Digital Lamang
7 ka Yano nga mga Paagi sa Paggamit sa Teknolohiya alang sa Buhat sa Dios sa Kaluwasan ug Kahimayaan
Sa pito ka adlaw, makatabang ka nga mausab ang imong kaugalingon ug mausab ang kalibotan.1
“Gusto ba ninyong mahimong dakong kabahin sa labing dako nga hagit, sa labing dako nga kawsa, ug sa labing dako nga buhat sa yuta karon?”2
Niadtong Hunyo 3, 2018, si Presidente Russell M. Nelson nangutana niini atol sa debosyonal nga nagdapit sa mga indibidwal sa pag-apil sa batalyon sa Ginoo, o sa laing pagkasulti, sa pagpundok sa Israel.
“Gipadala kamo sa yuta niining tukma nga panahon, ang labing importanting panahon sa kasaysayan sa kalibotan, aron motabang sa pagpundok sa Israel,” miingon si Presidente Nelson. “Walay laing panghitabo dinhi sa kalibotan karon nga mas importante kay sa niana. … Kini mao ang misyon diin gipadala kamo dinhi sa yuta.”3
Nakahunahuna ba kamo kon giunsa sa Dios sa pagpanalangin nato og teknolohiya aron matabangan kita niini nga buhat?4 Samtang adunay daghang paagi sa paghimo niini, ania ang pito ka ideya nga mahimo nimong sulayan karong semanaha aron makasugod kamo sa tibuok kinabuhi nga partisipasyon sa buhat sa Dios sa kaluwasan ug kahimayaan. Hinumdomi nga kini mga ideya lamang aron matabangan ka sa pagpraktis. Mainampoong ikonsiderar kon hain sa mosunod nga mga ideya ug mga tumong—ug bag-ong mga ideya nga moabot nimo pinaagi sa pagpadayag—ang labing maayo alang nimo.
Adlaw 1: Pangita og mga Oportunidad sa Pagserbisyo
Sama ni Jesukristo, kita naningkamot sa pagserbisyo sa uban.
Pinaagi sa mga sulti-sulti, makadungog kita og lainlaing mga oportunidad sa pagserbisyo aron matabangan ang mga higala, pamilya, ug mga silingan. Sa tabang sa teknolohiya, makakita kita og daghan pang oportunidad sa pagtabang sa atong lokal nga komunidad o mga tawo sa tibuok kalibotan.
Karon, sulayi ang pagpangita og mga paagi sa pagpakigbahin sa Kristohanon nga gugma pinaagi sa pagserbisyo. Kon mahimo, pangita og kalihokan sa pagserbisyo nga buhaton karon o magpalista alang sa umaabot nga proyekto. Pagdapit og mga higala, pamilya, ug imong ward o branch sa pag-apil!
Kon dili ka segurado kon asa magsugod, ang JustServe.org tingali adunay pipila ka oportunidad sa pagboluntaryo diha sa imong dapit.
Hinumdomi unsay gitudlo ni Presidente Russell M. Nelson: “Bisan asa kita nagpuyo, ang mga miyembro sa Simbahan dako kaayo og pagbati mahitungod sa pagkaamahan sa Dios ug sa panag-igsoonay sa katawhan. Sa ingon niana, ang atong kinadak-ang kalipay moabot kon motabang kita sa atong mga kaigsoonan, bisan asa kita nagpuyo niiining matahom nga kalibotan.
“Ang pagtabang sa uban—ang paghimo og makahuloganong paningkamot sa pag-atiman sa uban sama o labaw pa kay sa pag-atiman sa atong kaugalingon—maoy atong kalipay. Modugang ko, ilabi na, kon dili sayon ug kon gikinahanglan nga mobuhat kita og dili kasagarang butang. Ang pagsunod nianang dako nga ikaduhang sugo mao ang yawe sa pagkahimong tinuod nga disipulo ni Jesukristo.”5
Adlaw 2: Pagtipig og Kasaysayan sa Pamilya
Gamit ang moderno nga teknolohiya, kita mahimong makatipig og kasaysayan sa atong kaugalingon ug sa atong mga katigulangan!
Karon, ikonsiderar ang paghimo sa usa sa mosunod: paghimo og digital nga naimprinta nga mga hulagway, pagrekord ug paghimo og digital nga mga istorya sa pamilya, pagsugod og digital nga journal, o pagkuha og mga litrato ug pag-bidyo sa importante nga mga handomanan.
Ang FamilySearch.org usa ka nindot nga tool nga magamit nato sa pagkompleto niini nga kalihokan. Si Elder David A. Bednar sa Korum sa Napulog Duha ka Apostoles mihulagway sa website sa FamilySearch isip naghupot og “usa ka koleksiyon sa mga rekord, mga kapanguhaan, ug mga serbisyo sayon nga ablihan gamit ang personal nga mga computer ug nagkalain-laing mga gamit, gihimo aron sa pagtabang sa mga tawo sa pagdiskobre ug pagrekord sa ilang family history.”6
Pinaagi sa FamilySearch.org, makita nato ang buhat sa templo nga kinahanglang himoon alang sa atong pamilya o mag-indeks sa mga datos aron matabangan ang uban nga makit-an ang mga rekord mahitungod sa ilang mga katigulangan.
