Digital Lamang: Mga Young Adult
3 Ka Paagi aron Mahisubay ang Inyong Kinabuhi sa Kabubut-on sa Dios
Sa unsang paagi nga kita makahibalo sa unsay gusto sa Langitnong Amahan nga atong buhaton?
Going Home [Pagpauli], ni Yongsung Kim
Sa miaging katuigan, naghunahuna ko:
“Unsay kabubut-on sa Dios alang sa akong kinabuhi?”
“Unsaon man nga ang akong kabubut-on mahisubay sa Iyang kabubut-on?”
Nangita ko og mga tubag niini nga mga pangutana sulod sa dugay nga panahon—ug sa akong hunahuna wala pa gihapon ko makadawat og tubag niining tanan. Apan nakadiskobre ko og tulo ka kamatuoran nga nakatabang nako nga masabtan kon unsaon sa pagdumala ang akong kinabuhi sa paagi nga gusto sa Langitnong Amahan kanako.
1. Ipadayon nga ang Espiritu Magauban Kanimo
Usa ka importante nga bahin sa pagsunod sa unsay gusto sa Langitnong Amahan nga atong buhaton mao ang pagtinguha ug pagpaminaw sa mga pag-aghat sa Espiritu Santo. Ang Espiritu makasulti nato sa daghang paagi, apan atong responsibilidad ang pagpuyo nga takos sa Iyang pakig-uban ug ang pagkat-on kon sa unsang paagi Siya personal nga makigsulti nato.
Alang nako, ang Espiritu makigsulti pinaagi sa akong mga hunahuna, apan usahay lisod ang pag-ila sa kalailan tali sa akong kaugalingong mga pagbati ug sa giya sa Dios.
Usa ka butang nga gusto nakong buhaton mao ang pagpamalandong kon ang mga hunahuna nga anaa nako maayo ba. Sama sa gitudlo ni propeta Moroni, “Ang tanan nga mga butang nga maayo nagagikan sa Dios” (Moroni 7:12). Kon ang usa ka hunahuna nagsulti nako sa paghimo og butang nga maayo alang sa laing tawo, nagdapit nako sa pagkonektar sa Langitnong Amahan, o nag-awhag nako nga mas mahisama ni Jesukristo, ako nasayod nga gikan kini sa Espiritu Santo.
Matag adlaw, naningkamot ko nga mapadayon nga kining kanunay nga kauban magauban kanako, maminaw sa Iyang mga pagdapit, ug andam nga molihok niini. Kini nakatabang nako nga mahisubay ang akong kinabuhi ngadto sa Langitnong Amahan.
Si Presidente Henry B. Eyring, Ikaduhang Magtatambag sa Unang Kapangulohan, mipahinumdom nato: “Ang Espiritu Santo gipadala ngadto sa mga matinud-anon sa pakigsaad nga mga miyembro sa Simbahan ni Jesukristo. Karon, ang inyong mga kasinatian talagsaon, ug ang Espiritu mogiya kaninyo sa dalan nga haom kaayo sa inyong hugot nga pagtuo ug kapasidad sa pagdawat og pagpadayag alang kaninyo ug niadtong inyong gihigugma ug giserbisyohan.”
2. Hinumdomi ang Imong Balaanon nga Pagkatawo—ug Tabangi ang Uban nga Mahinumdom sa Ilaha
Ang Langitnong Amahan ug si Jesukristo nag-ingon nga “higugmaa ang imong isigkatawo sama sa imong kaugalingon”—kana ang ikaduha nga labing importante nga sugo (tan-awa sa Mateo 22:39). Kita mobati og mas dakong gugma ug kaluoy alang sa atong kaugalingon ug sa uban kon kita nahibalo ug nagtahod sa atong balaanon nga pagkatawo.
Gusto sa Langitnong Amahan nga atong tan-awon ang atong kaugalingon kon unsa kita—Iyang minahal nga mga anak nga adunay walay kataposan nga potensiyal. Tungod kay Siya nahigugma nato, Siya nagtinguha nga kita mohigugma sa uban ug motabang sa pagpahinumdom nila kon si kinsa gayod sila.
