O Le Ola ai i Mataupu Faavae o le Faalagolago o le Tagata ia te Ia Lava

Saunia e Larry Hiller, Mekasini a le Ekalesia ma Kathryn H. Olson, Auaunaga a le Uelefea

O Lui Quispe, o La Paz, i Polivia, atonu e tasi lona mata e mafai ona vaai ai, ae i ai se vaaiga manino ia te ia o lana sini ina ia faalagolago ia te ia lava, ma saili mea e tausi ai lona aiga. E ui ina feagai o ia ma faafitauli tau i le tamaoaiga ma le soifua maloloina, ae ua mautinoa lava e Lui lona lumanai. Na te faia mea uma na te mafaia e fesoasoani ai ia te ia lava a o tuu atu lona faalagolago i lona Tama i le Lagi. “Ua ou aoaoina e leai se mea e le mafaia pe a e maua le fesoasoani a lo tatou Tama,” o lana tala lea.

Faalagolago o le Tagata ia te ia Lava: O se Mataupu Faavae Faaleagaga ma Faaletino

Mo le valu tausaga talu ai, o lenei tamā o le fanau e toaono, e 46 tausaga le matua, na faigaluega ma alu i le aoga ina ia maua sona tikeri i mea tau laau e toto e faifaatoaga e fetaui ma le siosiomaga. O tausaga uma na aoga ai Lui, na aofia ai le malaga mo le tusa e 60 maila (97 km) mai lona tamai nuu o Achacachi, ina ia auai i le Iunivesite o Mayor de Sam Amdres. E ui i lenei osigataulaga, na faamae’aina ma le manuia e Lui lana aoga, ma o lea ua taulai atu nei i le isi ana sini, o le mauaina o sana lava faatoaga.

O Lui o se faataitaiga lelei o le faalagolago o le tagata ia te ia lava, e pei o le galuega, uelefea, ma le teuina o meaai. Ae, o le mataupu o le faalagolago o le tagata ia te ia lava, e tutusa lava lona taua faaleagaga, e pei o le faaletino. O Elder Robert D. Hales o le Korama a Aposetolo e Toasefululua na faauigaina le faalagolago o le tagata ia te ia lava o le tauaveina lea o le tiutetauave mo lo tatou lava uelefea faaleagaga ma faaletino, ma mo i latou o e na tuuina mai e le Tama Faalelagi i la tatou tausiga.”¹

Na fetalai mai le Alii na te le’i tuuina mai lava se tulafono faapea ua na o le faaletino (tagai i le MF&F 29:34–35). Atonu o le poloaiga e galue, sa faatatau e faamanuiaina ai tatou faaleagaga, e pei foi o lo tatou tausiga faaletino (tagai i le Kenese 3:17–19).

Faalagolago o le Tagata ia te Ia Lava i le Faaleagaga

O faamanuiaga faaletino o le faalagolago o le tagata ia te ia lava, ua faapitoa lona manino mai i taimi o faalavelave, e pei o faalavelave faalenatura, o le leai o se galuega, po o faaletonu tautupe. Peitai, o le faalagolago o le tagata ia te ia lava faaleagaga, e matuā tutusa lava lona manaomia i taimi faapea. O i latou e i ai faavae faaleagaga mausali, ua faamanuiaina i le filemu, faamautinoaga, ma le faatuatua sili atu, pe a valaau atu i le Tama Faalelagi mo se fesoasoani.

Ua fautua mai taitai o le Ekalesia ia i tatou, ina ia sauniuni mo faalavelave faaleagaga. Na saunoa mai Peresitene Boyd K. Packer, Peresitene o le Korama a Aposetolo e Toasefululua:

“Ua aoaoina i tatou ia teuina … meaai, lavalava, ma, pe a talafeagai ai, o kesi—i le fale. …

“E le mafai ea ona tatou vaai atu o le mataupu faavae lava lea e tasi e faatatau i musumusuga ma faaaliga, o le foiaina o faafitauli, i fefautuaiga, ma le taitaiga? …

“Afai e aveesea lo tatou tutoatasi faalelagona ma faaleagaga, o lo tatou faalagolago ia i tatou lava, o le a faapea ona faavaivaia i tatou, atonu pe sili atu, nai lo le taimi tatou te faalagolago ai i mea faaletino.”²

Tuuina Atu ma le Taliaina

E le tatau ona aveseseina le faalagolago o le tagata ia te ia lava, mo le tutoatasi atoatoa. Pe a uma mea uma, tatou te faalagolago uma lava i lo tatou Tama Faalelagi mo mea uma (tagai Mosaea 2:21). Tatou te manaomia Lana taitaiga faifai pea, tausiga, ma le puipuiga.

Tatou te faalagolago foi le tasi i le isi. Talu ai ua tuuina mai ia i tatou meaalofa faaleagaga eseese, ua faamoemoeina i tatou e fefaasoaa’i mea ua tuuina mai ia i tatou, ina ia mafai ona faamanuiaina tagata uma (tagai MF&F 46:11–12). O le ki o le avea lea ma se tagata faalagolago ia te oe lava, lea ua ia i tatou le malosiaga e faia ai faapea, ina ia auauna atu i isi pe a mafai ai, ma tuuina atu i isi le faamanuiaga o le auauna mai ia i tatou, pe a manaomia ai.

O le tele o lo tatou faalagolago o i tatou lava ia i tatou—e le gata i le faaletino a o le faaleagaga—o le tele atu foi lena o lo tatou gafatia e avea ma se sui e faia le galuega mo le lelei. Na faamalamalama mai e Elder Hales faapea: O la tatou sini laualuga lava o le avea e faapei o le Faaola, ma e faalauteleina lena sini e ala i la tatou auaunaga lē manatu faapito i isi. E faateleina pe faaitiitia lo tatou tomai e auauna atu ai e ala i le maualuga o i ai lo tatou faalagolago ia i tatou lava.³

O se Tiutetauave Patino

Ua vaaia e Lui Quispe lona filiga ma le faalagolago i le Alii, i le tino mai o faamanuiaga faaletino o le galuega, o se tikeri mai le iunivesite, ma se aiga malosi. Ua ia mulimuli i le faamalosiauga a Spencer W. Kimball (1895–1985): “E leai se Au Paia o Aso e Gata Ai faamaoni, a o maua le malosi faaletino ma le faalelagona, o le a tuuina atu ma le loto i ai, le avega o le tausiga o ia lava po o lona auaiga i se isi tagata. Afai lava o loo ia mafaia, i lalo o le musumusuga a le Alii ma faatasi ma ana ia lava galuega, o le a ia sapalaia ia lava ma lona aiga i meaai faaleagaga ma faaletino o le olaga.”⁴

O le tele o lo tatou ola faalagolago o i tatou ia i tatou lava—e le gata i le faaleagaga ma le faaletino—o le tele foi lena o lo tatou agavaa e avea ma se sui e faia le lelei.