O Le Fausiaina o Tu ma Aga o le Eseta e Totonugalemu ia Keriso

Saunia e Diane L. Mangum

Diane L. Mangum e nofo i Iuta, ISA.

I le taimi o le Eseta, tatou te faamanatuina ai le meaalofa a lo tatou Faaola: o le Togiola.

I le Aso Sa o le Eseta i le tele o tausaga talu ai, na sau ai la’u tama tama e fa tausaga o Peni, i le alasavali o lo matou falelotu, ina ua uma le Peraimeri, ma talotalo mai ma le fiafia le pepa na ia valivaliina. Na ia valaau mai, ma le fiafia tele, “Tina, Tina, na e faalogo e uiga i le Toetu?” Na ia manao e faamautinoa ua ou faalogo i le tala fiafia. O se mea na saunoa ai lona faiaoga o le Peraimeri, na aafia ai Peni, lea na matua olioli ai ma amata ona malamalama i le Toetu. E maeu le manaia, pe a mafai e i tatou uma ona lagonaina lena olioli i Eseta taitasi!

O le Togiola a Iesu Keriso, e aofia ai ma le Toetu, o le faavae lea o le Eseta. O le fausiaina o tu ma aga masani e totonugalemu ia Keriso, o le a fesoasoani ia i tatou e taulai atu ai i nei meaalofa a lo tatou Faaola.

O Tapuaiga i le Aso Sa ma Tu ma Aga Masani

E aunoa ma ni faigaai faaopoopo, o solo uumi i luga o ala, po o faafiafiaga, o i tatou o le Au Paia o Aso e Gata Ai, e tapuai faatasi i le Eseta e pei lava ona tatou faia i Aso Sa uma. O o tatou taitai faale-uarota ma paranesi, e fuafuaina failauga ma pese vailauga ia e taulai atu ia Iesu Keriso. E faatatau i le Aso Sa o le Eseta, na saunoa ai Elder L. Tom Perry o le Korama a Aposetolo e Toasefululua: “E lei faaalia manino mai e le Alii faiga masani faalelotu e pei o faigaai ma faafiafiaga e faamanatu mai ai ia i tatou faamanuiaga tatou te maua mai ia te Ia i aso nei. Ae ui i lea, o le faiga o tu ma aga masani ina ia faalatalata atili ai i tatou i le talatuu sili lea ua avea ma mea tatou te olioli ai, e tatau ona avea o se mea mo aiga uma e taumafai e faatumauina” (“Tu ma Aga Masani Faale Aiga,” Liahona, Me 1990, 20).

O tu ma aga masani eseese nei mai aiga, a o latou faailogaina le Eseta ma aumaia faatasi e pele ia i latou.

Fefaasoaa’i o Molimau i le Toetu o Keriso

Na amataina e Janice ma Kirk Nielson se “Po mo Matua o Matua” faapitoa, lea ua avea ma se aga masani i le Eseta, Na saunoa Tuafafine Nielson, “Ou te talitonu o le mea aupito sili ona lelei tatou te faia, i le avea ai ma matua o matua, o le o lea i fale o a tatou fanau ma nonofo i lalo faatasi ma fanau a fanau, ma faailoa atu ia i latou e i ai ni a tatou molimau e uiga i le Faaola.”
A o laiti la laua fanau, sa faaavanoaina ai e Hector ma Sherilyn Alba, se taimi i afiafi taitasi i le vaiaso atoa a o le’i oo i le Eseta, mo se lesona puupuu i mea na tutupu i le vaiaso mulimuli o le soifuaga o le Faaola.
O nisi aiga latou te asiasi atu i tuugamau o e pele ia i latou. Latou te talanoa ma a latou fanau e uiga i tagata o aiga ua maliliu, ma faaalia le agaga faafetai mo le Toetu o Iesu Keriso.

Ua avea le fuamoa ma se faailoga taatele o le Eseta, e faatusa i le Faaola ma le tatalaina o noataga o le oti e ala i Lana Togiola. O le mea lea, o le valiina ma le nanaina o fuamoa mo se sailiga fuamoa o le Eseta, ma le tuuina atu o ato o le Eseta, o aga masani taatele ia i le lalolagi atoa.

