Digital Lamang: Mga Young Adult
Pagkonektar sa Espiritu sa usa ka Dapit nga Dili Espirituhanon
Atol sa akong pagserbisyo sa militar sa South Korea, nalayo ko sa Simbahan, apan pipila ka butang naghimo nga padayong lig-on sa akong pagtuo.
Sa nagtubo ko sa South Korea, sa kasagaran ako lang ang bugtong miyembro sa Ang Simbahan ni Jesukristo sa mga Santos sa Ulahing mga Adlaw sa akong mga higala ug mga klasmeyt. Usahay lisod ang pagpasabot kon nganong dili ko mobuhat sa samang gipangbuhat sa akong mga higala, apan ang pagbarog sa akong mga gituohan sa kanunay ingon og naglig-on sa akong pagtuo.
Apan, dihang nahimo na ko nga young adult, nag-atubang ko og mas daghang tentasyon ug napahimutang sa usa ka palibot nga layo sa Espiritu nga wala pa nako masulayi sukad.
Usa ka Dapit nga Layo sa Espiritu
Sa South Korea, ang mga lalaki nga young adult gikinahanglan nga moserbisyo sa militar sulod sa pipila ka tuig. Dihang diha na ko sa tunga-tunga sa akong pagserbisyo sa militar human makaserbisyo sa akong misyon, mibati ko nga mas nag-inusara sa akong gituohan sukad—tungod sa daghang rason.
Ang usa, lisod ang mabulag gikan sa mga miyembro sa Simbahan ug sa akong pamilya, apan ang laing lisod kon ikaw mapalibotan og mga butang nga supak sa atong mga sumbanan. Sama pananglit, ang alkohol naa bisan asa sa South Korea, ilabi na sa militar. Human sa mga pag-drill komon ra sa tanan nga mag-abot aron mag-inom-inom. Dihang nahibaloan nilang dili ko moinom og alkohol, gibuhat nila ang bisan unsa nga ilang mahimo sa pagpugos kanako. Sa ilang mga mata, dili lang kay nagtuman ra ko sa akong gituohan—nagsupak ko sa kultura.
Sa walay swerte, komon ra usab sa akong kaubanang mga sundalo ang paghisgot mahitungod sa mga kababayen-an sa kalibotanon ug sekswal nga paagi nga naghimo nakong dili komportable. Lisod ang makadungog nila nga molitok og ngil-ad nga pulong matag adlaw. Dugang pa, dili ko makasimba, dili makaambit sa sakramento, dili makatambong sa templo, o makahimo og daghan nga bisan unsa nga may kalabotan sa ebanghelyo atol niini nga panahon.
Sa makadiyot, mibati ko og grabeng pag-inusara ug naghunahuna unsay akong mahimo aron mobati sa Espiritu ug ipadayong lig-on ang akong pagtuo. Unsaon nako sa pagbarog sa balaang mga dapit kon wala koy laing kapilian?
Ang Ginagmayng mga Butang
Pagkataod-taod human sa mga panglimbasog, mihukom ko nga kinahanglan nakong akoon ang responsibilidad alang sa pagbati sa Espritu, bisan naa sa kalibotanong palibot. Usa ka butang nga nakatabang nako mao ang pagdala sa akong mga kasulatan nga akong gigamit sa akong misyon atol sa akong pagserbisyo. Tinuod gayod nga ang ginagmayng naandan nga buhaton matag adlaw—pagbasa sa mga kasulatan, pag-ampo, ug pagpangita og mga oportunidad nga makaserbisyo ug mas magmahimong sama sa Manluluwas—ang naghimo natong padayon nga konektado sa Espiritu.
Usa ka adlaw nabasahan nako ang 1 Mga Taga-Corinto 10:13, nga nag-ingon, “Kay ang Dios motuman gayod sa iyang saad ug dili siya motugot nga tintalon kamo labaw sa inyong madaog. Sa panahon nga tintalon kamo, maghatag siya kaninyo ug kusog aron kamo makalahutay ug unya makalingkawas gikan niini.”
Samtang nagbasa niana nga kasulatan, akong naamgohan nga bisan og mibati ko nga nag-inusara, ang Langitnong Amahan nagauban kanako. Kon padayon ko nga magpakitabang Kaniya ug sa akong Manluluwas, Ila kong tabangan nga makakita sa paagi aron matinud-anong makalahutay sa akong pagserbisyo sa militar ug mopauli dala ang usa ka pagpamatuod nga mas lig-on pa kay sa kaniadto.
