O Tamai Mamoe a Megan
O Julina K. Mills e nofo i Arizona, ISA.
“Galulue e auauna le tasi i le isi” (Mosaea 2:18).
“E tatau i manu ona galulue mo lo latou tausiga.” Na tagitagi pea upu a Papa i le mafaufau o Megan. Sa leoleo e taifau ia mamoe, ma sa tuu e moa ia fuamoa. E aumai e mamoe le fulufulu mamoe e faatau atu. Sa fesoasoani Megan i le seleina i tautotogo uma, ma e pei lava o latou fulufulu mafiafia o se kiona ua liusuavai i le laufanua lanumeamata.
Na ese ia tamai mamoe a Megan. O nai manu laitī na faatoa fananau i le tausaga ua te’a, ma e laiti tele e le lava o latou fulufulu e totogi ai lo latou tausiga. Na manao Papa e ave i latou i le fasimanu, peitai na gau le loto o Megan i nai pepe laitī ma le augavaivai. Sa ia aioi atu e tuu, ma sa iu ina ioe Papa. “Peitai,” sa ia lapataia o ia, “e tatau ona e tausia e oe lava ia.”
I le taimi muamua, sa lelei mea uma. Sa faaaoga e Megan lana tupe o lona aso fanau e faatau ai vaovao mago ina ua amata ona aai tamai mamoe. Ae o lea ua uma nei le tupe o lona aso fanau, ma sa fai atu Papa e taugata tele le tuu o tamai mamoe e tataa i le fanua sa ia lisiina i fafo atu o le taulaga. E le gata i lea, sa iloa e Megan o le a seasea ona vaai lea i ai pe a o i le fanua. Sa mapuea o ia a o tilotilo atu o lamulamu e tamai mamoe nai toe mea na totoe o le vaovao mago. E oo atu taeao ua uma, ma e tatau ona ia sailia se auala e fafaga ai ana mamoe.
Sa milimili e Megan ia fulu paepae o ulu o tamai mamoe a o ia faalagolago atu i le fale na tuu ai. I le isi pito o le auala na ia vaai atu ai ia Mr. Flowers o teu mai ana rosa. I nai fale i talaatu, sa setusetu lemu ane ai Mrs. Wilmot e aveatu lana meli. O Mrs. Wilmot o se fafine ua oti lana tane, ma e nofo na o ia. O nisi taimi e salu ai e le tuagane o Megan ia laulaau a Mrs. Wilmot, ae e tomumu lava o ia fai mai e le mafai e Mrs. Wilmot ona totogi o ia.
Sa matauina e Megan ua uumi le vao a Mrs. Wilmot. “O le a ou fai nei i ai ou te alu atu e moa lana vao,” o le manatu lea o Megan. “Ae e le faia nei. E tatau ona ou sueina se auala e fafaga ai au mamoe.”
Na faafuasei ona maua se manatu o Megan. E i ai le vao a Mrs. Wilmot, ae e i ai mamoe a Megan ua manaomia ona faatataa—ua matuai fetaui lelei! Sa vave popo e Megan ulu o ana mamoe ma tamoe loa i le fale o Mrs. Wilmot. Ina ua tatala mai e Mrs. Wilmot le faitotoa, sa ata fiafia o ia ia Megan, ona ua i ai sana asiasiga. Sa topetope mai le gutu o Megan a o ia faamatalaina lona manatu.
“Mrs. Wilmot, ou te manatu o le a manaia tele lea mo i ta’ua uma!” Na uma le tala a Megan. Sa to lona sela, ma faatalitali mo se tali.
“E manaia foi!” le tala a Mrs. Wilmot. “E mafai ona ou faaogaina i la’ua, e mafai foi e lo’u fanua ona faaaoga le la fesoasoani. Aumai muamua lava mamoe i le taeao a taeao.” Sa taufai ataata atu le tasi i le isi o Megan ma Mrs. Wilmot, ma alu fiafia Megan i le fale.
O le aso na sosoo ai o le amataga lea o se faigauo umi ma le matagofie. Na ave e Megan ana mamoe i le fale o Mrs. Wilmot i taeao uma a o lei alu i le aoga, ma o afiafi e nofo ai e talatalanoa mo sina taimi a o lei aveina ana mamoe i le fale mo le po. Sa tumau le maualalo o le vao a Mrs. Wilmot ma sa matuai lelei lava, ma sa maua foi e mamoe a Megan lo la taui mo lo la tausiga.
Ata na tusia e Guy Francis