Digital Lamang: Mga Pagtulun-an sa mga Lider sa Simbahan gikan sa Social Media
Kagawasan sa Relihiyon alang sa Tanang Pagtuo ug Katawhan
Tan-awa kon unsa ang bag-ohay lang nga gitudlo sa mga propeta, apostoles, ug ubang mga lider sa Simbahan diha sa social media kabahin sa kagawasan sa relihiyon.
Ang matag usa adunay katungod sa pagpili sa iyang tuhoan o wala gayoy tuhoan. Ug kitang tanan gikinahanglan nga motabang sa pagpanalipod sa kagawasan sa relihiyon.
“Ang relihiyon sa usa ka tawo wala gipamugos sa uban,” nagtudlo si Presidente Russell M. Nelson. “Wala kini gitino nang daan. Usa kini ka personal ug sagrado nga pagpili, nga nahimutang sa kinauyokan sa tawhanong dignidad.
“Busa, kinahanglang buhaton ang mainampingon nga pagseguro nga ang gobyerno magpabiling tinuod nga neyutral sa mga butang sa relihiyon, dili lamang sa mga pulong o konstitusyonal nga mga garantiya, apan usab sa walay pinalabi nga paggamit sa balaod. Ang mga indibidwal ug mga institusyon natural nga mahilig sa pagtinguha nga palabihon kay sa uban, apan ang estado kinahanglan nga dili magpadala niana nga mga hilig. Ang dili makiangayon nga pagtratar sa laing relihiyon agig pabor sa usa ka relihiyon, gamit ang dili relihiyoso nga mga puli nga ngalan sama sa ‘kultura’ o ‘kasaysayan,’ mao ang dili makiangayon nga pagtratar sa uban. Kon ang estado motugot sa pagdominar sa bisan unsang relihiyosong institusyon ngadto sa lain, ang diskriminasyon moresulta, nga motugot sa dili patas nga pagtratar ug ikamahay nga pagdili sa ubang mga relihiyosong katilingban.”
Makakat-on kamo og dugang mahitungod sa kagawasan sa relihiyon gikan niining mga mensahe sa kinatibuk-ang komperensiya ug diha sa religiousfreedom.ChurchofJesusChrist.org. Makakat-on usab kamo og dugang gikan sa gipakigbahin sa mga lider sa Simbahan mahitungod niini nga hilisgotan sa social media niining mosunod nga mga kinutlo:
Maisog nga Magtiayon nga anaa sa Kamot sa Ginoo
“Karon ang Tibuok Kalibotan nga Adlaw sa Kagawasan, nga nagsaulog sa pagkapukan sa Berlin Wall ug sa pagtapos sa komunistang pagmando sa Central ug Eastern Europe. Usa kini ka adlaw sa paghinumdom sa kaisog sa maisog nga mga lalaki ug mga babaye nga nakig-away, ug nagpadayon sa pagpakig-away, alang sa kagawasan sa tibuok kalibotan.
“Ang usa niining maisog nga magtiayon mao sila si Olga ug Jirí Snederfler, kinsa nangulo ug nagsuporta sa mga miyembro sa Ang Simbahan ni Jesukristo sa mga Santos sa Ulahing mga Adlaw sa kanhi Czechoslovakia bisan pa sa dakong personal nga risgo ug sakripisyo. Gisangonan ko sa pagtabang sa Simbahan nga makaangkon og opisyal nga pasidungog niana nga nasod, ug dili unta kini posible kon wala ang kaisog ug pagtuo sa mga Snederflers sa pagsunod sa Manluluwas.
“Pinaagi sa ilang tabang isip mga lungsoranon sa Czech, nakahimo kami ug mga tigom uban sa mga opisyal sa gobiyerno ug mihimo og petisyon aron ang atong mga miyembro maila niana nga nasod ug makasimba sa dayag, imbes sa tago. Dili gyod nako makalimtan ang usa ka mahinungdanon nga miting sa dihang si Josef Hromadka, ang bag-ong representante nga punong ministro sa Republika sa Czechoslovakia, misaad kanamo nga kini nga pag-ila moabot.
