“Ang Mahinungdanong Buhat sa Ginoo ug ang Atong Dakong Oportunidad,” Liahona, Hulyo 2024.
Ang Mahinungdanong Buhat sa Ginoo ug ang Atong Dakong Oportunidad
Kon kita naghigugma, nagpaambit, ug nagdapit, atong giabagan ang Ginoo sa pagtabang sa matag bililhong kalag nga moduol ngadto Kaniya.
Ang matag propeta niini nga kataposan, mahinungdanon nga dispensasyon nagtudlo sa mga miyembro sa Ang Simbahan ni Jesukristo sa mga Santos sa Ulahing mga Adlaw sa pagpakigbahin sa gipahiuli nga ebanghelyo ni Jesukristo. Sa akong kinabuhi, daghang mga ehemplo ang moabot sa hunahuna:
Si Presidente David O. McKay (1873–1970), ang propeta sa akong kabatan-onan, mipahayag, “Matag miyembro usa ka misyonaryo.”
Si Presidente Spencer W. Kimball (1895–1985) mitudlo, “Ang adlaw sa pagdala sa ebanghelyo ngadto sa uban pang mga lugar ug mga katawhan ania dinhi ug karon,” ug “kinahanglan atong dugangan pa ang atong kakugi.” sa pagpakigbahin sa ebanghelyo ngadto sa uban.
Si Presidente Gordon B. Hinckley (1910–2008) miingon: “Mahinungdanon ang atong trabaho, talagsaon ang atong responsibilidad sa pagtabang sa pagpangita niadtong tudloan. Ang Ginoo mihatag kanato sa sugo sa pagtudlo sa ebanghelyo ngadto sa matag nilalang. Kini magkinahanglan sa [atong] labing maayo nga mga paningkamot.”
Ug si Presidente Russel M. Nelson mitudlo: “Ang misyonaryo nga buhat usa ka mahinungdanon nga bahin sa dakong panagpundok sa Israel. Kana nga panagpundok mao ang labing importanting buhat nga nahitabo sa yuta karon. Walay laing ikatandi sa kadako niini. Walay laing ikatandi ang kaimportante niini. Ang mga misyonaryo sa Ginoo—Iyang mga disipulo—nalambigit diha sa labing dakong hagit, sa labing dakong kawsa, sa labing dakong buhat dinhi sa yuta karon.”
Nahibaloan nako kini sa akong kaugalingon isip usa ka batan-ong misyonaryo didto sa British Mission. Mas segurado gani ako niini karon. Isip usa ka Apostol ni Ginoong Jesukristo, ako mopamatuod nga ang mga oportunidad anaa bisan asa aron sa pagtabang sa uban nga moduol ngadto kang Kristo pinaagi sa pagpakita sa atong gugma, pagpakigbahin sa atong mga tinuohan, ug pagdapit kanila sa pag-apil uban kanato aron masinati ang kalipay sa ebanghelyo ni Jesukristo.
Ang Buhat Magpadayon
Dinha koy pribilehiyo nga may buluhaton sa Departamento sa Misyonaryo sa Simbahan sa dihang ang unang edisyon sa Isangyaw ang Akong Ebanghelyo napaila niadtong 2004, ug usab sa dihang ang ikaduhang edisyon gipagawas pagka-2023. Nagtuo ako nga ang Isangyaw ang Akong Ebanghelyo nakapanalangin sa misyonaryo nga buhat sa lawom nga paagi.
Ang bag-ong Isangyaw ang Akong Ebanghelyo naglakip sa tanan nga atong nakat-onan sukad pa sa 2004, dinasig nga direksiyon gikan sa matag miyembro sa Unang Kapangulohan ug sa Korum sa Napulog Duha ka Apostoles, ug mga kausaban gihimo alang sa pagpakigbahin sa ebanghelyo sa digital nga panahon. Ang pipila niini nga mga kausaban miresulta sa mahinungdanon nga kalamposan.
