“Ang Akong Kalag Naghandom nga Makaadto Didto,” Liahona, Hulyo 2024.
Mga Tingog sa mga Santos sa Ulahing mga Adlaw
Ang Akong Kalag Naghandom nga Makaadto Didto
Miabot ang usa ka paborito nga istorya sa kasulatan isip usa ka tubag sa akong paghandom nga mapaduol sa akong Langitnong Amahan ug sa Iyang Anak.
The Second Coming [Ang Ikaduhang Pag-anhi], ni Harry Anderson
Miabot ako sa templo usa ka adlaw uban sa usa ka pangutana sa akong kasingkasing: “Langitnong Amahan, kumusta man ko sa ebanghelyo?”
Ang akong mga kakulangan nabati nga ilabihang naglabi nianang semanaha. Sama ni Nephi, mibati ko nga nabug-atan sa mga sala nga nakapahasol kaayo kanako. Apan, sama usab ni Nephi, ako nasayod kon kang kinsa ako mosalig. (Tan-awa sa 2 Nephi 4:18–19.) Naglaom ko nga ang paggahin og panahon uban sa Ginoo diha sa Iyang balay nianang buntaga makatabang nga mobati og mas lig-on nga relasyon sa Ginoo.
Naminaw ko og maayo latas sa sesyon sa pagtuga ug mibati nga mapasalamaton alang sa kalig-on ug kahibalo nga gitanyag niini kanako. Apan samtang misulod ko sa celestial nga lawak, ang akong kasingkasing masulub-on gihapon. Unsaon kaha nako pagkahibalo kon unsay gihunahuna sa Ginoo kanako?
Milingkod ko ug namalandong sulod sa pipila ka minuto ug dayon, mibati nga dili makadawat og tubag, misugod sa pagbarog. Apan dunay butang nga mipalingkod kanako og balik, nahimong mas komportable diha sa lingkoranan. “Dili ko gusto nga mobiya,” naghunahuna ko.
Mitan-aw ko libot sa lawak ug nakakita og usa ka pamilyar nga painting ni Jesukristo nga gipalibotan sa mga anghel, nga ang Iyang mga bukton gibukas paingon kanako. Ang mga pulong sa usa ka paborito nga kasulatan ang misantop sa akong hunahuna: “Ang akong kalag naghandom nga makaadto didto” (tan-awa sa Alma 36:22).
Kanunay nakong gipamalandongan ang kamahinungdanon niana nga bersikulo sa istorya ni Alma. Kaniadto, tungod sa iyang mga sala, ang paghunahuna nga mobarog sa atubangan sa Ginoo mipuno ni Alma og “dili matukib nga kahadlok” (Alma 36:14). Apan human nga midangop kang Kristo, nakita niya ang Dios nga gipalibotan og mga anghel, ug ang iyang “kalag naghandom nga makaadto didto.” Kini nga pagtandi sa kasulatan kanunay nga matahom kaayo kanako. Ang gamay nga paningkamot ni Alma nga modangop sa Ginoo adunay dako nga epekto sa iyang kasingkasing.
Naamgohan nako nga wala nako gibati nga andam nga mobiya sa celestial nga lawak tungod kay, sama ni Alma, ang akong kalag naghandom nga maanaa didto—diha sa templo nianang adlawa ug sa kataposan uban sa Langitnong Amahan ug ni Jesukristo didto sa akong langitnong panimalay. Ang Espiritu Santo migamit sa akong paborito nga istorya sa kasulatan aron sultihan ko nga ang Dios nasayod sa akong kasingkasing. Napahinumdoman ko nga bisan pa man sa akong mga kakulangan, ang Ginoo midawat sa akong mga paningkamot nga mapaduol Kaniya. Nasayod Siya nga naghandom ko nga maanaa didto.