I Rusia, e masani ona faafeiloaia e le tasi tagata le isi i le aso o le Eseta e ala i le faapea atu, “Ua toetu Iesu.” Ona tali mai lea o le isi tagata, “E moni, Ua toetu o Ia.” I Alepania, e taitutusa lava lea aga, latou te faafeto’aia faatasi maa, pei o ni fuamoa lanumumu ma faapea, “Ua toetu Keriso.”
E faatauaina e Karen Spencer ia mea na te manatuaina e uiga i lona tinamatua Tanisi e faia i taimi o le faamanatuina o le Eseta, ma fiafia pea lava e vali fuamoa faatasi ma pa’u aniani lanuviole ua uma ona sakaina, e pei lava ona sa faia ai e lona tinamatua. Ua iloa e lona aiga o se taimi lelei lea e talanoa ai e uiga i le fuamoa, o se faailoga o le ola fou ma le Toetu.
O nisi aiga e i ai fanau laiti latou te fiafia e faia le sailiga fuamoa faatasi ma se savali. Latou te tuuina i totonu o se fuamoa se mea e avea ma faailoga, e fesootai ma le maliu ma le toetu o le Faaola ma se mau e faitauina. Ona latou faanumeraina lea o fuamoa i le faasologa o le tala o le Eseta. A o tatalaina e tamaiti fuamoa, o le a latou aoaoina le Togiola ma le Toetu o Keriso.

Fefaasoaa’i o Musika o le Eseta

E mafai e Musika ona aumaia se aafiaga sili ona manaia i o tatou luga i le Eseta

E fiafia Tavita ma Joyce Beer e sailia konaseti faatatau i le Eseta, ina ia fesoasoani ia i laua e manatua ai le taulaga a le Faaola.
O Tavita ma Nancy Harmon e fiafia e faalogologo i le pese a George Frideric Handel o le Mesia, lea e manatu Tuafafine Harmon “e sili atu ona faatatau i le Eseta nai lo le Kerisimasi.”
O se tasi tina e uunaia lana fanau, o loo i ai i vasega musika, e aoao e tātā se pese o le Eseta i lena masina.
O le aiga o Dale ma Sara Okerlund e faapotopoto i autafa o le piano, ma usuina viiga ma pese a le Peraimeri e uiga i le Eseta.

Aai Faatasi i se Toonai o le Eseta

O se toonai faaleaiga o se tasi lea tu ma aga masani taua tele o le Eseta i le lalolagi atoa.

O se tasi aiga e ‘ai le latou puaa faaasu ma talatalanoa e uiga i le auala na faataunuu ai e Keriso le Tulafono a Mose. O se isi aiga e ‘ai se i’a e manatua ai mea na taumafa e Iesu. O le aiga o Elisa ma Mikaele Pereira, e fai se latou toonai e aofia ai le mamoe, ma talatalanoa e uiga i le faatusa o le mamoe i le tala o le Paseka.
A mae’a le toonai a le matou aiga o le Eseta, matou te pu’eina se ata o tagata uma o le aiga ma isi uo pele, o e na matou aai faatasi. E i ai sa matou tusiata faapitoa o le Eseta, lea ua aofia ai le silia i le 30 tausaga o mea e faamanatu ai se aiga fiafia.
O se tasi ulugalii, o la laua fanau ua matutua, la te valaaulia isi uo matutua i se toonai faapitoa. O iina latou te fefaasoaa’i ai mea e manatua ai ma toe tomanatu ai i le uiga o le Eseta.
I nisi atunuu, o le aso malolo o le Eseta, e aofia ai le Aso Faraile ma le Aso Gafua. I Tahiti, o auaiga e masani ona faia se pikiniki faatasi i isi motu. I Amerika Tutotonu, o nisi Au Paia o Aso e Gata Ai, latou te faaaogaina le taimi faaopoopo e asiasi ai i o latou aiga, faia se taumafataga, ona o ai lea i le malumalu.

Faasoa atu Tu ma Aga Masani e Lē Faalelotu i se isi Aso

O aiga o le Au Paia o Aso e Gata Ai e masani ona faia isi gaoioiga e lē faalelotu, ia e aofia ai le Eseta i se aso e ese mai le Aso Sa.

I Pasila, i le Aso Faraile po o le Aso Toonai, a o le’i oo i le Eseta, o se tinamatua o le Au Paia o Aso e Gata Ai, na te tuuina se tasi po o le lua karoti ua aina i se nofoaga e faigofie ona iloa atu, ma nana fuamoa o le Eseta i autafa o karoti.
I le Aso Gafua pe a mavae le Eseta, e fiafia ai le aiga o Joyce ma Scott Hendricks e aai i fafo o le fale, ma fai ai ma se suega fuamoa faapitoa o le Eseta.

Ia Mafaufau ia Keriso i Taimi Uma i le Eseta

Aoao e uiga ia Iesu Keriso i taimi o le afiafi faaleaiga, faalogologo i musika o le Eseta, po o le fiafia i se taumafataga faapitoa e mafai ona aumai ai se siitiaga faaleagaga i tagata o soo se matua. O gaoioiga e faamanatu ai, e le tau manaomia le auai ai o se vaega toatele. O se aga masani o se faamanatuga o le Eseta i totonu o se aiga se tasi, po o se loto, e tutusa lava lona taua.

E mafai foi e i tatou ona manatuaina ma faamanatuina le olioli i le Eseta, e pei lava o Peni laititi, o le na sau i le falefaafiafia o le falelotu, ma le manao e faasoa mai le tala fiafia e uiga i le Toetu.