Savali a Faiaoga Asiasi

Faatoaagaina Mai

Suesue ma le agaga tatalo i mea nei, ma pe a talafeagai ai, ia talanoaina ma tuafafine e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga. Mo nisi faamatalaga, alu i le reliefsociety.lds.org.

Faatuatua, Aiga, Toomaga

O lo tatou perofeta, o Peresitene Thomas S. Monson, ua uunaia i tatou e “aapa atu e laveai i latou, o e o manaomia la tatou fesoasoani ma siitia i latou i le alatele maualuga atu ma le ala sili atu ona lelei. … O le galuega a le Alii, ma pe a tatou i ai i le feau a le Alii, … ua tatou agavaa mo le fesoasoani a le Alii.”¹

I le tele o tausaga talu ai, na asia ai e LaVene Call ma lana soa o faiaoga asiasi se uso ua le toaga mai. Na la tuitui i le faitotoa, ma iloa ai se tina talavou o loo ofu lona ofu talaloa. Na foliga ma’i o ia, ae na vave ona laua iloa o lona faafitauli o le ava malosi. Na nonofo i lalo faiaoga asiasi ma talatalanoa ma le tina talavou o loo tauivi ma le faafitauli.

Ina ua la tuua le fale, na faapea la laua tala, “O ia o se afafine o le Atua. Ua ia i taua se tiutetauave e fesoasoani ia te ia.” O le mea lea na la asiasi soo atu ai ia te ia. O taimi taitasi, na mafai ona la lagonaina se suiga mo le lelei. Na la talosagaina le uso ina ia auai atu i le Aualofa. E ui ina sa musu o ia, ae na iu lava ina auai soo i sauniga. I le mavae ai o faamalosiauga, na auai o ia ma lona toalua ma la laua tama teine i sauniga lotu. Na lagonaina e le tane le Agaga Paia. Na ia faapea mai, “O le a ou faia le mea ua fautuaina mai e le epikopo.” O le taimi nei, ua malolosi lava i latou i le Ekalesia, ma ua mae’a ona faamauina i latou i le malumalu.²

Mai Tusitusiga Paia

3 Nifae 18:32; Mataupu Faavae ma Feagaiga 84:106; 138:56

Mai Lo Tatou Talafaasolopito

O le fesoasoani ia i latou, o e ua se ese ina ia toe foi mai i le talalelei a Iesu Keriso, ua avea pea lava ma vaega o le avea ai ma Au Paia o Aso e Gata Ai, ma se sui auai o le Aualofa. Na saunoa Peresitene Polika Iaga (1801–77) faapea, “Se i o tatou alolofa le tasi i le isi, … ma ia avea i latou o e o mafai ona pupula, e taitaia lē ua tauaso seia mafai ona latou vaaia le ala mo i latou lava.”³

O Eliza R. Snow, le peresitene aoao lona lua o le Aualofa, na faailoaina mai ma le agaga faafetai taumafaiga a uso i Ogden, Iuta, ISA, ina ia faamalosia e le tasi le isi. “Ua ou malamalama lelei faapea, o le tele o le taimi ma taumafaiga ua foai [i le tulaga o le auauna atu] lea e le mafai lava ona faamaumauina,” na ia saunoa ai. Peitai, i le iloa ai o loo tausia se tusi faalelagi o galuega a tamaitai, a o latou aapa atu ia i latou ua maalili o latou loto, na ia fai mai ai: “Na saunoa Peresitene Iosefa Samita o lenei sosaiete na faatulagaina ina ia faaolaina agaga. … O loo i ai se tasi tusi o loo tausia o lo outou faatuatua, lo outou agalelei, a outou galuega lelei, ma upu. … E leai se mea o misi”⁴

Faamatalaga

1. Thomas S. Monson, “O Le Valaau Paia e Auauna Atu,” Liahona, Me 2005, 54.

2. Tusi i le au peresitene aoao o le Aualofa mai le tama teine a LaVene Call.

3. Polika Iaga, i le O Afafine i Lo’u Malo: O Le Talafaasolopito ma le Galuega a le Aualofa (2011), 24.

4. Eliza R. Snow, i le O Afafine i Lo’u Malo, 116.

O Le a se Mea e Mafai Ona Ou Faia?

1. O ia te a’u ea le lototele e fai atu ai i se uso le toaga, ma te o i se fonotaga a le Aualofa?

2. O i ai ea i uso o loo ou vaavaaia le lagona mafanafana e tuuina mai ai ia te au fesili e uiga i le talalelei?

Ata na tusia e Robert Casey; vaaiga i tua atu saunia e Steve Bunderson