“Ayaw Kapakyas sa Pagpahimulos sa usa ka Misyon alang sa mga Senior,” Liahona, Hulyo 2024.
Nagkatigulang nga Matinud-anon
Ayaw Kapakyas sa Pagpahimulos sa usa ka Misyon alang sa mga Senior
Ang atong mga pakigsaad nagdapit kanato sa pagserbisyo sa usag usa, sa pagbarog isip usa ka saksi sa Dios, ug sa paghupay niadtong nagkinahanglan og kahupay. Ang pagserbisyo isip usa ka senior nga misyonaryo mao ang usa ka paagi sa pagtuman niini nga mga pagdapit, nagpanalangin sa atong kaugalingon nga mga kinabuhi ug niadtong adtong giserbisyohan.
Adunay 34,000 ka senior nga mga misyonaryo nga full-time nga nagserbisyo o anaa sa pangserbisyo nga mga misyon karon kinsa, sama sa ilang mas batan-on nga mga kamisyon, nga nakakaplag og daghang kalipay sa ilang panaw. Ang mga dili minyo ug ang mga magtiayon mahimong moserbisyo isip senior nga mga misyonaryo sa nagkadaiya nga mga buluhaton.
Ug hilabihan ang mga panginahanglan. Sa Oktubre 2023 nga kinatibuk-ang komperensiya, si Elder Ronald A. Rasband sa Korum sa Napulog Duha ka Apostoles miawhag sa mga tigulang nga mga miyembro sa pagkonsiderar og usa ka misyon alang sa mga senior. Nangutana siya: “‘Unsa ang inyong gibuhat niini nga hugna sa inyong kinabuhi?’ Adunay daghan kaayo nga mga paagi nga ang senior nga mga misyonaryo makabuhat sa unsay dili mabuhat ni bisan kinsa. Kamo usa ka talagsaon nga puwersa alang sa kaayohan, adunay daghang kasinatian sa Simbahan, ug anaa sa nindot kaayo nga posisyon sa pag-awhag ug pagluwas sa mga anak sa Dios.”
Nagpasabot kon giunsa pagtawag ang senior nga mga misyonaryo, si Presidente Russell M. Nelson miingon: “Ang mga oportunidad alang sa senior nga mga misyonaryo nagkadaiya ug halapad. Ang ilang mga tawag sa pagserbisyo opisyal nga gihimo human gihatag ang mainampoon nga konsiderasyon sa ilang kaagi sa panarbaho, kasinatian sa pinulongan, ug personal nga mga kapabilidad. Sa tanan nga mga kwalipikasyon sa pagserbisyo, ang usa ka tinguha sa pagserbisyo mao ang labing importante.” Gihulagway usab niya ang mga kontribusyon sa senior nga mga misyonaryo nga “dili gayod mahulipan.”
“Pipila sa senior nga mga misyonaryo nagtrabaho diha sa buhatan sa misyon o sa BYU–Pathway o sa humanitarian nga mga inisyatiba nga adunay maayo nga pagkaporma nga estruktura,” miingon ang usa ka senior nga misyonaryo. “Nakaserbisyo kami mismo sa pipila niadto nga mga matang sa mga misyon. Mao nga medyo dili kami segurado sa dihang gitawag kami ngadto sa usa ka MLS (miyembro ug lider nga suporta) nga misyon. Sa dihang nakasugod kami, ganahan kaayo kami sa pagkamapahiangayon ug pagkamamugnaon nga gihatag kanamo niana nga matang sa misyon sa pagbisita sa mga miyembro ug paglig-on sa lokal nga mga branch.”
Usa ka senior nga sister nga nagserbisyo didto sa usa ka sentro alang sa mga bisita [visitors’ center] miingon, “Sa dihang mitaliwan ang akong bana, dili ko segurado kon unsay buhaton sa akong panahon. Karon ako adunay mga butang nga buhatonon, mga dapit nga adtoonon, mga tawo nga himamaton. Ako adunay mga tawo nga nagdepende kanako.”
“Dili kinahanglan mabalaka bisan kon ikaw wala makaserbisyo sa dihang mas batan-on pa,” mipahayag ang usa ka sister human mipauli gikan sa iyang senior nga misyon. “Kini usa ka bag-o nga katungdanan alang sa tanan. Kaming tanan nagdungan sa pagkat-on sa pagsalig sa Ginoo ingon man sa usag usa ug nakakaplag nga ‘pinaagi sa gagmay ug yano nga mga butang ang mga dagko nga butang ipahinabo’ [Alma 37:6].”
