“Unsaon Nako Pagsalig sa Langitnong Amahan Kon Mibati Ko nga Walay Nagsuporta?,” Liahona, Hulyo 2024.
Mga Young Adult
Unsaon Nako Pagsalig sa Langitnong Amahan Kon Mibati Ko nga Walay Nagsuporta?
Naningkamot ko nga magbaton og hugot nga pagtuo apan padayon nga nag-atubang og daghan kaayong mga hagit. Unsaon man nako nga makapadayon sa pagsalig sa Ginoo?
Mga paghulagway pinaagi ni Kathleen Peterson
Ang akong mga ig-agaw mipaila kanako sa mga misyonaryo sa dihang nuybe anyos pa ko. Mipasakop ko sa Ang Simbahan ni Jesukristo sa mga Santos sa Ulahing mga Adlaw apan mao lang ang usa sa mga sakop sa akong direkta nga pamilya nga nagbuhat sa ingon. Sukad niadto, akong nakat-onan nga mas higugmaon pa gayod ang ebanghelyo ni Jesukristo. Apan, sulod sa usa ka panahon, ang pagsalig sa Langitnong Amahan ug sa Iyang mga kamatuoran lisod gayod kaayo alang kanako, ug nanglimbasog gayod ko nga magpadayon sa pag-uswag uban ang hugot nga pagtuo.
Ang pagpakabuhi nga lahi gikan sa kalibotan isip usa ka disipulo ni Jesukristo mahimong lisod bisan asa, apan ang pagdako sa Hong Kong isip usa ka miyembro sa Simbahan mas mahagiton kaysa gilaoman sa uban.
Usa ka rason, daghang tawo niini nga dapit ang dili ganahan sa Simbahan ug naghunahuna nga may kalabotan kini sa dili maayong mga butang. Usa ka kanhiay gigamit nga Chinese nga pulong alang sa “Mormon,” nga nagpasabot sa Simbahan, naglakip sa susama og tunog nga pulong sa Chinese nga “yawa.” Alang sa pipila, nakamugna kini og sayop nga panghunahuna sa mga mithi sa Simbahan.
Usab, tungod kay adunay daghan kaayong tradisyonal nga mga relihiyon nga naestablisar na ug gamay ra nga mga miyembro sa Simbahan sa Hong Kong, mahimong sayon ra nga mobati nga nag-inusara o nalayo. Daghang tawo ang nagkwestiyon sa Simbahan, wala hingpit nga nakasabot sa mga pagtulon-an niini ug dili andam nga sinserong maminaw sa unsay gusto nga ipakigbahin sa mga miyembro.
Nabati gayod nako ang mga epekto niini nga mga babag sa dihang tin-edyer pa ko, apan pinaagi niadto nga mga kasinatian, nakakat-on ako og maayo mahitungod sa unsay gipasabot nga mosalig sa Langitnong Amahan ug ni Jesukristo.
Bililhon ba Gayod ang Pagsunod sa Ebanghelyo?
Sa hayskol, ang akong mga ginikanan mga higala sa usa sa akong mga magtutudlo. Kini nga magtutudlo usa ka matinud-anon nga Kristiyano sa laing tinuohan. Nianang panahona, ako lamang ang miyembro sa Simbahan sa akong klase, ug daghang mga kauban sa klase ug mga magtutudlo ang aduna nay mga pangagpas mahitungod sa Simbahan ni Jesukristo ug sa mga miyembro niini.
Kini nga piho nga magtutudlo adunay kusog kaayo nga negatibo nga mga opinyon mahitungod sa akong pagtuo, nga nakakomplikado sa mga butang tungod kay usa siya ka higala sa pamilya.
Usa ka rason, kasagaran katulogon ko sa iyang klase tungod kay mimata ako og sayo aron moadto sa sayo sa buntag nga seminary, nga nakapabalaka kaniya nga maulahi ko sa akong buluhaton sa eskwelahan. Siya usab mipakaulaw kanako ug mihagit kanako og daghang komplikado nga doktrinal nga mga pangutana nga wala ko kahibalo kon unsaon sa pagtubag. Gihatagan gani ko niya og mga assignment sa eskwelahan nga mobasa og mga sinulat nga batok sa Simbahan! Misulay gayod siya og maayo sa pag-agni kanako nga mobiya sa akong pagtuo.
