Digital Lamang: Mga Young Adult
Ang Pagbarog sa Balaang mga Dapit Tinuod bang Makahimo og Kalainan?
Ang pagbarog sa dili balaang mga dapit dili mahimong problema kon dili ako mohimo og bisan unsang dili balaan … sakto ba?
Sa tin-edyer pa ko, ang akong mga silingan mipaila kanako ug sa akong pamilya sa Ang Simbahan ni Jesukristo sa mga Santos sa Ulahing mga Adlaw. Misangpot kadto sa akong pagpabunyag, dayon ang pipila sa akong mga igsoon nagpasakop, ug sa ngadto-ngadto ang akong mga ginikanan usab. Dili kaayo daghan ang miyembro sa Simbahan sa akong dapit sa India, mao nga maanindot nga adunay lig-ong pundasyon sa suporta gikan sa akong mga minahal sa balay. Naghimo kining sayon aron magpadayong lig-on ang akong pagtuo.
Apan dihang miuli ko gikan sa akong misyon, nakatrabaho ko ug nalayo sa akong pamilya. Nagpuyo ko og apartment sa lahi nga dapit, nga dunay mga kaubanan sa kwarto nga lahi kaayo og mga sumbanan kay kanako.
Ang akong mga katrabaho nagpakabuhi usab og lahi kaayo nga kinabuhi kay sa akoa. Maglingaw-lingaw sila matag kataposan sa semana pinaagi sa pag-inom-inom ug pag-party, ug dapiton ko nila sa pag-apil. Dili gusto nga maanaa sa palibot nga ingon niana, kanunay kong mobalibad sa ilang mga pagdapit.
Apan, sa kataposang semana human sa lain na usab nga kataposang semana, dihang naglingkod kong nag-inusara sa akong kwarto ug momata matag Dominggo aron mosimba nga ako ra, nagsugod ko sa pagkawad-an og kadasig.
Pagbati nga Nag-inusara
Bisan og mibalibad ko sa unang mga pagdapit nga mogawas kuyog sa mga kaubanan nako sa trabaho, mibati ko og kasina—ingon og lingaw sila. Nabantayan nako nga ang panaghigalaay nga ilang napalambo sa ilang pagpanggawas ingon og nakatabang nila nga makapadayon sa ilang mga trabaho.
Mibati ko nga sama sa hilom, laay nga kauban sa trabaho nga walay laing nakaila.
Usa ka kataposan sa semana naluya na ko sa pagbati nga pag-inusara. Mao nga mihukom ko nga mokuyog nila dihang mihangyo sila. Gidepensahan nako ang akong desisyon pinaagi sa paghukom nga dili ko mosulay og bisan unsa nga alkohol.
Giingnan nako ang akong kaugalingon, “Bisan og naa ko sa dili balaang dapit, ang pagkaanaa didto dili makaunsa nako kon wala koy gihimo nga dili balaan, di ba?”
Nagkaanam og Kalayo sa Dios
Dihang nagsugod ko sa paggawas kuyog sa akong mga kaubanan sa trabaho, anam-anam ko nga nausab. Gabii na kong mauli sa Sabado sa gabii, nga miresulta nga makatulog na ko nga magsimba matag Dominggo.
Bisan og dili ko moinom og alkohol, wala ko magbarog sa balaang mga dapit. Sa pisikal, wala ko moadto sa simbahan. Sa espirituwal, wala ko maghunahuna mahitungod sa ebanghelyo o mihimo og panahon para sa Langitnong Amahan. Gipulihan nako ang akong pagsimba sa mga party. Wala ko magbilin og luna alang sa Espiritu sa akong kinabuhi.
Usa ka adlaw, ningmata ko ug nakaamgo unsa na kalayo ang akong pagdistansya sa Langitnong Amahan. Sa kataposan mibati ko nga ingon og akong nasabtan ang termino nga “diosnong kasubo” (2 Mga Taga-Corinto 7:10). Ang akong hunahuna ug kasingkasing puno sa kasakit.
“Unsa kining akong gihimo?” Naghunahuna ko. “Dini kini ako.”
Bisan mogawas ko matag kataposan sa semana, wala ko mobati og kalipay.
Nasayod ko nga kinahangalan kong mobalik sa pagbuhat sa akong naandan inubanan sa akong pagtuo. Nagkinahanglan ko nga maghinulsol.
