Digital Lamang: Mga Young Adult
Ang Social Media Nakabalda ba Nimo gikan sa Unsay Labing Mahinungdanon?
Ang pagkat-on sa paggamit sa social media sa mas maalamon nga paagi nakatabang nako nga mas makatutok kang Jesukristo.
Usahay morag medyo mabalda ko.
Dinhi sa Peru, adunay mga parte sa among kultura nga makabalda namo gikan sa pagsunod sa Manluluwas ug sa Iyang ebanghelyo. Pananglitan, daghang Peruvian ang kasagaran mabalda sa pag-party ug pag-inom-inom—sagad kinahanglanon kini kon gusto ka nga adunay sosyal nga kinabuhi.
Ang labing dako nga makabalda alang nako, bisan pa man, mao ang social media.
Ang Pagpanglimbasog sa Social Media
Ang teknolohiya nindot nga himan alang sa komunikasyon ug pagkat-on. Apan alang sa pipila nato, mahimo kining makaadik. Tingali naggahin kita og mga oras sa paghan-ay sa atong mga profile sa social media, sa pagtan-aw sa mga bidyo, ug sa pagkomentaryo sa mga post.
Samtang sayon ra nga mag-online kanunay karong panahona, si Sister Rebecca L. Craven, kanhi Ikaduhang Magtatambag sa Kapangulohan sa Young Women, mitudlo: “Kini nagkinahanglan og paningkamot aron magpabiling nakapokus sa unsay tinuod gayod nga mahinungdanon alang sa malungtarong kalipay. … Ako modapit sa matag usa kanato nga mainampoong ikonsiderar kanang mga butang nga makabalda nato gikan sa paghimo sa unsay labing [mga] mahinungdanon.”1
Ug tinuod kini! Usahay modangop ko sa social media aron mabalhin ang akong gitutokan gikan sa butang nga lisod o mangita og pangatarongan gikan sa mga bidyo ug mga komentaryo.
Kon mahitabo kini, mohunong ko ug mangutana sa akong kaugalingon, “Nagpokus ba ko sa espirituhanon nga mga butang sama sa akong gihimo sa social media?”
Si Bishop W. Christopher Waddell, Unang Magtatambag sa Presiding Bishopric, mipasidaan nato mahitungod sa pagbaton og mga dios-dios, sama sa social media, nga mopalayo nato gikan sa Ginoo. Siya mipahinumdom nato nga ang atong bayani “mao si Jesukristo, ug ang bisan unsa, o bisan kinsa, nga makasamok nato gikan sa Iyang mga pagtulon-an … negatibong makaapekto sa atong kauswagan diha sa dalan sa pakigsaad.”2
Unsay atong mahimo sa pagseguro nga nagatutok kita sa unsay labing mahinungdanon?
Pagprayoridad sa Unsay Labing Mahinungdanon
Ang social media dili tanan daotan. Oo, mahimo kining tinubdan sa pagkanegatibo ug panagbingkil. Apan nakabaton ko og maayong mga higala gikan sa tibuok kalibotan pinaagi sa akong mga plataporma sa social media. Nindot usab kini nga himan sa pagpakigbahin ug sa pagdawat og mga mensahe sa ebanghelyo, sa pagpangita og bag-ong mga resipe, o sa pagkuha og mga ideya sa paghimo og mga craft.
Apan importante nga hinumdoman ang unsa gayod ang atong mga prayoridad. Kon bahin sa social media ug ubang mga paggamit sa atong panahon, si President Dallin H. Oaks, Unang Magtatambag sa Unang Kapangulohan, miingon: “Siyempre maayo ang pagtan-aw og nindot nga salida o ang pagkuha og makalingaw nga impormasyon. Apan dili tanan niana nga matang takos sa bahin sa atong kinabuhi nga atong gihatag sa pagkuha niini. Ang ubang mga butang mas maayo, ug ang uban pinakamaayo.”3
Ingon nga kita kinahanglang mopakaon sa atong kaugalingon og balanse nga pagkaon sa dili pa ang dessert, kita kinahanglang mopakaon usab sa atong kaugalingon sa espirituhanong paagi sa dili pa mogahin og panahon sa social media.