Nakaplagan namo nga ang pagpakigbahin sa ebanghelyo sa yano, normal, ug natural nga mga paagi sa mga baruganan sa “paghigugma, pagpaambit, pagdapit” hilabihan nga nakapanalangin sa gingharian. Si Jesukristo mipakigbahin sa ebanghelyo niini nga paagi niadtong nagpuyo pa Siya sa yuta. Siya mipakigbahin sa Iyang kinabuhi ug sa Iyang gugma ug midapit sa tanan sa pagduol ngadto Kaniya (tan-awa diha sa Mateo 11:28). Ang paghigugma, pagpaambit, ug pagdapit sama sa Iyang gibuhat usa ka espesyal nga panalangin ug responsibilidad alang sa matag miyembro sa Simbahan.
Sugdan uban sa Gugma
Didto sa Tanaman sa Getsemani ug sa krus, si Jesukristo midala sa Iyang Kaugalingon sa pagpas-an sa mga sala sa kalibotan ug miantos sa tanang kagul-anan, ug “mga sakit ug mga kasakit, ug mga pagtintal sa matag matang” (Alma 7:11). Kini “nakapahimo [Kaniya], … ang labing halangdon sa tanan, sa pagkurog tungod sa kasakit, ug sa pag-agas sa dugo sa matag lungag sa panit” (Doktrina ug mga Pakigsaad 19:18). Pinaagi sa Iyang Pag-ula ug Pagkabanhaw, si Jesukristo naghimo sa kaluwasan ug kahimayaan nga posible alang sa tanan.
Ang pagduol ngadto sa Manluluwas ug pagpamalandong sa tanan nga Iyang nabuhat alang kanato mohimo diri kanato og usa ka kasingkasing nga puno sa gugma alang Kaniya. Siya dayon mopadangop sa atong mga kasingkasing ngadto sa uban ug mosugo kanato sa paghigugma kanila (tan-awa sa Juan 13:34–35) ug sa pagpakigbahin sa Iyang ebanghelyo ngadto kanila (tan-awa sa Mateo 28:19; Marcos 16:15). Kon kadtong anaa sa atong palibot mobati nga kita sa tinud-anay nahigugma ug nag-amuma kanila, sila lagmit mobukas sa ilang mga kasingkasing sa atong mga mensahe, sama nga si Hari Lamoni mibukas sa iyang kasingkasing aron sa pagdawat sa ebanghelyo tungod sa gugma ug serbisyo ni Ammon (tan-awa sa Alma 17–19).
Kon atong ipakigbahin ang ebanghelyo, atong sugdan sa gugma. Samtang kita motabang sa uban diha sa gugma—maghinumdom nga sila atong mga igsoon ug minahal nga mga anak sa atong Langitnong Amahan—ang mga oportunidad magbukas alang kanato sa pagpakigbahin sa unsay atong nahibaloan nga tinuod.
Matinguhaon nga Moapil ug Mopakigbahin
Walay si bisan kinsa nga mas mapahinungoron sa pagpakigbahin sa ebanghelyo kay ni Presidente M. Russell Ballard (1928–2023). Sa iyang kataposan nga pakigpulong sa kinatibuk-ang komperensiya, siya mipamatuod, “Usa sa labing mahimayaon ug talagsaong mga butang nga mahibaloan ni bisan kinsa niining kalibotan [mao] nga ang atong Langitnong Amahan ug si Ginoong Jesukristo mipakita sa Ilang Kaugalingon niining ulahing adlaw ug si Joseph [Smith] giandam aron ipahiuli ang kahingpitan sa walay kataposan nga ebanghelyo ni Jesukristo.”
Sa iyang tibuok kinabuhi, ug hapit sa tibuok kalibotan, si Presidente Ballard matinguhaon nga miapil sa pagpakigbahin niining bililhon nga mensahe ngadto sa tanan. Kita gidasig niya sa pagbuhat sa ingon. Siya mitudlo nga atong ipakigbahin ang ebanghelyo “pinaagi sa pagkahimong maayong mga silingan ug pinaagi sa pag-amuma ug pagpakita og gugma.” Sa pagbuhat niini, mahimo natong “idan-ag ang ebanghelyo sa atong kaugalingong mga kinabuhi, ug … modan-ag ngadto sa [uban] sa mga panalangin nga ikatanyag sa ebanghelyo.” Kita usab “mohatag og pagpamatuod sa unsay [atong] nahibaloan ug gituohan ug kon unsay [atong] gibati.” Si Presidente Ballard mitudlo, “Ang lunsay nga pagpamatuod … mahimong dad-on pinaagi sa gahom sa Espiritu Santo ngadto sa mga kasingkasing sa uban kinsa bukas sa pagdawat niini.”
