Inyong Lawas: Pag-atiman Nianang Balaanon nga Gasa

Ni Gail Newbold

Mga Magasin sa Simbahan

Ang atong mga lawas mga gasa gikan sa Dios ug ang mga templo alang sa atong mga espiritu, apan nagkinahanglan kini og pagkontrolar sa kaugalingon ug disiplina aron sa pag-amuma ug pag-atiman niini sa tukma nga paagi.

usa ka lalaki ug usa ka babaye nga nag-jogging

Sayon ra nga ibaliwala ang atong maayong panglawas—kana, hangtod nga kadtong 10 ka softdrink sa usa ka adlaw, dili aktibo nga paagi sa kinabuhi, ug kakulang sa katulog moepekto kanato. O tingali bisan pa sa himsog nga mga pagpili nga atong gihimo, ang sulundon nga mga sakit [genetics] mokalit lang og tumaw ug ang mga hagit sa panglawas makaapekto og maayo.

Kitang tanan gihatagan og nagkalainlaing ang-ang sa pisikal nga kahimsog nga dili nato kanunay nga makontrol. Apan usa ka butang ang segurado: ang plano sa Dios nanawagan kanato sa pagpalambo sa unsay gihatag kanato. Ang pagbuhat sa ingon nagkinahanglan sa samang disiplina sa kaugalingon ug pagpahinungod nga atong gikinahanglan aron sa pag-amuna sa atong espirituwal nga kahimsog. Kana nagpasabot sa pagkontrolar sa atong natural nga kinaiya nga molingkod imbes nga modagan, mokaon og mga tam-is imbes sa mga utanon, ug magpulaw imbes nga matulog.

Samtang magtinguha kita og inspirasyon aron sa pagpalambo sa atong pisikal nga kahimsog ug samtang mag-ugmad kita og disiplina sa kaugalingon aron sa pagmentinar niini, madiskobrehan nato ang mas dako nga kapasidad sa pagserbisyo sa Dios ug sa pagkaplag og hingpit nga kalipay.

Ang Inyong Lawas Usa ka Templo

Ang mga kalag molambo kon ang espiritu ug lawas maayo pagkaatiman. “Ang espiritu ug ang lawas mao ang kalag sa tawo” (Doktrina ug mga Pakigsaad 88:15). Nagkomento bahin niini nga bersikulo, si Presidente Russell M. Nelson mitudlo nga ang lawas ug ang espiritu “dako og importansiya. Ang inyong pisikal nga lawas talagsaong linalang sa Dios. Kini Iyang templo ingon man usab inyoha ug kinahanglan nga tagdon uban sa balaan nga pagtahod.”

Sa edad nga 99, si Presidente Nelson nagpadayon sa pagbuhat sa iyang mga katungdanan isip Presidente sa Simbahan, samtang nag-ila nga usahay mogamit siya og walker alang sa balanse ug karon mas mopili nga mohatag sa iyang mga pakigpulong sa kinatibuk-ang komperensiya samtang naglingkod. “Matag karon ug unya, ako adunay gamay nga hagit sa akong balanse,” misulat siya sa iyang social media nga pahina niadtong Mayo 2023. “Tingali dili ko kinahanglang masorpresa kon motumaw ang ginagmay nga mga problema samtang nagkaduol ko sa edad nga 100. Salamat gayod, maayo ang akong kasingkasing, ang akong espiritu ingon ka lig-on sama sa akong mga bitiis, ug motrabaho gihapon ang akong utok.”

Si Presidente Nelson nailhan alang sa iyang mabinantayon nga mga tulumanon sa panglawas ug aktibo nga paagi sa kinabuhi. Kanunay nga usa ka niwang nga tawo, naningkamot siya og maayo nga magpabilin niana nga paagi. Nag-ehersisyo siya kanunay, mas ganahan nga maanaa sa gawas. Sa nagpangidaron siya og mga 90, gipala niya ang niyebe gikan sa iyang kaugalingon ug sa mga silingan nga mga aseras, gibalik ang mga basurahan ngadto sa mga garahean, ug mitrabaho diha sa iyang nataran. Hangtod nga nahimo siyang Presidente sa Simbahan, makanunayon siyang nag-ski kutob sa itugot sa iyang eskedyul.

