“Ang Duha ka Kamatuoran Nga Nakatabang Kanako nga Makasabot sa Pagkamapainubsanon,” Liahona, Hulyo 2024.
Mga Young Adult
Ang Duha ka Kamatuoran Nga Nakatabang Kanako nga Makasabot sa Pagkamapainubsanon
Ang pagkamapainubsanon makatabang sa garbo ug sa mga pagbati nga nagkulang.
Litrato sa mga miyembro sa Paraguay pinaagi ni Leslie Nilsson
Usa ka kamatuoran: Ako anak sa Dios. Ug kana usa ka talagsaon ug balaanon nga kamatuoran.
Sama ka importante nga kamatuoran: Kay ang tanan dinhi niini nga yuta anak usab sa Dios, sila usab talagsaon ug diosnon nga mga binuhat.
Ang duha niini nga mga kamatuoran tingali ingon og klaro, apan dugay-dugay ko nga tinud-anay nga makapamalandong niini ug makasabot sa unsay gipasabot niini sa akong kinabuhi. Usahay sad-an ko nga motubag sa usa ka sitwasyon sa mapagarbohon nga paagi, naghunahuna nga ang akong paagi mao ang husto nga paagi o nga mas nakamao ko kaysa ubang mga tawo. Sa ubang mga higayon buhaton nako ang katugbang, mobati nga dili kaayo ko takos o bililhon kaysa sa uban sa palibot kanako.
Ang tubag sa duha ka panglimbasog susama:
Pagkamapainubsanon.
Dili Ba Ako Paigo?
Usa ka kasinatian nga tinud-anay nga nakahimo kanako nga magmapainubsanon nahitabo sa akong misyon. Tingali kadaghanan sa mga misyonaryo nanglimbasog sa mga pagbati sa pagkakulang samtang naningkamot sa pagdala sa mga tawo ngadto kang Jesukristo. Sa akong misyon, migahin ko og daghang oras kada adlaw sa pagpangita lang og usa ka tawo nga tudloan ug balik-balik nga gisalikway. Wala ko mobati nga nagmalamposon. Wala ko mobati nga ang akong mga paningkamot paigo. Sa kadugayan, nagsugod ko nga mibati nga ako dili paigo.
Samtang ingon og dili ang pagkamapainubsanon ang akong gikinahanglan, sa dihang gipasabot nako ang akong mga pagbati ngadto sa akong presidente sa misyon, gitabangan ko niya nga makakita nianang bahin sa akong problema nga mao ang paghunahuna nga ako walay labot sa mga problema nga giatubang sa mga misyonaryo sa tibuok kalibotan. Apan dili ako ang unang misyonaryo nga mibati nga gisalikway, ug segurado nga dili mao ang kataposan.
Sa usa ka paagi nakombinser nako ang akong kaugalingon nga ang akong mga kalisod tungod ra gayod sa akong kaugalingon nga sayop, bisan pa sa kamatuoran nga pipila sa labing maayo nga mga misyonaryo sa kasaysayan—sama sa orihinal nga Napulog Duha ka Apostoles, sa mga anak nga lalaki ni Mosiah, ug si Alma nga Batan-on—miatubang og labaw pa gayod ka grabe nga pagsalikway ug pagdaugdaog kaysa akong nasinati sukad.
Imbes nga mobati nga magbasol sa akong kaugalingon, nagsugod ko nga mobati nga nahiusa kang Jesukristo sa akong mga panglimbasog. Ug sa dihang mibati ko nga naulaw sa akong dili hingpit nga mga paningkamot, gihinumdoman nako ang gitudlo ni Presidente Jeffrey R. Holland, Akting nga Presidente sa Korum sa Napulog Duha ka Apostoles: “Ang Pag-ula [ni Kristo] makatabang sa mga misyonaryo nga tingali mas importante pa gani kay sa pagtabang niini sa mga investigator. Kon manlimbasog kamo, kon gisalikway kamo, … nakadawat kamo sa samang pagtratar sa labing maayo nga kinabuhi nga nailhan niining kalibotana sukad, ang bugtong putli ug hingpit nga kinabuhi nga nabuhi sukad.”
Hinumdoman gihapon nako kini nga kasinatian kon nagkinahanglan ko nga makahinumdom nga magmapainubsanon ug mosalig sa Ginoo.
Usa ka Leksiyon sa Pagkamapainubsanon
Daghan kaayo ko og nakat-onan mahitungod sa akong pagkatawo isip usa ka anak sa Dios samtang anaa ko sa akong misyon. Apan human ko nauli, nakaamgo ko nga ako adunay daghan pa nga angayng makat-onan mahitungod sa importansiya sa paghinumdom nga ang ubang mga tawo mga anak usab sa Dios.
Wala madugay human ko nauli, gihatagan ko og usa ka lisod nga calling ug gihimong tigdumala sa usa ka importante nga kalihokan. Nabug-atan ko, ug dili nako makuha ang suporta sa mga tawo kinsa angay unta nga motabang kanako. Nagpadala ko og email nga, sa pagkatinuod, gisulat gamit ang mapugsanon ug masuk-anon nga pinulongan.
Husto ko nga ang calling importante ug nga nagkinahanglan ko og dugang nga suporta, apan dali nakong naamgohan nga tingali dili kini mao ang labing maayo nga paagi sa pagdasig sa mga tawo. Nagkinahanglan ko og pagkamapainubsanon; gikinahanglan nakong hinumdoman nga ang ubang mga tawo tingali adunay ilang kaugalingon nga mga butang nga ilang gisagubang.
Sama sa gitudlo ni Elder Steven E. Snow samtang siya usa ka sakop sa Seventy, “Kon magpaubos kita, tubagon ang atong mga pag-ampo; makaangkon kita og kalinaw sa hunahuna; mas epektibo kitang moserbisyo sa atong mga calling; ug kon padayon kitang magmatinud-anon, makabalik kita sa kataposan ngadto sa presensya sa atong Langitnong Amahan.”
Sa pagkatinuod, nabati nako ang dugang nga kalipay sa akong calling ug sa akong kinabuhi samtang nakat-onan nako nga mahimong mas mapainubsanon.
Pagbalanse sa Duha ka Kamatuoran
Alang nako, ang pagkat-on sa tinuod nga pagkamapainubsanon mao ang mahitungod sa pagbalanse niining duha ka kamatuoran:
Ako anak sa Dios. Ug ako gipalibotan sa ubang mga anak sa Dios.
Samtang nagkat-on ko og dugang mahitungod sa pagkamapainubsanon, akong naamgohan nga tinuod ang unsay gitudlo ni Elder Quentin L. Cook sa Korum sa Napulog Duha ka Apostoles: “Ang pagkamapainubsanon dili ingon nga dagkong kalamposan nga makita o pagbuntog gani sa dagkong hagit. … Pagbaton kini sa hilom nga pagsalig nga kada adlaw ug kada oras makasalig kita sa Ginoo, makaserbisyo Kaniya, ug makatuman sa Iyang mga katuyoan.” Nakat-onan nako nga matuman gayod nako ang mga katuyoan sa Ginoo—apan kon itugyan lang nako ang akong kabubut-on ngadto Kaniya ug mosalig nga nasayod Siya sa unsay labing maayo.
Nasayod ko nga samtang maninguha kita nga mahimong mas mapainubsanon ug Kristohohan, ang Langitnong Amahan mopanalangin kanato sa atong mga paningkamot.
Ang tagsulat nagpuyo sa Frankfurt, Germany.