Ang FamilySearch nga mga Handomanan ug FamilySearch Tree nga mga app makatabang usab niini nga mga paningkamot!
Adlaw 3: Makig-istorya sa mga Higala ug Pamilya
Ang pakighinabi niadtong atong gihigugma makatabang nila nga mobati nga bililhon ug malipayon. Pinaagi sa teknolohiya, kita makatawag, maka-text, o direkta nga makapadala og mensahe sa mga higala ug pamilya, bisan unsa pa sila ka duol o ka layo.
Karon, paggahin og higayon sa pagtawag o pagpadala og mensahe ngadto sa tawo nga nagkinahanglan sa imong kamabination, imong pasalamat, o tingali bisan sa pagpangayo og pasaylo.
Si Presidente Nelson miingon: “Karon, ako mohangyo kanato sa pagtagad sa uban sa mas labaw, mas balaan nga paagi. … ‘Kon adunay mga butang nga mahiyason, matahom, o maayo og dungog o dalaygon’ [Mga Artikulo sa Hugot nga Pagtuo 1:13] nga atong masulti mahitungod sa laing tawo … kana mao unta ang atong sumbanan sa komunikasyon.”7
Adlaw 4: Pagpakigbahin ug Pagdapit
Ang social media mahimong usa ka maanindot nga tool sa pagpakig-istorya ug sa pagpakigbahin og makapabayaw nga mga mensahe ug sa ebanghelyo ngadto sa tanang anak sa Dios.
Si Elder Gary E. Stevenson sa Korum sa Napulog Duha ka Apostoles miingon: “Ang mga miyembro sa Simbahan nagbarog isip mga saksi sa Dios sa tanan nga mga panahon, diha sa tanan nga mga butang, ug diha sa tanan nga mga dapit. Ang mga oportunidad sa paghimo niini diha sa internet gamit ang kaugalingong hinimo nga makadasig nga sulod o ang pagpaambit og makabayaw nga sulod nga giandam sa uban walay kataposan. Kita mopamatuod kon kita mohigugma, mopaambit, ug modapit bisan diha sa online. Ang inyong mga tweet, direkta nga mga mensahe, ug mga post magpakita og mas taas, mas balaan nga katuyoan kon kamo mogamit usab sa social media sa pagpakita kon sa unsa nga paagi nga ang ebanghelyo ni Jesukristo mihulma sa inyong kinabuhi.”8
Karon, mahimo natong sulayan ang pagpakigbahin sa atong pagpamatuod kang Jesukristo, makapabayaw nga kinutlo, o bag-ong pakigpulong gikan sa kinatibuk-ang komperensiya nga makapadasig. Ang makapalig-on nga mga kanta o mga painting nindot usab nga mga opsiyon nga ipakigbahin.
Si Elder Bednar mipakigbahin, “Ako moawhag kaninyo sa paglukop sa yuta sa mga mensahe nga puno sa pagkamatarong ug kamatuoran—mga mensahe nga tinuod, makapalig-on, ug dalaygon—ug tinuod nga molukop sa yuta ingon sa usa ka lunop.”9
Adlaw 5: Pagpalambo sa Pagbarog pinaagi sa Kinaugalingong Paningkamot
Aron makabarog pinaagi sa kinaugalingong paningkamot, usahay magkinahanglan kita og tabang gikan sa gawas nga mga tinubdan.
Karon, makahimo kita og usa ka butang aron mapalambo ang atong pagbarog pinaagi sa kinaugalingong paningkamot. Pananglitan, mahimo natong ikonsiderar ang pagpalig-on sa atong pagpamatuod mahitungod sa piho nga hilisgotan o ang pagkat-on kon unsaon ang pag-ayo sa gamayng buslot sa ligid. Mahimo natong pilion ang paghunahuna kon unsaon sa pagluto og pagkaon alang sa grupo o paningkamotan ang mga kahanas nga gikinahanglan sa gipangandoy nga trabaho. Bisan unsa pa ang imong pilion, planoha ang pagsugod sa pagpaningkamot niini, ug hunahuna kon sa unsang paagi nga ang teknolohiya makatabang nimo.
Ang mga higala ug mga sakop sa pamilya mahimong maayo nga mga kapanguhaan sa pagkat-on og bag-ong butang. Bisan pa man, usahay kita walay tawo nga kadangpan alang sa tabang. Bisan kon importante nga susihon kon ang website kasaligan, makakita kita og mga bidyo kon unsaon sa paghimo o han-ay nga mga instruksiyon gamit ang dali nga pag-search.