Ang pagpakigbahin sa gipahiuli nga ebanghelyo ni Jesukristo mao ang labing dako nga tinguha sa kasingkasing ni Presidente Ballard. Mahimo kitang matinguhaon nga moapil—sama kaniya—sa pagpakigbahin sa ebanghelyo diha sa pulong ug sa buhat. Wala gayod kita mahibalo kon kinsa ang nangita sa kahayag sa ebanghelyo apan wala masayod asa kini pangitaon (tan-awa sa Doktrina ug mga Pakigsaad 123:12).
Paghatag og Kinasingkasing nga mga Pagdapit
Sa pagtabang sa uban nga moduol ngadto kang Kristo, ato silang dapiton sa pagsinati sa kalipay nga gidala sa Manluluwas ug sa Iyang ebanghelyo. Mahimo natong buhaton kini pinaagi sa pagdapit nila sa pagtambong sa usa ka kalihokan, sa pagbasa sa Basahon ni Mormon, o sa pagpakighimamat sa mga misyonaryo. Makahimo usab kita sa paghatag og kinasingkasing nga pagdapit kanila sa pag-apil sa panagtigom alang sa sakramento uban kanato.
Kita motambong sa panagtigom alang sa sakramento matag semana aron “mosimba sa Dios ug moambit sa sakramento aron sa paghinumdom ni Jesukristo ug sa Iyang Pag-ula.” Kini usa ka angay nga panahon alang sa mga tawo nga mobati sa Espiritu, mopaduol ngadto sa Manluluwas, ug molig-on sa ilang pagtuo diha Kaniya.
Samtang mangita kita og mga paagi sa paghigugma, pagpakigbahin, ug pagdapit, ang atong pagplano ug mga paningkamot kinahanglan nga maglakip sa pagtabang sa mga tawo sa pagtambong sa panagtigom sa sakramento. Kon dawaton nila ang atong pagdapit ug motambong sa panagtigom sa sakramento, mas dako ang kalagmitan nga magpadayon sila sa dalan ngadto sa bunyag ug pagkakabig. Nagtuo ako sa tibuok nakong kasingkasing nga ang dakong kalamposan moabot kon atong dapiton ang uban sa pagtambong sa panagtigom sa sakramento ug tabangan sila nga makaila sa mga panalangin nga ilang madawat sa pagbuhat sa ingon.
Ang Ginoo Mogiya Kanato
Dili nato mahibaloan kon unsa nga mga kalamposan ug mga hagit ang atong maangkon samtang kita naghigugma, nagpakigbahin, ug nagdapit. Ang mga anak nga lalaki ni Mosiah “milakaw gikan sa usa ka dakbayan ngadto sa lain nga dakbayan, ug gikan sa usa ka balay nga alampoan ngadto sa lain, … taliwala sa mga Lamanita, aron sa pagsangyaw ug sa pagtudlo sa pulong sa Dios taliwala kanila; ug sa ingon sila nagsugod pag-angkon og dako nga kalampusan.” Pinaagi sa ilang mga paningkamot, “kaliboan ang nadala ngadto sa kahibalo sa Ginoo,” ug daghan [ang] “nakabig … [ug] wala gayod mobiya” (Alma 23:4–6).
Samtang dili kini kanunay ang atong masinati, ang Ginoo misaad nga Siya motabang kanato tungod kay ang matag kalag bililhon ngadto Kaniya. Samtang atong ibutang ang atong pagsalig sa Ginoo ug moapil sa Iyang pagserbisyo, Siya mogiya kanato kon unsaon sa pagpakigbahin sa Iyang ebanghelyo ngadto sa uban pinaagi sa paghigugma kanila, pagpakigbahin sa atong kinabuhi ug sa pagpamatuod ngadto kanila, ug pagdapit kanila sa pag-apil kanato sa pagsunod Kaniya.
“Dako ang [atong] hingpit nga kalipay” (Doktrina ug mga Pakigsaad 18:15) kon atong gamiton ang mga oportunidad sa atong palibot sa pagtabang ni Ginoong Jesukristo sa Iyang dakong buhat sa pagdala og mga kalag ngadto Kaniya.