“Palihog Tabangi Siya,” Liahona, Hulyo 2024.
Mga Tingog sa mga Santos sa Ulahing mga Adlaw
“Palihog Tabangi Siya”
Ang family history ug ang puli nga buhat sa templo nakatabang kanako nga makabuntog sa mga pagbati sa kapakyasan ug pag-inusara.
Litrato sa Manila Philippines Temple pinaagi ni Russell Sun De La Cruz
Usa ka adlaw sa trabahoan, mibati ko og labihang kaguol ug nag-inusara. Nagtuo ko nga akong napakyas ang akong mga katigulangan tungod sa daghang sayop nga akong nahimo. Nangamuyo ko sa akong Langitnong Amahan alang sa kalig-on.
Mga usa o duha ka semana ang milabay, usa ka sister ang miduol kanako human sa simba ug nangutana kon ako ba si Jenny Casama. Gipaila niya ang iyang kaugalingon kanako isip si Michelle (Mich) Bautista, usa sa among mga consultant alang sa templo ug family history sa ward. Gipasabot niya nga siya adunay damgo diin ang tulo ka babaye nga nagsul-ob og puti ug dunay apelyido nga Casama ang miduol kaniya alang sa tabang. Naghangyo sila kang Sister Bautista, “Palihog tabangi siya.”
Nakasabot si Sister Mich nga kini nga mga babaye naghangyo kaniya sa pagtabang sa ilang paryente—ako—aron magkat-on og dugang pa mahitungod sa buhat sa templo ug family history.
Si Sister Mich miingon kanako, “Tan-awon nato kon atong makit-an kadto nga mga babaye diha sa imong family rree.”
Sa website sa FamilySearch, nadiskobrehan namo ang mga rekord alang sa akong lola nga si Damasa Casama; sa iyang igsoon nga babaye nga si Emiliana Casama; ug sa akong lola sa tuhod nga si Eugenia Casama. Sa walay pagduhaduha, nasayod kami nga sila mao ang mga babaye diha sa damgo. Usa ka tam-is nga pagbati sa kalinaw ang miabot kanako, ug gibati nako ang naghinobra nga gugma sa akong mga katigulangan niana gayod nga higayon. Nanghilak kami tungod sa kalipay nga among gibati sa among mga kasingkasing. Gibati nako nga sila nagpakabana og maayo kanako, ug agig bugti, ako adunay halawom nga pagbati sa gugma alang kanila.
Naamgohan dayon nako ang akong responsibilidad sa pagtabang kanila ug sa akong ubang mga katigulangan aron makadawat sa mga ordinansa sa templo. Ang atong mga katigulangan naghulat—ang uban sa taas na nga panahon—kanato nga anaa sa yuta sa pagpahigayon niining sagrado nga mga ordinansa alang kanila.
Sa ulahing bahin nianang tuiga, nabunyagan ko sa templo alang niining tulo ko katigulangan. Ako mopamatuod sa katahom sa buhat sa family history ug sa gahom nga gidala niini sa akong kinabuhi.
Sama sa gisulti ni Presidente Russell M. Nelson: “Bisan kon ang buhat sa templo ug sa family history adunay gahom sa pagpanalangin niadtong anaa sa kalibotan sa espiritu, kini adunay sama nga gahom sa pagpanalangin sa mga buhi. Kini adunay makapalunsay nga impluwensya niadtong nagbuhat niini. Sila sa pagkatinuod nagtabang aron mahimaya ang ilang mga pamilya.”
Nasayod ko nga ang Simbahan tinuod ug nga kita dili mahimong hingpit kon wala ang atong mga katigulangan.