Paghinumdom kon si Kinsa Ako
Ang mga kasulatan nahimong usa ka suporta kanako atol niini nga panahon dihang nalayo ako sa simbahan ug sa ubang mga miyembro. Ang pagpakigsulti sa akong Langitnong Amahan matag adlaw ug ang pagbasa sa akong mga kasulatan naghimo nakong konektado Kaniya ug nagpahinumdom kanako sa akong balaanong pagkatawo, nga maoy laing paagi aron makalahotay sa espirituhanong paagi.
Ang paghinumdom nga pinalangga ako nga anak sa langitnong mga ginikanan naghimo sa akong pundasyon sa pagtuo nga lig-on, ilabi na dihang nag-atubang ko og tentasyon.
Si Elder Alan T Phillips sa Seventy bag-o lang mitudlo nga: “Gusto si Jesukristo nga kamo makaila ug makabaton og relasyon sa inyong Amahan sa Langit. …
“Kamo Iyang anak. Kon mobati kamo nga nahisalaag, kon kamo dunay mga pangutana o kulang sa kaalam, kon naglisod kamo sa inyong mga kahimtang o nakigbisog sa espirituwal nga mga baroganan, dangop ngadto Kaniya. Pag-ampo Kaniya alang sa kahupayan, gugma, mga tubag, ug direksyon. Bisan unsay gikinahanglan ug bisan asa kamo, ibubo ang inyong kasingkasing ngadto sa inyong Langitnong Amahan.”1
Bisan og dili kamo makatambong sa templo, sa simbahan, o makaambit sa sakramento sa bisan unsang hinungdan, ang paghinumdom sa inyong pagkatawo kanunay nga maghatag og paagi nga kamo makonektar sa Espiritu ug mapalawman ang inyong relasyon ngadto sa Langitnong Amahan ug ni Jesukristo.
Kanunay Kitang Dunay Akses sa Kabalaan
Dihang nahuman na ko sa akong pagserbisyo sa militar, giprayoridad nako ang espirituhanong mga kinaiya labaw kay sa kaniadto. Ang makatambong sa templo, pag-ambit sa sakramento, ug hingpit nga paghatag og panahon sa ebanghelyo usa ka sukwahi kaayo nga palibot kay sa akong nahimutangan sa milabayng duha ka tuig. Karon gibati ko na ang kahingpitan sa mga panalangin, kahupayan, ug kalipay nga gitanyag sa ebanghelyo ni Jesukristo kanato. Ug nalipay ko nga nagpabilin ako nga matinud-anon hangtod nga kini nahimong posible.
Kon ugaling maanaa man kamo sa mga kahimtang nga kamo kinahanglang mobarog sa mga dapit nga dili kaayo balaan, hupti ang inyong pagtuo. Nakat-on ko og labihan kadaghan mahitungod sa pagtanom sa atong mga binhi sa pagtuo sa gahi nga yuta ug pagtugot niadtong mga gamot nga makagamot pag-ayo aron makasagubang kita sa mga tentasyon ug sa mga hagit sa kalibotan.
Bisan unsa kangitngit ang inyong palibot o ang inyong mga kalisdanan sa ubang panahon, ayaw kalimti nga aduna kamoy kanunay nga akses sa langit pinaagi sa pag-ampo, pinaagi sa mga kasulatan, ug pinaagi sa gasa sa Espiritu Santo.
Sama sa bag-o lang gitudlo ni Elder Joaguin E. Costa sa Seventy: “Unsa may nakahatag [kanato] og gahom sa pagpadayon sa malisod nga mga butang? Unsa may nakahatag og dugang nga kalig-on sa pagpadayon bisan ang tanan mora og nangawala?
“Akong nakaplagan nga ang tinubdan niana nga kalig-on mao ang hugot nga pagtuo diha ni Jesukristo samtang tinuyo nga magtinguha kita sa pagduol ngadto Kaniya sa matag adlaw.”2
Bisan asa kamo nagbarog, kon naningkamot kamong makasunod ni Jesukristo ug maghupot sa inyong pagtuo, ang bisan asa nga dapit mahimo nga usa ka balaang dapit diin madawat nimo ug mapaambit ang Iyang kahayag.