Pagpalambo og Disiplina sa Kaugalingon

Nasayod kita sa mga sukaranan sa maayong pisikal nga kahimsog:

Mag-ehersisyo kanunay.
Matulog og eksakto.
Mokaon og balanse nga diyeta.
Magmentinar og himsog nga timbang.
Modumala sa kaugtas.

Ang lisod nga bahin mao ang pagpabuhat sa atong lawas sa unsay nasayran sa atong espiritu nga angay buhaton. Sumala ni Presidente Nelson, usa sa mga pagsulay sa mortalidad mao ang pagkontrolar sa mga gana sa atong lawas pinaagi sa espiritu nga nagpuyo sa sulod niini:

“Si Satanas nakahibalo sa gahom sa atong mga gana. Mao nga, siya motintal kanato sa pagkaon sa mga butang nga dili angay natong kan-on, sa pag-inom sa mga butang nga dili angay natong imnon. …

“Kon kita sa pagkatinuod nakahibalo sa atong balaan nga kinaiyahan, kita gusto nga mokontrolar sa maong mga gana. … Sa inadlaw-adlaw nga pag-ampo, kita mapasalamaton nga moila [sa Dios] isip atong Tiglalang ug magpasalamat Kaniya alang sa katalagsaon sa atong kaugalingong pisikal nga templo. Atimanon nato kini ug mahalon ingon nga kini ang atong kaugalingong personal nga gasa gikan sa Dios.”

Pagpalambo og Kamapasalamaton ug Pagkaplag og Hingpit nga Kalipay diha sa Lawas nga Gihatag sa Dios Kanato

Sa edad nga 27 ug isip inahan sa tulo ka anak, nahiling ko nga adunay rheumatoid arthritis, usa ka autoimmune nga sakit nga moguba sa mga lutahan sa paglabay sa panahon. Nawad-an ko og kontrol sa akong kinabuhi sa pisikal ug mental nga paagi. Midangop ko sa Dios alang sa tabang sa pagbaton usab og kalig-on sa pangisip ug maayo kaayo nga panglawas nga kaniadto gibaliwala lang nako.

Nagtinguha ko og tabang gikan sa usa ka psychologist alang sa akong kabalaka. Nakigtambayayong ko sa usa ka rheumatologist kon unsa nga mga tambal ang imnon ug migamit usab og natural nga mga solusyon. Wala gayod ko moundang. Human sa daghang katuigan ug grabeng kasakit, ang akong kahimsog milambo sa pisikal ug mental nga paagi.

Nakahinumdom ko usa ka hapon nga naglakaw latas sa usa ka banwa sa ihalas nga mga bulak padulong ngadto sa usa ka linaw sa bukid. Uban sa mga luha nga midagayday sa akong nawong, nagpasalamat ko sa Dios alang sa panalangin sa akong pisikal nga lawas ug sa akong abilidad nga mobuhat sa usa ka kalihokan nga nagtuo ko nga nawala na kanako. Walay tambal alang sa akong kondisyon, ug ang epekto sa sakit makita sa akong lawas. Apan ang paglakaw ug pag-ehersisyo nahimo nakong mga gikahiligan, ug dili gayod nako ibaliwala ang akong kahimsog.

Bisan pa man sa akong pisikal nga mga limitasyon, bag-ohay lang kong miserbisyo og usa ka senior nga misyon uban sa akong bana didto sa Washington, USA (nga usa ka paborito nga dapit sa mga tawo alang sa pag-hike!). Mapasalamaton ko nga nakaserbisyo sa tibuok nakong kinabuhi sa hapit tanang calling sa Simbahan nga anaa.

Sama sa giingon ni Presidente Nelson: “Hinaot nga kita mapasalamaton kanunay sa dili katuohan nga panalangin sa usa ka talagsaon nga pisikal nga lawas, sa labing mahinungdanon nga gilalang sa atong mahigugmaong Langitnong Amahan. Sama ka halangdon sa atong lawas, dili kini mao ang kataposan. Hinoon, importante kini nga bahin sa mahinungdanong plano sa Dios sa kalipay alang sa atong mahangtorong kauswagan.”