O Le Taua o le Aiga

O le aiga ua osofaia i le lalolagi o aso nei. O le mafuaaga lena ua matua taua ai, nai lo soo se isi lava taimi, le mauaina e fanau ma talavou o se molimau i le taua o le aiga i le fuafuaga a le Tama Faalelagi (tagai i le Mo Le Malosi o le Autalavou [2011], 14). I le itulau e 52 o lenei lomiga, o Ann M. Dibb, fesoasoani lua i le au peresitene aoao o Tamaitai Talavou, ua fautuaina mai auala e fesoasoani ai i talavou ia maua ni molimau e uiga i aiga.

Mo se faataitaiga, ua ia tusia, “A o outou faitauina le folafolaga i le [aiga], ia vaavaai mo mataupu autu, fautuaga, lapataiga, ma faamanuiaga folafolaina, ma o latou uiga ia te outou.”

Fautuaga mo le Aoao Atu o le Autalavou

Faitau le “O Le Aiga: O se Folafolaga i le Lalolagi” ma le vaega e uiga i le aiga i totonu o le Mo Le Malosi o le Autalavou. Talatalanoa e uiga i le auala e faatatau ai nei taiala i lou lava aiga. Mafaufau e faasoa atu lau molimau e uiga i le taua o le aiga.
Mafaufau i le faia o se afiafi faaleaiga e faatatau i le taua o le aiga (o se punaoa lelei o le autu lea o “Faaipoipoga ma Aiga” i le mataupu aoaoina fou a le autalavou i le lds.org/youth/learn).
Asiasi ane i le youth.lds.org. Filifili le “Mo Le Malosi o le Autalavou” ona sosoo lea ma le “Aiga” ina ia saili ai punaoa e fesoasoani ia te oe, e malamalama atili ai i le mataupu o le aiga: mau, ata vitio (tagai, mo se faataitaiga, “O Tama ma Atalii”), Alaleo o le Mamona i polokalama i le leitio, o fesili ma tali, ma tusiga, e aofia ai lauga a le Au Pulega Aoao.

Fautuaga mo le Aoao Atu o Tamaiti

O nisi nei o faataitaiga o auala atonu e mafai ona e mataituina ai le agaigai i luma o lou aiga i sini faaleagaga:

Aumai se tamai fagu malamalama. Faatasi ai ma lau fanau, faatu se sini e mafai ona ausia, lea o le a faamalosia ai lou aiga, e pei o le faia o afiafi faaleaiga i Aso Gafua taitasi, po o le faitauina o se aiga o tusitusiga paia i aso taitasi. Fai atu i tamaiti e faia se pepa e faaigoa ai le fagu, faatasi ai ma le sini ua tusia ai i luga. O taimi uma lava e faamae’aina ai e lo outou aiga le gaoioiga, ia tuu se tamai meafaitino, e pei o se mapu po o se isi mea i totonu o le fagu. A tumu loa le fagu, ona fuafua lea e sami e ala i le faia o se meaai faapitoa, po o se gaoioiga a le aiga.
Fai i tamaiti taitasi e tusi se ata o le aiga o loo faia se gaoioiga o aso faisoo e te manao e uunaia, e pei o tatalo faaleaiga po o le suesueina o tusitusiga paia. Faapipii ia ata i se mea e mafai e tagata uma ona vaai i ai. Amata le aso i le faau i luga o ata. Pe a uma ona faatinoina e lou aiga le gaoioiga o loo tusia i luga o le pepa, liliu le ata. O ata o loo mafai lava ona iloa, o le a faamanatu atu i lou aiga e uiga i a outou sini ma mea e mafai ona latou faia e faamalosia ai lou aiga i lena aso. Toe faau i luga ata i le amataga o aso taitasi.

Ia fesoasoani foi i lau fanau ia iloa faamanuiaga e o’o mai i lo outou aiga mo le faia o nei gaoioiga. O le fesoasoani ai i tamaiti e saili lagona lelei e oo mai e ala i le mauaina o le Agaga i lo outou aiga, o le a faateleina ai lou manao e mulimuli i mamanu o amioga amiotonu ia e faamalolosia ai aiga.

I le mulimuli ai i le fautuaga i totonu “O Le Aiga: O se Folafolaga i le Lalolagi” e mafai ona faamalolosia ma puipuia ai o tatou aiga.

Ata na tusia e Taia Morley