Sama sa gitambag ngari nato ni Presidente M. Russell Ballard (1928–2023) sa Korum sa Napulog Duha ka Apostoles, “Hinumdomi unsa ang labing mahinungdanon”: ang atong mga relasyon ngadto sa Langitnong Amahan ug ni Jesukristo, sa atong pamilya, sa atong mga silingan, ug sa atong kaandam sa pagsunod sa mga pag-aghat sa Espiritu ug makabig ngadto sa Ginoo.4
Ang Gahom sa Pag-ampo
Ang mga kasulatan nagtudlo nato nga mahimo kitang makig-istorya sa Langitnong Amahan mahitungod sa bisan unsa nga butang ug Siya sa kanunay motabang sa paggiya nato diha sa sakto nga dalan: “Pagpakigtambag sa Ginoo sa tanan nimong buhaton, ug moagak siya kanimo alang sa kaayohan” (Alma 37:37).
Sa higayon nga ako adunay mga pagsulay nga sagubangon o mga desisyon nga pagahimoon, modangop ko ngadto Kaniya. Ug tungod kay ang usa sa akong labing dako nga mga panglimbasog mao ang kon unsa kadako sa panahon sa akong kinabuhi ang igahin ngadto sa social media, Siya ang hingpit nga tinubdan sa tabang alang niana usab.
Gustohon man nato o dili, ang social media usa ka dakong parte sa atong mga kinabuhi, mao nga ang pagwagtang niini sa hingpit tingali dili posible. Apan makakontrolar kita kon unsaon nato kini sa paggamit—unsay atong pilion nga tan-awon o unsay atong ipakigbahin ngadto sa kalibotan.
Pangutana sa Langitnong Amahan kon unsa nga mga lagda ang kinahanglan nimong sundon aron matabangan ka nga mas makatutok sa unsay labing mahinungdanon. Sa dihang gibuhat ko kini, Siya mitabang nako nga masayod kon unsa nga mga matang sa mga pangutana ang akong ipangutana sa akong kaugalingon sa dili pa mag-post aron sa pagseguro nga akong gihimo ang social media nga usa ka espirituhanong luna alang nako.
Siya molig-on usab ninyo samtang magsugod kamo sa pag-ugmad og mas maayo nga mga kinaiya. Pag-ampo alang sa tabang, ug Siya mohatag niini kaninyo. Tungod kay kon ang Ginoo mosugo nato sa paghimo sa usa ka butang, Siya motabang nato nga matuman kini (tan-awa sa 1 Nephi 3:7). Siya motabang nato nga mabuntog ang mga kalisdanan ug magpadayon sa unahan.
Pag-ugmad og Mas Maayo nga mga Kinaiya
Sa hinay-hinay, naghimo ko og mga kausaban sa akong kinabuhi. Kasagaran usa ko ka tawo nga mobangon ug mokuha dayon sa akong selpon. Apan bag-ohay lang naningkamot ko nga unahon ang Ginoo. Akong giseguro nga mag-ampo, magbasa sa akong mga kasulatan, ug mogahin og panahon uban sa akong pamilya sa dili pa mogamit sa akong selpon.
Kon nanglimbasog kamo gikan sa pagkabalda sa social media, ikonsiderar ang pagtakda og mga tumong sa pagdumala sa inyong oras. Pagbutang og limitasyon sa inyong paggamit sa social media ug tumana kana nga mga utlanan. Paghimo og mga tumong nga kompletohon una ang ubang mga buluhaton. Pananglitan, modesisyon nga kinahanglang mobasa ka og usa ka kapitulo sa Basahon ni Mormon o limpyohan ang imong kwarto o mag-jogging sa dili pa mohikap sa imong selpon. Isulat kanunay ang imong klaro nga mga tumong ug mopadayon sa pagsubay sa imong kalamboan.
Kon kita mopili gayod sa paggamit sa social media, kinahanglang maningkamot kita sa pagpakigbahin ug sa pagtan-aw lamang sa mga butang nga makadasig. Si Elder David A. Bednar sa Korum sa Napulog Duha ka Apostoles misugyot nga kita magmatinuoron ug mogamit sa social media nga mahimong mga ehemplo ni Kristo.5
Pinaagi sa social media, imong madan-agan ang mga kinabuhi sa uban pinaagi sa kahayag ni Kristo niining makalibog nga kalibotan. Pagmatngon ug pag-amping, ug gamita kini alang sa kaayohan, dili sa daotan.
Ug sa kanunay, sa kanunay pilia ang unsay labing mahinungdanon—ang imong mga relasyon ngadto sa Langitnong Amahan, sa Manluluwas, ug sa imong pamilya—og una.