“Sa samang adlaw, mibiyahe kami ngadto sa Mount Karlstein, diin si Elder John A. Widtsoe mipahinungod sa nasod alang sa pagsangyaw sa ebanghelyo niadtong Hulyo 24, 1929. Didto, mihalad ako og pag-ampo sa pagpasalamat sa pagpanginlabot sa Ginoo alang sa mga Santos sa Czechoslovakia. Samtang naghunahuna ko bahin kang Olga ug Jirí Snederfler, napahinumdoman ko nga kadaghanan sa kaisog sa kalibotan dili makita ug nga ang Ginoo sa kasagaran mogamit sa wala damha aron maoy mopatuman sa imposible.”
President Russell M. Nelson, Facebook, Nov. 9, 2021, facebook.com/russell.m.nelson.
4 ka Sugyot sa Pagmugna og Panaghiusa alang sa Kagawasan sa Relihiyon
“Ang kagawasan sa relihiyon nag-atubang ug seryoso nga mga hagit sa tibuok kalibotan ug nangayo ug panaghiusa sa mga denominasyon aron atubangon kini nga mga hagit. Naghatag ako og upat ka sugyot nga makatabang kanato sa pagmugna niini nga panaghiusa:
-
Ilha nga kinahanglan nato ang usag usa ug ang tanan ubos sa balaod
-
Iawhag ang relihiyosong pagkamatugtanon
-
Ipahibalo sa kalibotan ang maayo nga mahimo sa relihiyon
-
Maghiusa ug mangita og komon nga basehan sa pagpanalipod ug pagpalambo sa kagawasan sa relihiyon
“Kon ang mga lungsoranon makakat-on sa pagpuyo inubanan sa respeto—bisan pa sa importante nga mga kalainan sa relihiyon—sila usab mas lagmit nga magpuyo nga malinawon uban niadtong adunay importante nga sekular nga mga kalainan. Sa kataposan, ang relihiyon mopalig-on sa katilingban alang sa tanan—alang sa magtutuo ug niadtong walay pagtuo.”
President Dallin H. Oaks, Facebook, July 20, 2022, facebook.com/dallin.h.oaks.
Mas Dakong Kahibalo ug Pagpasalamat sa Usag Usa
“Isip mga miyembro sa Ang Simbahan ni Jesukristo sa mga Santos sa Ulahing mga Adlaw, nagtuo kita nga kitang tanan managsoon. Gitudlo ni Jesukristo nga ang duha ka labing dako nga mga sugo mao ang paghigugma sa Dios ug ang paghigugma sa usag usa.
“Si Elder Gerrit W. Gong ug ako bag-o lang naghisgot kon sa unsang paagi ang mga Santos sa Ulahing mga Adlaw ug ang mga Muslim mas makasabot sa usag usa sa dayag, matinud-anon, ug tinuod nga mga paagi. Naglakip kini sa pagtan-aw lapas sa mga bakak, dili makiangayon nga pagtan-aw ngadto sa ubang tawo, o paghusga sa kinatibuk-an sumala sa usa ka panghitabo.
“Samtang nakighimamat kami sa mga lider sa Muslim sa tibuok kalibotan, naghisgot kami mahitungod sa pagpanalipod sa kagawasan sa relihiyon. Ang mga tawo nga adunay pagtuo kinahanglang mobarog nga magkauban alang sa pagtahod sa kabubut-on ug dignidad sa mga tawo sa tanang relihiyoso nga pagtuo. Sama sa ubang mga Muslim sa Estados Unidos o bisan asa sa kalibotan, ang mga Santos sa Ulahing mga Adlaw nakabati sa mga epekto sa paglutos ug pagsuspetsa sumala sa kalidad sa pagkatawo o kinaiya. Niapil kita sa maayong mga tawo sa bisan asa sa pagkondenar sa maong mga aksiyon.
“Usahay, adunay pipila ka mga miyembro sa Simbahan ang mihimo og bakak o mapintas nga mga komento mahitungod sa mga Muslim. Ang sama niana nga dili makiangayon nga pagtratar maoy hinungdan nga daghan ang wala magtagad sa kamabination ug kaayo sa kadaghanan sa tanan nga mga Muslim. Hinaot nga ang mas dakong kahibalo ug pagkamapasalamaton sa usag usa makatabang kanato nga mahimong mas buotan ug mas tukma sa atong gisulti ug gibati sa usag usa.”
