“Mensahe gikan sa Dios alang Kanako,” Liahona, Hulyo 2024.
Mga Tingog sa mga Santos sa Ulahing mga Adlaw
Mensahe gikan sa Dios alang Kanako
Wala ko nakabaton og pagpamatuod sa Basahon ni Mormon hangtod nga ang Ginoo namulong kanako pinaagi sa basahon ni Helaman.
Litrato sa maayong kabubut-on sa tagsulat
Sa dihang gidapit ko sa usa ka higala ngadto sa Ang Simbahan ni Jesukristo sa mga Santos sa Ulahing mga Adlaw niadtong 2020, nagduhaduha kong miuyon. Sa sinugdanan, wala nako gibati nga nahisakop ko didto nga dapit, apan nagpadayon ko sa pagtambong sa panagtigom alang sa sakramento. Sa kataposan, nabunyagan ko.
Apan, wala ko nakasabot sa konsepto sa pagbaton og pagpamatuod sama sa gipamulong sa ubang mga miyembro sa Simbahan. Ang sister nga mga misyonaryo ug ako mibasa og dungan sa pipila ka bersikulo sa kasulatan, apan wala gayod nako maablihi ang Basahon ni Mormon sa akong kaugalingon. Bisan pa sa dakong mga paningkamot sa mga miyembro sa Simbahan sa pag-abiabi nako ug sa pagpabilin nakong aktibo, sa wala madugay nagsugod ko nga ulahi na nga moabot sa simbahan, dili motambong sa mga miting, ug mibalik ngadto sa usa ka kalibotanon nga kahimtang.
Dayon miabot ang usa ka adlaw diin ako adunay dakong kausaban sa pagbati uban sa usa ka nabalaka nga kasingkasing. Gibati nako nga dili gayod ako lig-on, kalibotanon, ug masupakon ngadto sa mga butang sa Dios. Akong naamgohan nga wala ako sa husto nga dalan. Samtang anaa niini nga pagbati, mipasiplat ko ngadto sa mga kasulatan diha sa akong higdaanan.
Mitawag ako sa Dios sa pagsulti og usa ka butang kanako. Misulti ko og gamay nga pag-ampo ug nagpaabot nga makadungog gayod og bisan unsa. Nagkinahanglan ko og gamayng kahupay ug kaklaro.
Ug dayon nakadungog ko og usa ka butang. Wala ko nakahibalo kon ang tingog naggikan ba sa sulod sa akong hunahuna o sa sulod sa akong mga dalunggan, apan nadungog nako ang mga pulong nga “Helaman 3:27.” Nasayod ko nga ang basahon ni Helaman anaa diha sa Basahon ni Mormon, mao nga gikuha nako ang mga kasulatan ug miadto sa talaan sa mga sulod aron sa pagpangita niana nga basahon.
Ang unsay akong nabasa sa sunod mao ang usa ka mensahe gikan sa Dios alang kanako nga piho alang niana nga higayon sa akong kinabuhi: “Sa ingon kita makakita nga ang Ginoo maluluy-on ngadto sa tanan kinsa, diha sa katim-os sa ilang mga kasingkasing, motawag nganha sa iyang balaan nga ngalan.”
Kini nga tudling miusab sa akong panghunahuna mahitungod sa akong mga aksiyon ug mahitungod sa Basahon ni Mormon. Naamgohan nako nga ang akong mga aksiyon ug pagkadili sinsero ngadto sa Dios sayop gayod ug nga gikinahanglan nakong motawag Kaniya ug maghinulsol. Nasayod ko nga ang Dios dili magdumili kanako sa Iyang mga kaluoy ug mga panalangin kon sinsero lang ko sa pagtawag Kaniya ug pagsunod Kaniya.
Mao kana ang paagi nga miabot ang akong pagpamatuod sa Basahon ni Mormon—usa ka basahon nga ako nagpakita og walay interes sa pagbasa. Nasayod ako nga buhi ang Dios, nga Siya namulong kanato karon, ug nga ang Basahon ni Mormon tinuod.