Si Elder Gerrit W. Gong sa Korum sa Napulog Duha ka Apostoles mahigugmaon nga mipahinumdom nato: “Ang hugot nga pagtuo, serbisyo, ug sakripisyo mas mopaduol kanato ngadto sa atong Manluluwas. Kon mas manggiluy-on, matinud-anon, ug dili para sa kaugalingon ang atong serbisyo ug sakripisyo alang Kaniya, mas makasugod kita sa pagtugkad sa maulaon nga kaluoy ug grasya ni Jesukristo alang kanato.”
Sa akong hunahuna nga kon kita motan-aw sa atong kaugalingon sama sa pagtan-aw sa Amahan kanato, mas dali natong makita ang Iyang tabang sa atong mga kinabuhi.
3. Mosalig sa Iyang Tukmang Panahon
Usa ka mahinungdanong bahin sa paghimo sa mga butang sa paagi sa Dios mao ang pagsalig sa Iyang tukmang panahon. Nasayod ko nga adunay mga higayon sa atong mga kinabuhi nga ang kataposang butang nga gusto natong buhaton mao ang paghulat. Tingali naglaom kita alang sa mga panalangin, lakip na ang pagpangita og kapikas, adunay igong kwarta aron makapalit og balay, pagpangita og trabaho nga maayo og sweldo, pagkaayo sa pisikal o sa mental, o daghan pa kaayo.
Apan usahay kini nga mga panalangin dili moabot kon kanus-a nato gustohon. Gani, usahay sa kinabuhi murag mobati kita nga nahisalaag sa halapad nga disyerto, diin nahutdan na sa mga panalangin.
Hinuon, kon naghulat kita sa Langitnong Amahan, mahimo natong tan-awon ang istorya sa mga Jaredita sa Basahon ni Mormon (tan-awa sa Ether 2). Sa dihang nagbiyahe sila paingon sa gisaad nga yuta, ang Dios dili gusto nga mohunong sila sa kamingawan (tan-awa sa bersikulo 7). Gusto Siya nga sila magpadayon. Sa samang paagi, ang Amahan dili usab gusto nga kita mohunong sa atong gihulagway nga kamingawan. Gusto Siya nga kita magpadayon sa paglambo nga adunay hugot nga pagtuo hangtod nga atong makab-ot ang gisaad nga mga panalangin kanato.
Siya gusto nga ako magpadayon diha sa hugot nga pagtuo, mosunod sa Iyang mga sugo, ug mapailobon nga maghulat Kaniya.
Tingali adunay mga panahon nga dili kita makasabot nganong kinahanglan kita nga molahutay sa mga hagit o nganong maghulat kita sa Iyang tukmang panahon. Ang usa ka butang nga akong nakat-onan mao nga ang tanan, bisan unsa pa ka lisod, sa kanunay alang sa atong kaayohan kon kita magpadayon sa pagpaduol ngadto sa Langitnong Amahan (tan-awa sa Doktrina ug mga Pakigsaad 122:7).
Nasayod ko nga kon kita maningkamot sa paghimo sa mga butang sa paagi sa Langitnong Amahan, kita makabaton sa pakig-uban sa Espiritu Santo ug mobati sa Iyang gugma matag adlaw. Kon kita mosalig sa Langitnong Amahan, bisan diha sa lisod nga mga panahon, kita makakaplag sa kalig-on nga atong gikinahanglan. Kon kamo nagsagubang og usa ka butang nga lisod, luhod ug pakigsulti Kaniya. Ako nasayod nga ang Langitnong Amahan maminaw kaninyo ug mohatag ninyo og kahupayan ug giya nga inyong gikinahanglan.
Ang inyong mga kalisdanan tingali dili mawala human sa pag-ampo, apan ang Langitnong Amahan mohatag ninyo og kalig-on sa pagpadayon—ug Siya anaa sa dalan uban ninyo.