Kini usa ka mahagiton nga panahon alang sa akong hugot nga pagtuo. Ngano man, sa dihang naningkamot ko nga magpaduol sa Langitnong Amahan ug kang Jesukristo, nga ang pagpabiling matinud-anon nakamugna og mga hagit ug mga kalisod sa akong kinabuhi? Dili ba unta ko mapanalanginan alang sa paghupot sa mga sugo ug pagsakripisyo sa pagkatulog aron moadto sa seminary?
Hinuon, nagkaubos ang akong mga grado, ang akong hugot nga pagtuo nagkagamay, ug nasakripisyo ang akong mga relasyon sa akong mga magtutudlo, sa akong pamilya, ug sa Langitnong Amahan.
Sa makadiyot, nagsugod ko sa paghunahuna kon ang pagsunod sa ebanghelyo mapuslanon ba. Nagsugod ko nga dili motambong sa seminary ug sa wala madugay nabati nga nag-anam og kahanaw ang akong hugot nga pagtuo. Ingon og mas sayon ra nga magpadala sa unsay gipamugos sa kalibotan kanako nga akong buhaton.
Pagpili nga Mosalig
Nagpadayon ko sa pag-ampo sa Langitnong Amahan alang sa giya ug pagsabot. Bisan pa sa grabe nga kalibog ug kasagmuyo nga akong gibati mahitungod sa akong sitwasyon, adunay usa ka butang sa akong kasingkasing nga nagpadayon sa paghupot sa hugot nga pagtuo. Nakig-istorya ko sa matinud-anon nga mga higala ug mitug-an ngadto sa mga kaedad gikan sa simbahan mahitungod sa unsay akong gisinati, ug giawhag ko sa pagpakig-istorya ngadto sa akong magtutudlo sa seminary mahitungod sa akong mga panglimbasog.
Mitubag siya inubanan sa kaluoy ug miawhag kanako nga magpadayon sa pagtambong sa seminary nga adunay malaomon nga kasingkasing. Misaad siya kanako nga akong makita nga mahitabo ang mga panalangin kon magpadayon ko sa paghupot sa hugot nga pagtuo ug pagsalig nga ang Ginoo adunay daghan kaayong gitagana alang kanako ug mopahinungod sa akong mga hagit (tan-awa sa 2 Nephi 2:1–2).
Mao nga, bisan pa man sa mga hagit nga akong giatubang, mipili ko nga mosalig.
Sa kadugayan, nabati nako nga ang akong kinaiya nausab. Imbes nga motutok sa mga kalisod nga akong giatubang, mitutok ko sa pasalamat nga akong gibati alang sa ebanghelyo. Misugod ko sa pagtutok sa panalangin sa akong pamilya, sa akong diosnon nga pagkatawo, ug sa mahangtoron nga mga kamatuoran sa ebanghelyo. Ug sa kataposan, nasayod ko nga ang Langitnong Amahan ug si Jesukristo nahibalo sa akong mga sirkumstansiya ug kanunay nga nagsuporta kanako atol niadto nga mga higayon sa dihang mibati ko nga ingon og nag-inusara ug walay nagsuporta kanako.
Kini nakausab sa tanan.
Samtang mipadayon ko sa pagbutang sa akong pagsalig diha Kanila, sa pagtuman sa mga sugo, sa paghinulsol matag adlaw, ug sa pagbuhat sa ginagmay nga mga butang matag adlaw aron mokonektar Kanila, gibati nako nga nagkalawom ug nakalig-on ang akong pundasyon sa hugot nga pagtuo.
Si Presidente Russell M. Nelson bag-ohay lang miingon: “[Akoha ang] responsibilidad sa inyong pagpamatuod ni Jesukristo ug sa Iyang ebanghelyo. Trabahoa kini. Atimana kini aron motubo kini. Palamboa kini gamit ang kamatuoran. Ayaw kini hugawi sa sayop nga mga pilosopiya sa dili matuohon nga mga lalaki ug mga babaye. Samtang inyong himoon ang inyong pagpamatuod ni Jesukristo nga inyong kinatas-an nga prayoridad, bantayi ang mga milagro nga mahitabo sa inyong kinabuhi.”
Ug samtang gibuhat nako, usa ka milagro ang nahitabo gayod.
Unsay Buot Ipasabot nga Mosalig sa Ginoo
Human sa taudtaod nga paglikay sa bisan unsang mga panag-istoryahanay mahitungod sa pagtuo uban sa akong magtutudlo, usa ka adlaw sa dihang giduol ko niya nga adunay mga pangutana, mibati ko nga andam na sa pagtubag niini uban sa akong gibag-o nga hugot nga pagtuo. Mabination nakong gipangutana siya kon nakabisita na ba siya sa usa sa atong mga miting sa simbahan o nakabasa sa bisan unsa sa Basahon ni Mormon. Sa dihang miingon siya nga wala, mibati ko nga nadasig sa paghatag sa akong pagpamatuod sa yano nga mga kamatuoran.
