Mo Le Malosi o le Autalavou
E I Ai Sa’u Molimau e uiga i le Aiga
I tausaga ua mavae, na ou faalogo ai a o tuuina mai le molimau a se uso i la’u uarota. Ou te manatuaina le mea na ia faasoaina mai, ma le lagona na ou mauaina. Na faaalia e Tuafafine Reese lona agaga faafetai mo lona aiga amiotonu, ma le olioli ma le mafanafana na tuuina atu ia te ia e le malamalama e uiga i le faavavau o aiga. Sa ou lagonaina le Agaga o faamautu mai lo’u manao loloto ina ia maua lena faamanuiaga e tasi, ma se molimau e uiga i aiga.
Se i ou ofoina atu ni nai fautuaga e fesoasoani ai ia te oe ia maua se molimau o le taua o le aiga:
1. Saili ma le agaga tatalo le musumusuga a le Alii ma faamaumau ou faalogoga a o e suesue. Faapaia lou olaga e ala i le tausiaina o poloaiga. O lenei mea o le a fesoasoani ia te oe e agavaa ai mo le Agaga, lea o le a fesoasoani ia te oe i lau sailiiliga.
2. Faitau le “O Le Aiga: O se Folafolaga i le Lalolagi,”1 na uluai tuuina mai e se perofeta ua toeitiiti nei atoa le 20 tausaga talu ai. Ua faamalosia la’u molimau i perofeta, tagatavaai, ma talifaaaliga a o ou faitauina lenei pepa o faamatalaga ma mafaufau ai i suiga ua i ai nei i le lalolagi e tusa ai ma le aiga. A e faitauina le folafolaga, matau ia aoaoga faavae, fautuaga, lapataiga, ma faamanuiaga folafolaina ma le uiga ia te oe lava ia.
3. Suesue i upu a perofeta ma le Au Pulega Aoao. O a latou upu e musuia ma o le a faamanuiaina ai i latou o e talitonu ma mulimuli i ai. Mo se faataitaiga, na aoao mai e Peresitene Thomas S. Monson: “E tatau i le aiga ona umia lona tulaga aupito maualuga i o tatou olaga aua ua na o le pau lea o le faavae talafeagai e fausia ai e se sosaiete o tagata soifua le lumanai ma faatumauina ai tulaga faatauaina ua latou faapelepeleina i le taimi nei.”2
4. Suesue i tusitusiga paia. O loo i ai le mau faataitaiga o aiga ua fausia i luga o le faavae o le amiotonu, usiusitai, ma le faatuatua i le molimau ia Iesu Keriso. Faitau au tusitusiga paia, aemaise lava le Tusi a Mamona, faatasi ai ma le fesili, “O a aoaoga o le a faamanuiaina ai au pe a faaaoga i lo’u aiga i le taimi nei ma le lumanai?”
5. Suesue le Mo Le Malosi o le Autalavou, aemaise le vaega o le “Aiga”. Aoao e uiga i tiutetauave ma faamanuiaga o se aiga. Manatu i galuega e manaomia mo tagata taitasi o le au paia e fatufatu ma faatumauina se aiga soofaatasi, ma faatonugalemu i le talalelei. Ia iloa pe mafai faapefea ona faamalolosia sootaga i totonu o lou aiga. Vaavaai mo faamautinoaga ma le mafanafana o loo maua i le pusa i le itu taumatau.
E moni lava, o vaega uma i le Mo Le Malosi o le Autalavou e faiā tonu i sootaga faaleaiga ma faaleleia ai. A mulimulitai tagata taitasi o le au paia i tulaga faatonuina ma poloaiga, o le a faamanuiaina i latou i le mafutaga ma le Agaga Paia ma agavaa ai mo sauniga ma feagaiga paia o le malumalu ma o le a faamanuiaina ai aiga taitasi i le taimi nei ma le faavavau.
6. Faatino mea ua outou aoaoina i a outou suesuega ma faaaoga mea ua outou aoaoina i o outou aiga (tagai MF&F 88:119).
Ua ou faalogo i molimau faamomoiloto a tamaitai talavou sa galulue i le tulaga faatauaina lona tolu i le vaega o le natura paia o le Alualu i Luma o le Tagata Lava Ia, lea e talosagaina ai tamaitai talavou e faia se taumafaiga faapitoa e faamalolosia ai sootaga faaleaiga mo vaiaso e lua (e mafai e alii talavou ona maua se fuafuaga faapena i le Faataunuuina o Lo’u Tiute i le Atua [2010], 80–81). Na faasoa mai e se tamaitai talavou, “Ua ou vaai i se vavega. Ou te alofa i lo’u uso, ma sa tupu i le lua vaiaso! Ua ou faia o se sini e toe fai lenei mea mo tagata taitasi o lo’u aiga i tausaga taitasi. Aisea? Ona ua ou matua fiafia ai lava!”
7. Tatalo ma saili le faamautinoaga e ala i le Agaga i le taua o le aiga. Ia onosai ma mataala. O le a oo mai se molimau e ala i le Agaga aua “o le aiga ua faauuina e le Atua” ma “o le iunite aupito taua i le olaga nei ma le faavavau.”3
Ua ou iloa o le faia o nei mea o le a oo mai le aso o le a, e faapei ai o Sister Reese, o le a mafai ai ona e tu atu ma faasoa atu, “E i ai sa’u molimau e uiga i le aiga, ma o lenei iloa ua ou maua ai le mafanafana ma le olioli.”
Ata mai le Matagaluega o le Tautua Lolomitusi