Digital Lamang: Mga Young Adult
Mga Kamatuoran Nga Nakatabang Nako Nga Mosalig sa Gahom sa Manluluwas sa Pag-usab Nako
Ang tagsulat nagpuyo sa Samoa.
Ang paghangop sa Iyang makaayo nga gahom makatabang nato nga molambo ug mausab.
Mibati ka ba nga nakasala ka sa makadaghang higayon? Murag wala nay hinungdan nga mosugod ug mosulay pag-usab, tungod kay padayon ra nimong gihimo ang mao gihapon nga mga sayop?
Nahinumdom ko usa ka adlaw sa dihang mibati ko nga walay paglaom ug walay kalamboan. Mihilak ko sa akong suod nga higala mahitungod sa kahuyang nga naa nako. Usa ka kahuyang nga murag ania na nako sa kanunay.
Nakapahugno kini nako, ug sa pagkatinuod, dili na gani ko ganahan nga mosulay sa pagpaningkamot og balik. Naningkamot ko nga makadawat sa akong pagtuga ug makaserbisyo og misyon sulod sa duha ka tuig, apan ang akong pakigbisog nakapugong nako. Wala gani ko mobati nga takos ko nga magpadayon sa pagpaningkamot isip miyembro sa Ang Simbahan ni Jesukristo sa mga Santos sa Ulahing mga Adlaw.
Nianang gabhiona, gusto na ko nga mohunong. Apan ang gugma ug suporta sa akong higala mipahinumdom nako sa pipila sa mga kasinatian nga nakapalig-on sa akong pagpamatuod ug nakatabang nako nga mosalig sa gahom sa Manluluwas sa pag-usab nako.
Tingali makatabang usab kini kaninyo.
Paghinulsol—ang Yawe sa Kalamboan
Sa tinuod lang—dili ko motuo kanunay sa saad ni Jesukristo nga Siya “mohimo sa mahuyang nga mga butang nga malig-on” (Ether 12:27). Mibati ko nga nakasala sa makadaghang higayon ug ang Iyang saad sa pagpasaylo dili magamit nako.
Apan ang pagkat-on og dugang mahitungod sa gasa sa paghinulsol nakapausab sa akong pamaagi sa pagbuntog sa kahuyang. Si Presidente Russell M. Nelson mitudlo nga ang “paghinulsol mao ang yawe sa kalamboan.” Ang paghinulsol dili usa ka butang nga atong buhaton sa higayon nga atong matarong ang atong mga kaugalingon ug andam na sa pagpadayon gikan sa atong mga pakigbisog; kini mao ang paagi kon unsaon nato sa pagdapit ang gahom sa Ginoo ngari sa atong mga kinabuhi.
Kanunay nakong gibati nga si Satanas nahibalo gayod kon unsaon sa pagpawala sa akong kadasig. Apan sama sa gitudlo usab ni Presidente Nelson: “Palihog ayaw kahadlok o ilangay ang paghinulsol. Si Satanas mahimuot sa inyong kaalaotan. Putla kini. … Ang Manluluwas nahigugma kanato kanunay apan labaw pa kon kita maghinulsol.”
Milungtad kini og taas nga panahon, apan sa kataposan nakat-on ko sa pagsalig nga ang Manluluwas gusto nga maghinulsol ko. Siya gusto nga ako mobalik sa pagpuyo uban Kaniya ug sa Langitnong Amahan.
Pagsabot sa Tiunay nga Gugma ni Kristo
Ang walay kataposan nga mga pagdapit sa Manluluwas sa paghinulsol nakatabang nako sa pagtan-aw sa ubang mga baroganan pinaagi sa bag-o nga kahayag—sama sa gugmang putli. Sa Simbahan, atong gihulagway ang gugmang putli isip “ang kinatas-an, labing dungganan, labing lig-on nga matang sa gugma, dili lang pagbati; ang tiunay nga gugma ni Kristo.” Mituo ko kanunay sa kaimportante sa gugmang putli, apan sa akong hunahuna wala ko makasabot kon unsaon pagsugod sa pagpalambo sa gugmang putli hangtod nga nagsugod ko sa pagkasabot kon sa unsang paagi nga ang pagtanyag sa Manluluwas sa pagpasaylo sa akong mga sala sa matag higayon nga maghinulsol ko usa ka pagpahayag sa Iyang hingpit nga gugma alang nako.
Ug sa dihang mituo na ko nga ang Manluluwas mohatag gayod nako og walay kataposan nga mga oportunidad sa paghinulsol ug sa pagduol ngadto Kaniya, lahi na ang akong pagtan-aw sa mga tawo sa akong palibot. Akong naamgohan nga ako makasunod sa Iyang ehemplo pinaagi sa pagpakita og gugmang putli niadtong nakapasakit nako. Makahatag ko og kapasayloan ug pagsabot niadtong naghukom sa dili matarong nga paagi sa akong mga kasaypanan.
Pundasyon alang sa Kausaban
Kining duha ka baroganan—paghinulsol ug gugmang putli—nahimong pundasyon sa akong mga paningkamot sa pagtugot ni Jesukristo sa pag-usab nako. Misugod ko sa pagtan-aw niini isip nagkatukma ug konektado sa usag usa nga mga baroganan.
Si Presidente Henry B. Eyring, ang Ikaduhang Magtatambag sa Unang Kapangulohan, mitudlo nga “ang kamapasalamaton alang sa kapasayloan sa mga sala mao ang liso sa gugmang putli.” Tinuod kini alang nako sa dihang nausab ko pinaagi sa paghinulsol ug mibati og kamapasalamaton alang sa gugma sa Dios ug sa kapasayloan. Ug karon gusto ko nga ang uban makasinati sa gugma sa Dios sama sa akong nasinati.
Busa sa mga panahon nga mawala ang akong kadasig ug matental nga dili mosimba o sa pagpalabay sa importante nga mga butang, akong hinumdoman nga basin makapalig-on ko sa laing tawo. Basin mahimo ko nga ehemplo niadtong anaa sa akong palibot nga nakigbisog usab.
Ang gugma nga akong gibati alang sa akong Manluluwas ug ang gugmang putli nga akong gibati alang niadtong anaa sa akong palibot nakapalig-on kanako. Mopahinumdom kini kanako sa gugmang putli nga anaa Kaniya alang kanako. Naningkamot gihapon ko sa pagbuntog sa akong mga kahuyang, apan nasayod ko nga ang pagsalig diha sa Iyang makaayo nga gahom makatabang nako nga molambo ug mas mahisama Kaniya.