Gisultihan nako siya nga dili gayod ka mahibalo kon tinuod ba ang usa ka butang nga wala makasinati niini o mangita sa mga tubag sa imong kaugalingon. Gipasabot nako nga nasayod ko nga tinuod ang ebanghelyo tungod kay gipaningkamotan nako kadto nga mga tubag ug nabati sa akong kasingkasing nga kini tinuod. Gidapit nako siya sa pagbuhat sa ingon, ug sukad niadto, ang among relasyon nahimong mas malinawon.
Kini nga hagit sa hugot nga pagtuo nga akong nasinati isip usa ka tin-edyer miandam gayod nako alang sa akong kaugmaon isip usa ka disipulo ni Kristo. Nakita nako ang daghan kaayong panalangin ug mga saad nga nahitabo samtang mipadayon ko sa pagsalig sa Ginoo labaw sa mga opinyon sa tanan. Sama sa gipahayag ni Nephi, “O Ginoo, ako misalig kanimo, ug ako mosalig kanimo sa kahangtoran. Ako dili mobutang sa akong pagsalig diha sa gahom sa tawo” (2 Nephi 4:34).
Kon ang mga butang wala mahitabo sumala sa giplano o kon kita mag-atubang og mga kalisod nga wala nato damha, mahimong sayon ra mobati nga ingon og ang Langitnong Amahan mihatag kanato og dili maayo nga tambag, mibiya kanato, o wala lang gayod magpakabana.
Apan dili kana tinuod.
Sa pagkatinuod, kanunay gayod nga atol nianang mga panahon sa makalibog ug makapaguol kaayo nga mga hagit nga ako gipahinumdoman kon unsay gipasabot nga hingpit nga ibutang ang akong pagsalig diha sa Ginoo. Gikinahanglan nakong tugotan ang akong pagkadisipulo ug ang akong hugot nga pagtuo nga mahimong makahuloganon ug makapausab sa kinabuhi kaysa usa ka butang nga gibuhat nga wala kaayoy paghunahuna ug pagbati. Si Presidente Nelson mitudlo usab, “Ang inyong nagmalamboon nga hugot nga pagtuo makatabang kaninyo sa pagbalhin sa inyong mga hagit ngadto sa dili hitupngan nga kalamboan ug oportunidad.”
Akong nakita kon sa unsang paagi ang hugot nga pagtuo diha kang Jesukristo nakapanalangin kanako sa mas daghang paagi kaysa akong nahunahunaan nga posible. Wala kini magpasabot nga kanunay kong makalingkawas sa kaguol, kalisod, o kalibog, apan kini nagpasabot gayod nga nasayod ko kon asa modangop alang sa kalinaw ug kalig-on.
Si Presidente Nelson mahigugmaon nga nagpahinumdom kanato, “Palihog hibaloi kini: kon ang bisan unsang butang ug si bisan kinsa sa kalibotan nga inyong gisaligan mapakyas man, si Jesukristo ug ang Iyang Simbahan dili gayod mopakyas kaninyo.”
Bisan unsa man ang inyong giatubang sa inyong kinabuhi, kon kini man wala nakab-ot nga mga gilaoman, mga pagpamugos gikan sa mga tingog sa kalibotan, mga isyu sa pamilya, mga panglimbasog sa kahimsog sa pangisip, pinansiyal nga kalisod, grabe nga kaguol, pagkadili makiangayon, o bisan unsang mga hagit, dapiton ko kamo sa pagpadayon sa pagbutang sa inyong pagsalig diha sa Ginoo. Siya hingpit nga nahibalo sa inyong mga sirkumstansiya. Siya nakaila kaninyo. Siya adunay nindot kaayo nga mga panalangin nga giandam alang kaninyo. Bisan diha niana nga mga higayon nga kamo dili ganahan nga mosalig Kaniya, pilia gihapon ang pagbuhat sa ingon. Ang Iyang mga saad tinuod. Siya mogiya kaninyo ngadto sa hingpit nga kalipay, paglaom, ug mga milagro sa tukma nga panahon.
Siya mibuhat niana nga mga butang alang kanako samtang nagpadayon ko sa pagsalig Kaniya.