monson, mafaufau e faasoa atu se tasi o mau nei, e faalagolago i manaoga o i latou o loo e aoaoina: Iopu 19:25–26; 1 Korinito 15:19–22; Mosaea 24:13–15; Mataupu Faavae ma Feagaiga 122:7–9. Pe a uunaia ai, atonu e te manao e molimau atu e uiga i le filemu na tuuina atu e le Faaola ia te oe, i taimi o ou tofotofoga.
O le otootoga o le Mai le Fefe i le Faatuatua, saunia e Howard Lyon, e le mafai ona kopiina
Ata na pueina e Cody Bell; Ata na saunia e Bryan Beach