Elder David A. Bednar, Facebook, Jan. 20, 2022, facebook.com/davida.bednar.
Ang Lawom nga Kahulogan sa Hugot nga Pagtuo diha sa Katilingban
“Nabalaka kaayo ko nga ang halawom nga mga panalangin nga nagdagayday gikan sa relihiyosong kadasig sagad makita nga sukwahi sa unsa ang labing gihatagan og bili sa atong katilingban. Gipunting nako ang pipila ka mga pulong sa mga panalangin nga mawala kon kita magpakabungol sa tono sa musika sa hugot nga pagtuo.
“… Dili lamang kita manalipod sa atong abilidad sa pagpamahayag sa atong relihiyon apan panalipdan usab nato ang katungod sa matag relihiyon sa pagpangalagad sa kaugalingong mga doktrina ug mga balaod niini.
“Akong panghinaot nga pinaagi sa atong gitudlo ug sa atong panig-ingnan, makatabang kita sa pag-establisar pag-usab sa lawom nga kahulogan sa hugot nga pagtuo diha sa atong katilingban.”
Elder Quentin L. Cook, Facebook, June 28, 2021, facebook.com/quentin.lcook.
Kahiusahan sa mga Tinuohan
“Ang akong hangyo mao nga ang tanang relihiyon magtinabangay sa pagpanalipod sa pagtuo ug kagawasan sa relihiyon sa paagi nga manalipod sa mga tawo sa lainlaing pagtuo ingon man niadtong walay tinuohan. Ang mga Katoliko, mga Ebanghelista, mga Judeo, mga Muslim, mga Santos sa Ulahing mga Adlaw, ug uban pang mga tinuohan kinahanglan nga kabahin sa kahiusahan sa mga tinuohan nga nagtabang, nagsilbing santuwaryo, ug nagpasiugda sa kagawasan sa relihiyon sa tibuok kalibotan.
“Ang pagtamod sa mga tulubagon sa relihiyon makabenepisyo sa sekular nga katilingban. Adunay daghang maayong mga buhat nga idasig sa relihiyon ngadto sa mga tawo nga adunay pagtuo aron buhaton nila alang sa uban. Ang makitawhanon nga mga paningkamot sa mga organisasyon nga nakabase sa relihiyon makahimo og mga butang nga labaw kay sa mahimo sa uban. Kini ang akong personal nga pag-ampo nga kita sa tingob makapausbaw sa pagpasalamat sa hugot nga pagtuo ug tulubagon ngadto sa Dios samtang atong panalipdan ang kagawasan sa relihiyon.”
Elder Quentin L. Cook, Facebook, Jan. 16, 2022, facebook.com/quentin.lcook.
Ang Gidangatan sa Daghang Gimahal nga mga Kagawasan
“Ang kagawasan sa relihiyon mopanalipod dili lamang sa mga tumotuo, apan sa tanan. Kini ang punoang gamot nga nagsustenir ug nag-amuma sa daghang uban pang sukaranan nga mga kagawasan, mithi, ug mga butang nga makaayo sa kadaghanan. Kon walay lig-on nga panalipod alang sa kagawasan sa relihiyon, kadaghanan sa atong gipakabahandi mahitungod sa atong mga demokratiko nga katilingban, lakip ang tawhanong katungod ug tawhanong dignidad, magsugod sa pagkalaya ug pagkamatay, sama sa mga bulak nga giputol gikan sa ilang mga gamot. Ang gidangatan sa daghang gimahal nga kagawasan ug sa liberal nga demokrasya mismo mao ang nagpabuhi sa kusog sa kagawasan sa relihiyon.
“Akong ipamatuod ang mahangtorong tawhanong dignidad sa matag tawo isip pinalanggang anak sa Dios. Akong ipamatuod nga ang matag usa kanato adunay balaanong kinaiya ug kapalaran. Dili lamang kita sulagma lang nga mitumaw sa usa ka bugnaw ug walay pagtagad nga uniberso. Nailhan kita ug gihigugma sa usa ka Dios nga nahibalo sa tanan ug mahigugmaon sa tanan.