Pagpili nga Mobarog sa Balaang mga Dapit
Naghunahuna ko sa una nga ang paghinulsol usa ka masakit, lisod nga proseso, puno sa pagbati nga sad-an ug kaulaw. Apan pinaagi niini nga kasinatian, akong nakat-onan nga ang paghinulsol mao ang proseso nga tugotan si Jesukristo nga mousab sa atong kinaiya ug motabang nato sa pagkahimong “bag-o nga mga linalang” (Mosiah 27:26).
Sa kataposan, ang paghunahuna kang Jesukristo ug sa Iyang Pag-ula ang nakatabang nako sa paghinumdom kong kinsa gayod ako, sa mga pagpili nga gusto nakong himoon, ug sa mga palibot nga gusto nakong maanaa.
Nagsugod ko sa pag-ampo sa unang higayon sulod sa mga bulan. Mihunong ko sa pagkuyog sa pangpanglaag sa akong mga kaubanan sa trabaho. Mibalik ko sa pagsimba. Mas kanunay na nakong gibasa ang Basahon ni Mormon.
Dihang mibalik na ako sa naandan nakong espirituhanong mga kinaiya, mibati ko og kalinaw ug nabag-o nga kahupayan. Nakaangkon ko og pagpamatuod nga kon ang Dios mangayo og luna sa akong kinabuhi ug kini akong ihatag Kaniya, Iya akong panalanginan. Makapili ako sa pagbarog sa balaang mga dapit, ug kon usahay makita nako nga naa ko sa dapit nga maglisod ko sa pagbatyag sa Espritu, makagunit ko og hugot sa akong mga sumbanan ug sa hugot nga pagtuo ug mosalig sa Langitnong Amahan ug ni Jesukristo sa pagpanalipod kanako (tan-awa sa 2 Kings 6:15–16).
Si Jesukristo Mao ang Tubag
Kini nga kasinatian nagpakita kanako nga ang kalibotan adunay ingon niana kalig-on, malinglahon nga pagbitad, ug sayon ra kitang palingon niini kon dili kita maghimo og luna alang sa Espiritu sa atong kinabuhi.
Si Presidente Russel M. Nelson mitudlo: “Ang atong kinatas-ang paninguha sa kinabuhi mao ang pag-andam nga mohimamat sa atong Tiglalang. Ato kining mabuhat pinaagi sa pagpaningkamot kada adlaw nga mas mahisama sa atong Manluluwas, si Jesukristo [tan-awa sa 3 Nephi 27:27]. Ug buhaton nato kana samtang maghinulsol kita kada adlaw ug modawat sa Iyang makalimpyo, makaayo, ug makapalig-on nga gahom. Dayon mobati kita og malungtarong kalinaw ug hingpit nga kalipay, bisan atol sa gubot nga mga panahon. Mao gayod kini nganong ang Ginoo mihangyo kanato nga barog kamo sa balaang mga dapit ug “ayaw pagbalhin’ [Doktrina ug mga Pakigsaad 87:8].”
Kaniadto, nabalaka kaayo ko mahitungod sa akong panarbaho ug pag-inusara. Apan human nga nahilayo ako sa ebanghelyo, akong naamgohan nga kon sundon nako si Jesukristo, padayon Siya nga mag-andam og paagi alang nako sa pisikal, sosyal, espiritwal, ug sa pinansiyal. Dihang ang akong relasyon sa Langitnong Amahan ug ni Jesukristo milambo, nakakita ko og bag-ong mga paagi sa pagpakig-uban sa uban nga dili nako mabutang ang akong kaugalingon sa mga palibot nga mameligro ang akong espiritwalidad.
Nasayod ko nga naghatag ang Langitnong Amahan og usa ka sulbad alang nako pinaagi ni Jesukristo ug nga ang akong kinabuhi mapuno sa mga panalangin samtang ipadayon nako ang pagsunod Kaniya. Mibati ko nga mapasalamaton kaayo sa usa ka Manluluwas kinsa andam nga miantos alang kanako aron makapili na usab ako sa pagsunod Kaniya.
Si Presidente M. Russell Ballard mipakigbahin nga “ang relasyon ngadto sa atong Langitnong Amahan ug sa Iyang Anak, nga si Ginoong Jesukristo, maoy labing importante. Kini nga relasyon labing mahinungdanon karon ug sa kahangtoran.” Nasayod ko nga kon lig-onon ninyo ang inyong relasyon Kanila ug mogahin og dakong luna alang Kanila sa Inyong kinabuhi, makahimo kamo nga mobati og dugang nga kalinaw ug makaani sa mga panalangin sa ebanghelyo sa Manluluwas.