“Kaisog sa Pagpakigbahin sa Unsay Labing Bililhon Kanako,” Liahona, Hulyo 2024.
Kaisog sa Pagpakigbahin sa Unsay Labing Bililhon Kanako
Nagsunod sa ehemplo sa akong bishop ug sa iyang asawa, ako adunay usa ka tumong sa pagpakigbahin sa Basahon ni Mormon sa matag biyahe sa cheerleading nga akong gihimo.
Samtang nagtubo, ganahan ko nga magtan-aw kon giunsa sa mga himongaan ni Lola sa pagpundok ang ilang mga piso ilawom sa ilang mga pako atol sa mga unos aron magpabilin sila nga luwas ug protektado. Kini nga imahe nahimong mas importante ngari nako human sa pagbasa mahitungod sa Basahon ni Mormon (tan-awa sa 3 Nephi 10:4–6). Isip usa ka young adult, ang akong bishop ug ang iyang asawa, kinsa mibiyahe og kadaghan alang sa ilang negosyo, misulti nako nga sila mipakigbahin sa Basahon ni Mormon sa usa ka tawo sa matag biyahe nga ilang gihimo.
Kana nakapadasig kanako. Ako nakadayeg kanila, ug ang ilang mga ehemplo nakapatandog sa akong kasingkasing. Mihukom ko nga kon makahigayon man ko og biyahe sa gawas sa Utah, USA, akong sundon ang ilang ehemplo ug mopakigbahin sa Basahon ni Mormon sa matag higayon.
Isip usa ka cheerleader alang sa Brigham Young University, kanunay ko nga mobiyahe uban sa team sa cheerleading. Sa wala pa ang akong unang biyahe, mipalit ko og usa ka Basahon ni Mormon ug gisulatan kini sa akong pagpamatuod. Gusto nako nga makapalambo og kaisog sa pagpakigbahin sa unsay labing bililhon kanako ngadto sa uban: ang akong pagpamatuod sa Basahon ni Mormon. Gusto ko nga mahimong sama sa akong bishop ug sa iyang asawa. Gusto ko nga mahisama ni Jesukristo. Gusto ko nga motabang sa pagpundok sa uban ug motabang kanila sa pagduol ngadto Kaniya.
Dali kaayo nakong nakat-onan nga kon ako mag-ampo sa dili pa ang matag biyahe aron magiyahan ngadto sa tawo nga nagkinahanglan niini, usa ka tawo nga mopakita sa tukma nga panahon ug sa tukma nga dapit alang nako aron ikapakigbahin ang Basahon ni Mormon sa paagi nga natural ug sayon. Kon mas magpraktis ko, mas sayon ang akong pagpakigbahin. Ang akong mga pagbiyahe nahimong mas makahuluganon alang kanako. Kanunay kong naghinamhinam nga makaplagan ang gipanalanginan sa Langitnong Amahan nga makadawat niining sagradong tugon ni Kristo.
Kon ako mobiyahe, ako namalandong, “Asa ko moadto aron makaplagan ang tawo kinsa gipadala sa Langitnong Amahan kanako niining higayona? Unsa ang akong isulti ngadto kaniya aron mapasabot kon unsa ka bililhon ang Basahon ni Mormon ngari kanako?” Ang akong mga hunahuna ug mga aksiyon mahimong nakatutok gawas sa akong mga panginahanglan ug kalingawan, ug ako mibati nga naglambo ang gugma alang sa matag usa nga akong nahimamat. Naningkamot ko sa pagtan-aw kanila sama sa pagtan-aw sa Manluluwas. Nag-ampo ko alang kanila nga dawaton ang balaan nga gasa nga gipadala sa Langitnong Amahan kanako aron ihatag kanila.
Nasubo ko sa dihang natapos na ang akong senior year. Ang pagkahimong cheerleader alang sa BYU usa ka damgo sa tibuok kinabuhi alang kanako. Pwede ra gyod ko nga malingaw sa talagsaon nga kasinatian sa pag-cheer bisan unsa pa, apan ang oportunidad sa pagpakigbahin og kopya sa Basahon ni Mormon sa matag cheerleading nga biyahe nakapalambo sa akong kinabuhi sa matahom ug sa wala damha nga mga paagi.
Ang pagpakigbahin sa Basahon ni Mormon mao ang usa ka bililhon ug sayon nga paagi sa pagdugang og kahulogan sa akong kasinatian sa unibersidad. Ako nasayod nga ang mga tawo nga akong gipakigbahinan sa Basahon ni Mormon piho nga nagiyahan sa pagdawat niini. Nasayod usab ako nga sa akong matahom nga kaagi sa kinabuhi ang Langitnong Amahan mipanalangin og mahigugmaon ug matam-is nga malumong kaluoy: Siya mitugot kanako nga mobati sa Iyang gugma alang sa Iyang mga anak sa usa ka espesyal nga paagi sa matag biyahe nga akong gihimo.
Human ako migradwar, mihukom ko nga kanunayng ipadayon ang pagpangita sa tawo nga akong mapakigbahinan sa akong pagpamatuod. Paglabay sa panahon, nakapalambo ko og mas dakong abilidad ug kahupay sa pagpakigbahin sa akong pagpamatuod. Nakat-on ko nga dili na mahadlok sa pagpakigbahin niini. Motuo ko nga ang tanan mahimong mas komportable sa pagpakigbahin sa ilang pagpamatuod pinaagi sa pagpraktis ug pinaagi sa pagpangayo og balaan nga tabang.
Ang pagpili sa pagsunod sa mga ehemplo sa akong maayong bishop ug sa iyang asawa nakapahimo sa akong kinabuhi nga mas makahuluganon sa daghang paagi. Kini nagtudlo kanako nga makita nga ang Ginoo nakaila sa matag usa sa Iyang mga anak. Siya nahigugma kanato ug matinguhaon sa pagtigom sa Iyang mga piso ilalom sa Iyang mga pako. Pagkanindot nga panalangin nga makasabot sa matahom nga hulagway nga Iyang gigamit sa dihang Siya naghulagway sa Iyang pagpundok. Siya mopundok kanato sama sa usa ka himongaan ug malumo nga mopanalipod sa iyang mga piso.
Ang tagsulat nagpuyo sa Utah, USA.