“Akong ipamatuod usab nga ang matag usa kanato adunay katungod sa paggamit sa moral nga kabubut-on—ang katungod sa pagpili sa pagpuyo sa atong kinabuhi sumala sa kamatuoran sumala sa atong pagsabot niini. Sa pagkatinuod, usa sa nag-unang katuyoan sa panggamhanan mao ang pagseguro sa kagawasan sa tanang tawo sa paggamit sa moral nga kabubut-on.”
Elder D. Todd Christofferson, Facebook, Nov. 29, 2021, facebook.com/dtodd.christofferson.
Usa ka Benepisyo sa Tanang Katilingban
“Ang kagawasan sa relihiyoso nga mga tawo ug mga institusyon aron makalihok sumala sa ilang pagtuo ug mga tinuohan maoy sukaranan sa kaayohan sa katilingban. Ang relihiyon makabenepisyo dili lamang sa mga magtutuo kondili sa tibuok katilingban, lakip sa mga dili magtutuo.
“Ang relihiyoso nga tanlag nag-awhag sa mga hiyas ug mga batasan sa maayong pagkalungsoranon nga gikinahanglan alang sa usa ka gawasnong katilingban: pagkamatinuoron, katungdanan, moral nga disiplina sa kaugalingon, sakripisyo alang sa pamilya ug nasod, kaluoy ug pagserbisyo ngadto sa uban, ug sibiko nga pakiglambigit.”
Elder D. Todd Christofferson, Facebook, Jan. 16, 2022, facebook.com/dtodd.christofferson.
Ang Kagawasan sa Pag-uswag
“Nadasig ko sa tanan nga atong gipaambit sa daghang mga relihiyon sa tibuok kalibotan, ilabi na sa pasalig ngadto sa Dios ug sa gugmang putli. Ang matuod nga relihiyon moaghat kanato sa pagtabang niadtong nanginahanglan. Walay duhaduha ang kalibotan nagkinahanglan kanato ug sa atong tinguha sa ‘pagbuhat og maayo,’ uban sa saad nga ang Dios magauban kanato.
“Sa tibuok kasaysayan niini, Ang Simbahan ni Jesukristo sa mga Santos sa Ulahing mga Adlaw mihatag og gibug-aton nga ang pagpanalipod sa tanang tinuohan—bisan ang gagmay, minoriya nga mga tinuohan—mahinungdanon. Kon ang mga tawo mobati nga masaligon nga ang ilang mga tinuohan kanunay nga mapanalipdan, motabang sila sa uban sa mahinungdanong mga paagi. Kon ang relihiyon hatagan og kagawasan nga molambo, ang mga tumutuo bisan asa makahimo og yano ug usahay bayanihon nga mga buhat sa pagserbisyo.
“Nanghinaot ko nga ang unibersal nga kaayo nga giaghat sa mga tradisyon sa pagtuo pasidunggan ug dayegon. Hinaot magmapasalamaton kita sa oportunidad nga makahimo og kalainan. Ang kaayohan sa relihiyon, ang impluwensiya sa relihiyon, ug ang bayanihong mga buhat sa gugma nga gidasig sa relihiyon modaghan lamang kon atong panalipdan ang kagawasan sa relihiyon.”
Elder Ronald A. Rasband, Facebook, Sept. 13, 2021, facebook.com/RonaldARasband.
Nanalipod sa Tanang Pagtuo
“Ang paghigugma sa inyong silingan dili lang usa ka maayo nga ideya; kana mao ang ikaduha nga dakong sugo. Ang inyong mga silingan mao ang inyong kapikas ug pamilya, mga miyembro sa ward, mga kauban sa trabaho, mga kauban sa kwarto [roommates], kadtong dili sama nato og tinuohan, kadtong nanginahanglan og matinabangon nga kamot, ug, sa pagkatinuod, tanang tawo.
“Nadasig ko sa tanan natong gipaambit sa daghang relihiyon sa kalibotan—ilabi na sa pasalig sa Dios ug sa gugmang putli.
“Ang tinuod nga relihiyon moaghat kanato sa pagtabang niadtong nanginahanglan, nga maoy usa ka rason nganong ang pagpanalipod sa tanang tinuohan importante.”
Elder Ronald A. Rasband, Facebook, Jan. 18, 2022, facebook.com/RonaldARasband.