Samtang maningkamot kita sa pagpalambo sa pagbarog pinaagi sa kinaugalingong paningkamot kalabot sa ebanghelyo ni Jesukristo, mahimo kita nga mobasa sa mga kasulatan; mga pakigpulong ug mga debosyonal; Dali, Sunod Kanako nga mga manwal; mga magasin sa Simbahan; ug daghan pa. Kining tanan anaa sa ChurchofJesusChrist.org ug diha sa Librarya sa Ebanghelyo nga app. Aduna usab kini mga feature sa paghimo og mubo nga mga sulat, pag-highlight, o pag-bookmark sa mga kinutlo ug sa mga pahina nga makatabang nato. Dayon, kinasingkasing kita nga mag-ampo alang sa Espiritu nga mopamatuod sa kamatuoran sa unsay atong gibasa ug alang sa personal nga pagpadayag gikan sa Dios.
Si Elder Hugo E. Martinez sa Seventy nag-ingon: “Ang tinguha nga makabarog pinaagi sa kinaugalingong paningkamot usa ka bahin sa atong buluhaton subay sa dalan balik sa Langitnong Amahan ug sa Iyang Anak, nga si Jesukristo. Molig-on kini sa atong hugot nga pagtuo kang Jesukristo ug makalipay nga mobugkos kanato ngadto Kaniya pinaagi sa mga pakigsaad ug mga ordinansa sa kaluwasan ug kahimayaan. Ang pagbarog pinaagi sa kinaugalingong paningkamot usa ka doktrina sa ebanghelyo ni Jesukristo, ug dili usa ka programa. Usa kini ka tibuok kinabuhi nga proseso, ug dili usa lang ka hitabo.”10 Kon gamiton sa maalamong paagi, ang teknolohiya makatabang nato nianang tibuok kinabuhi nga paningkamot sa pagpalambo sa pagbarog pinaagi sa kinaugalingong paningkamot.
Adlaw 6: Pagpadayon sa Atong Edukasyon
Karon, mahimo kitang mosulay sa pagkat-on og bag-ong butang. Pagpili og hilisgotan nga makapainteresado ug pagbasa og artikulo, tan-aw og bidyo, o paminaw og podcast. Tan-awa kon aduna bay bag-ong mga mensahe gikan sa mga propeta ug apostoles mahitungod niana nga partikular nga hilisgotan. Hunahunaa ang pagpakigbahin niining bag-ong nakaplagan nga impormasyon ngadto sa laing tawo!
Ang mga ideya mahimong maglakip sa pagkat-on og bag-ong pinulongan o pagpalawom sa panabot bahin sa pang-espirituwal o pang-akademiya nga hilisgotan.
Si Presidente Nelson miingon, “Ang inyong edukasyon importante gayod—kanamo, kaninyo, ug sa Dios.”11
Ang laing mga posibilidad aron makapadayon sa edukasyon mahimong maglakip sa pag-enrol sa mas taas nga edukasyon. Daghang kolehiyo ug mga unibersidad ang nagtanyag og online nga mga kurso alang sa mga degree. (Ang BYU–Pathway Worldwide usa ka maanindot nga kapanguhaan sa pagkat-on og online nga degree sa maabot ra nga presyo!) Pipila sa mga website mahimong nagtanyag pa gani og libreng mga kurso. Kalabot sa pagpalambo sa atong pagbarog pinaagi sa kinaugalingong paningkamot, makadangop kita ngadto sa kasaligan nga mga website aron matabangan kita sa pagkat-on og bag-ong butang aron makaapil sa tibuok kinabuhi nga pagkat-on.
Adlaw 7: Pamalandong
Sa kataposan nga adlaw niining pito ka adlaw nga pagplano, hunong kadali ug pamalandong. Sa unsang paagi ka nilambo ug nausab samtang nagtutok ka sa paggamit sa teknolohiya isip kabahin sa buhat sa Dios sa kaluwaan ug kahimayaan? Unsa ang imong nakat-onan mahitungod sa teknolohiya? Sa mga panahon sa imong paggamit sa teknolohiya, sa unsang paagi nga nakatabang kini kanimo sa pagpundok sa Israel?
Irekod ang imong mga hunahuna ug mga ideya diha sa papel o sa online aron mahinumdoman ang unsay imong nakat-onan.
Sa atong pagpalambo sa atong abilidad sa paggamit sa media sa pagpadayon sa buhat sa Dios, mahimo kita nga ehemplo nga sundon sa uban.
Sa Mateo 5:14–16 nag-ingon:
“Kamo mao ang kahayag alang sa kalibotan. Ang siyudad nga mahimutang sa ibabaw sa bungtod dili gayod mahisalipdan.
“Ang mga tawo dili usab magdagkot ug suga aron ibutang kini sa ilalom sa gantangan, kondili sa ibabaw sa tongtonganan; ug kini magaiwag kanilang tanan nga anaa sa sulod sa balay.
“Pasigaa ninyo ang inyong kahayag sa atubangan sa mga tawo aron makita nila ang inyong mga maayong buhat ug dayegon nila ang inyong Amahan nga anaa sa langit.”
Ang pagpakigbahin sa kahayag ni Jesukristo mao ang usa ka butang nga atong mahimo sa tibuok natong kinabuhi. Nganong dili man gamiton ang mga kapanguhaan nga gihatag sa Dios nato aron mapadayon ang Iyang buhat?