O Le Sefuluai e Faateleina ai le Faatuatua

Lourdes Soliz de Duran, Bolivia

E lei leva ona ma faaipoipo, ae o ma siitia atu ma lo’u toalua i se aai mamao ese i Bolivia sasa’e, lea na o i maua ai lava tagata o le Ekalesia. O lo’u toalua o se tagata fou liliu mai, ma sa ma mananao e usitaia poloaiga uma a le Alii.

I masina taitasi, ma te teuina ai la ma sefuluai i totonu o se teutusi seia mafai ona ma tuuina atu i lo maua epikopo. Sa i ai i lo’u toalua se naunautaiga malosi faapea, afai ma te ola e tusa ma lenei tulafono, o le a mafai ona faamanuiaina ma puipuia i maua.

Sa ma nonofo i se potu o se faletalimalo vevela, taugata, ma lē lelei, a o vaavaai mo se fale e mautotogi ai. Mo le tele o aso, na mautinoa ai o la ma sailiga ua le faamanuiaina. Na pau le fale na mafai ona maua mauaina, o se tamai fale, o lē ana ia e nofo i se isi aai. E toatele tagata mai fafo na taumafai e mautotogi i le fale, ae sa lē mafai lava ona latou maua le tagata e ana ia.

I se tasi taeao, ina ua faatoa uma ona ma tatalo e uiga i lo maua tulaga, na tuitui mai ai se alii talavou i le faitotoa. Na ia ta’u maia ia i maua faapea o le pule o le fale o loo asiasi mai mo se taimi puupuu. Na faanatinati atu lo’u toalua e feiloai ia te ia, a o faaauau ona ou tatalo ina ia ma mauaina le fale. Ina ua ia foi mai, na ia lipotia mai faapea ua ofo mai e le tamaitai le fale ia i maua, i se tau pa’ū lava. O le isi mea na sili ai lo ma olioli, o le tulaga ua uma ona faatotogaina le fale. I lena taimi, na pau lava mea na ia i maua, o pusa lapopo’a e lua ma se atopa’u e tumu i a ma meatotino.

O le tulafono o le sefuluai e le na o tupe e aofia ai, ae o le faatuatua. Sa lē tele se tupe na mauaina e lo’u toalua, ae a o ma totogiina ma le faatuatua a ma sefuluai, na faamanuiaina e le Alii i maua ina ia maua se fale lelei e nonofo ai, ma mafai e i maua ona maua mea mo i maua lava.