Joseph Smith ug ang Kagawasan sa Relihiyon
“Niining anibersaryo sa kamatayon ni Joseph Smith, mapasalamaton ko sa tanan niyang gibuhat sa pagtukod sa Simbahan ni Kristo dinhi sa yuta. Dili lamang siya direkta nga nalambigit sa pagpahiuli sa doktrina sa mga kamatuoran nganhi sa yuta; mipasiugda usab siya alang sa mga katungod sa mga Santos sa paggamit sa ilang relihiyoso nga mga pagtuo.
“Nangamuyo siya sa mga gobyerno, nakigkita sa presidente sa Estados Unidos, ug gibalik-balik nga gipriso tungod sa iyang pagtuo. Sa wala pa ang eleksyon sa pagkapresidente niadtong 1844, misulat siya sa lima ka mga kandidato sa pagkapresidente aron tan-awon kon aduna ba kanila ang motabang sa mga Santos sa pagbawi sa ilang mga kabtangan sa Missouri. Walay usa nga gustong motabang.
“Pinaagi sa pag-awhag sa mga lider sa Simbahan, si Joseph Smith mideklarar sa iyang kandidatora sa pagkapresidente. Ang iyang plataporma naglakip sa reporma sa konstitusyon, reporma sa bilanggoan, reporma sa bangko, ug ang pagwagtang sa pagkaulipon. Nag-una ang iyang panglantaw ug mipasiugda alang sa tawhanong dignidad sa tanang mga anak sa Dios ug sa ilang mga katungod sa kaugalingong determinasyon. Siya ang unang kandidato sa pagkapresidente sa US nga gipatay.
“Akong gidayeg ug gihigugma si Joseph Smith, kinsa mihatag sa tanan alang sa Ginoo ug sa Iyang Simbahan. Ang pagpatay niya nagpamatuod sa punto sa iyang pagdagan sa pagkapresidente: nga ang relihiyosong kagawasan ug kaugalingong paghukom kinahanglang panalipdan alang sa tanan.”
Elder Dale G. Renlund, Facebook, June 27, 2021, facebook.com/DaleGRenlund.
Ang Talagsaong Pag-usbaw sa Tawhanong Dignidad
“Gipasidunggan ko sa pagpaambit og mga hunahuna bahin sa talagsaong pag-usbaw sa tawhanong dignidad sa Tibuok Kalibotan nga Kongreso sa Pagsabotsabot sa Lainlaing mga Relihiyon ug Lainlaing mga Kultura didto sa Argentina karong semanaha.
“Gipakigbahin nako nga ang dignidad mao ang pagkahibalo kon kinsa kita isip mga tawo. Ang pagpangita sa kinatas-ang kahulogan, isip indibidwal man o komunidad, usa ka sagrado nga katungod. Isip mga anak sa usa ka mahigugmaong Langitnong Amahan, hinaot nga atong tagdon ang usag usa sumala sa dignidad nga Iyang gusto nga atong tinguhaon.
“Ang dignidad adunay balaanong gigikanan. Kini ang atong unibersal nga katungod sa atong pagkatawo. Ang matag usa adunay dignidad pinaagi lamang sa pagkahimong tawo, bisan unsa pa ang relihiyon, kaliwat, sekso, o nasyonalidad. Ang Unibersal nga Pamahayag sa Tawhanong mga Katungod [Universal Declaration of Human Rights] nag-ingon nga ang dignidad mao ang ‘pundasyon sa kagawasan, hustisya ug kalinaw sa kalibotan.’ Busa, kita adunay katungod sa kinabuhi, kagawasan, seguridad, patas nga panalipod sa balaod, ug kagawasan sa panghunahuna, pagsulti, ug relihiyon. Ang mga katungod naggikan sa dignidad, ug ang dignidad resulta sa mga katungod. Ang duha nagpalambo sa usag usa pinaagi sa legal ug pagtinabangay sa kultura. Kinahanglan natong makita ang repleksyon sa atong kaugalingon diha sa usag usa—atong mga damgo, paglaom, kasakit, ug pagkawalay paglaom. Kay kon dili, mahimo kitang mga estranghero ug mga langyaw. Atong madiskobrehan ang atong dignidad pinaagi sa pagbati sa bation sa uban.”
Elder Ulisses Soares, Facebook, June 9, 2023, facebook.com/soares.u.