“Unsa Man ang Pwede Natong Iampo?,” Liahona, Hulyo 2024.
Dali, Sunod Kanako
Unsa Man ang Pwede Natong Iampo?
Sa Alma 33 ug 34, gitudloan kita nga kita makaampo bisan asa, bisan unsang orasa, mahitungod sa bisan unsa. Ang mosunod mao ang pipila ka ehemplo sa mga indibidwal nga nag-ampo sa lainlaing mga sitwasyon.
Samtang basahon ninyo kini nga mga kasinatian, ikonsiderar ang pipila sa mga paagi nga kamo nag-ampo “alang sa inyong mga panon sa umahan” ug “diha sa inyong mga lawak alampoan, ug diha sa inyong wala hibaloi nga mga dapit, ug diha sa inyong kamingawan” (Alma 34:25, 26).
Ang Santos sa Ulahing mga Adlaw nga si Alma Richards nakaapil sa 1912 nga Olympic team.
Nag-ampo diha sa Olympics
Usa ka high-jumper, si Alma Richards naapil sa 1912 nga track and field Olympic team nga misangka didto sa Stockholm, Sweden. Atol niana nga kompetisyon, ang uban tagsa-tagsa nga natangtang hangtod nga si Alma ug ang laing usa nalang ang nagpabilin.
“Samtang nangandam si Alma sa paglayat, nabalda ang iyang hunahuna. Diha siya, nagrepresentar sa iyang nasod diha sa kinadak-ang atletik nga kompetisyon sa kalibotan. Apan mibati siya og kahuyang, nga daw ang tibuok kalibotan gipas-an niya sa iyang mga abaga. Naghunahuna siya sa Utah, sa iyang pamilya, ug sa iyang lungsod nga natawhan. Naghunahuna siya sa BYU ug sa mga Santos. Miduko sa iyang ulo, hilom siyang mihangyo sa Dios sa paghatag kaniya og kalig-on. ‘Kon husto nga ako makadaog,’ nag-ampo siya, ‘buhaton nako ang akong labing maayo sa pagpakita og maayong ehemplo sa tibuok nakong kinabuhi.’”
Nagkuha og kusog gikan sa Ginoo, si Alma milayat ug milabang sa taas nga bar. Sa dihang napakyas ang iyang nahibilin nga kakompetensiya, nadaog ni Alma ang bulawan nga medalya.
Sa wala madugay, usa ka higala “misungog kaniya mahitungod sa pag-ampo sa wala pa ang iyang mananaog nga paglayat. ‘Unta dili kamo mangatawa,’ hilom nga mitubag si Alma. ‘Nag-ampo ako sa Ginoo sa paghatag kanako og kusog nga malamposong makalayat ibabaw niana nga bar, ug malamposon akong nakalayat.’”
Nag-ampo diha sa Eskina sa Dalan
Niadtong 1898, si Inez Knight ug si Jennie Brimhall mao ang unang dili minyo nga mga babaye nga gitawag isip sister nga mga misyonaryo alang sa Ang Simbahan ni Jesukristo sa mga Santos sa Ulahing mga Adlaw. Wala madugay human miabot sa ilang mga misyon ngadto sa England, ang duha ka babaye miadto aron magsangyaw didto sa Oldham, usa ka gamay nga lungsod nga adunay pabrika duol sa Liverpool.
Si Inez Knight ug si Jennie Brimhall nag-ampo alang sa tabang sa ilang misyonaryo nga pagserbisyo didto sa England.
Tuo: litrato sa maayong kabubut-on ni Jennifer Whatcott Hooton
Ang duha ka sister, ilang presidente sa misyon, ug ubang mga misyonaryo nagpundok usa ka gabii. “Nagliyok sila diha sa usa ka nagkapuliki nga eskina sa dalan, naghalad og usa ka pag-ampo, ug nanganta og mga himno hangtod usa ka dakong pundok mialirong kanila.” Ang ilang mga paningkamot malamposon kaayo nga ang presidente sa misyon “[mianunsiyo] nga usa ka espesyal nga miting pagahimoon sa sunod nga adlaw, ug gidapit niya ang tanan sa pagtambong ug maminaw sa pagsangyaw gikan sa ‘tinuod nga buhing Mormon nga mga babaye.’”
Nag-ampo alang sa Kasakyan
Si Sahr gikan sa Bo, Sierra Leone, mibiyahe pinaagi sa taksi nga motorsiklo ngadto sa usa ka bukidnon nga dapit aron sa pagdala sa gikinahanglan kaayo nga tambal alang sa iyang tigulang nga mga ginikanan. Nagpabilin siya og mas dugay kaysa giplano aron sa pagtabang sa iyang mga ginikanan sa pag-ayo sa ilang atop, nga nadaot sa usa ka bagyo nga kusog kaayo og hangin. Sa dihang naayo na kini, kilom-kilom na.
Tungod kay gabii na, lagmit wala nay moagi nga taksi. Nabalaka si Sahr. Kon walay taksi, gikinahanglan niyang maglakaw pabalik nga dili lang ingon nga layo apan usab posibleng delikado. Ang pagpabilin sa panimalay sa iyang mga ginikanan dili sab usa ka opsiyon tungod kay siya adunay sayo nga eskedyul sa trabaho pagkasunod buntag. Agig dugang, dili niya gustong biyaan ang iyang bag-ong pamilya nga mag-inusara sa kagabhion.
Ang pag-ampo alang sa usa ka taksi nga motorsiklo ingon og kiwaw gamay, apan mihangyo si Sahr sa Dios nga tabangan siya nga makauli. Pipila ka minuto ang milabay, usa ka taksi ang miabot, nga bag-ohay lang mihatod sa usa ka tawo diha nianang kasagaran hilom nga dapit. Mapasalamatong misakay si Sahr, mibati nga napanalanginan nga makauli siya nga adunay daghang oras aron sa pagtuman sa iyang mga pasalig sa trabaho ug sa pagpabiling luwas sa iyang pamilya.
Nag-ampo alang sa Kausaban sa Eskedyul
Si Brother Miguel Troncoso gikan sa Santa Cruz, Argentina, mahinamong nagpaabot nga makadungog ni Elder Carlos H. Amado sa Seventy nga mamulong sa iyang stake. Apan si Elder Amado gieskedyul nga mamulong sa Martes sa gabii, ug si Brother Troncoso, usa ka magtutudlo sa hayskol, gikinahanglang motudlo og klase sa eskwelahan nianang gabhiona. Determinado nga motambong sa miting, siya ug ang iyang pamilya nag-ampo alang sa tabang.
Misulti niini si Brother Troncoso kabahin sa iyang kasinatian:
“Sa adlaw sa wala pa ang komperensiya, akong gibati nga giaghat nga makigsulti sa prinsipal nga mogawas ko og sayo mga 20 minutos. … Sa wala pa gani ako makasulti, nangutana siya nako kon mosugot ba ako nga usbon ang oras sa pagsugod sa akong klase sa Martes nga sayo og duha ka oras kay sa naandan. …
“Usa gayod kini ka panalangin kanamo. Miabot kami sa miting nga layo pa ang oras ug mibati sa Espiritu sa atubangan sa usa sa mga tinun-an sa Ginoo. … Dugang pa, nakaangkon kami og pagpamatuod isip usa ka pamilya nga ang Langitnong Amahan nakahibalo sa among mga tinguha ug naminaw sa among mga pag-ampo.”