Mga Panalangin alang sa mga Misyonaryo
Ang mga misyon alang sa mga senior magkalainlain sama ra sa senior nga mga misyonaryo. Aduna sa tanang matang—ang matag usa adunay kaugalingon niining mga hagit, mga kalipay, ug personal nga mga kaayohan. Apan adunay pipila ka butang nga komon alang sa bisan unsang matang sa misyon alang sa mga senior: makahuloganon nga pagtuon sa kasulatan, makanunayon ug tiunay nga mga pag-ampo, madasigon nga pagserbisyo, padayon nga giya gikan sa Espiritu Santo, ug usa ka talagsaon nga oportunidad sa paghimo og kalainan.
“Wala gayod ako sukad mibati nga mas duol ngadto sa Ginoo kaysa dihang nagserbisyo kami isip senior nga mga misyonaryo,” miingon ang usa ka senior nga mga misyonaryo. “Nasayod ko nga pipila ka butang wala na sa akong kontrol, ilabi na sa mga anak ug mga apo didto sa panimalay. Mao nga gisalig nako ang mga butang diha sa mga kamot sa Ginoo. Ug Siya mipanalangin sa among pamilya. Nahimo gayod kaming suod kaayo sa among mga apo pinaagi sa pagpakigsulti kanila matag semana diha sa Zoom. Naghisgot kami mahitungod sa mga butang nga dili gayod unta nila ganahan kaniadto. Samtang dili kini mahitabo ngadto sa tanan, sa among sitwasyon, usa ka anak nga lalaki mibalik sa simbahan samtang nagserbisyo kami, ug laing anak nga lalaki nagminyo og usab ug sa wala madugay naselyo diha sa templo.”
Laing senior nga misyonaryo miingon, “Ang among inadlaw nga personal ug magkauban nga pagtuon sa kasulatan nahimong mas makahuloganan tungod kay nangita kami og mga paagi sa paggamit sa mga kasulatan, dili lang sa pagbasa niini. Wala lang ko nagtutok sa gidaghanon sa akong gibasa sama sa akong gibuhat usahay kaniadto. Sa among pagserbisyo, ingon og kanunay ko nga magtamod sa usa ka kasulatan nga among nabasa nianang adlawa o nianang semanaha, mao nga nagsugod ko sa paglaom sa paggamit sa bag-ohay nga mga kasulatan nga akong nabasa matag adlaw. Dili na kaayo ko ingon nga walay pagpakabana sa akong pagtuon sa kasulatan, nagpaabot nga nagtamod ko sa usa ka butang nga akong nabasa atol sa adlaw.”
“Ang pagserbisyo og misyon mihatag kanako og usa ka bag-o nga rason nga mahimong mas interesado sa kinabuhi,” miingon ang usa ka senior nga sister. “Mihatag kini kanako og usa ka makahuloganon nga katuyoan, usa ka bag-o nga kalipay sa pagpakabuhi, ug usa ka butang nga buhaton labaw pa sa pag-golf o pagbantay sa mga apo.”
“Ang pagserbisyo makaayo kanimo ingon nga kini makaayo sa uban,” mipahayag ang laing senior nga misyonaryo. “Sa dihang naghunahuna kami—arogante og gamay—mahitungod kon unsa ka dako ang among gibuhat alang sa uban, kami wala kaayoy kalamposan. Apan sa dihang naamgohan namo kon unsa ka daghan ang among nakat-onan ug napalambo sa among kaugalingon, dili lang kay nausab kami apan ang uban ingon og nahimong mas interesado sa unsay among gisulti ug gibuhat. Ang benepisyo nga among nadawat labaw pa gayod kay sa among gidahoman.”
Mas Lig-on nga mga Relasyon
Kon ang mga tawo moserbisyo isip senior nga mga misyonaryo, nagpalambo sila og lawom nga mga relasyon nga molungtad sa tibuok kinabuhi. Daghan ang nahimong suod ngadto sa mga tawo nga ilang giserbisyohan. Nag-ugmad usab sila og lig-on nga mga relasyon sa ubang mga misyonaryo ug lokal nga mga lider. “Nakamugna kami og mga panaghigalaay sa mas batan-on nga mga misyonaryo, ubang mga magtiayon, ug mga tawo nga dili gayod unta namo mahimamat kon nagpabilin ra kami sa panimalay,” miingon ang usa ka senior nga misyonaryo. “Mokontak gihapon kami sa usag usa. Sa panahon nga naghunahuna ko nga ang matag adlaw mamahimong susama ra, ang pagmisyon nakahatag kanamo og usa ka bag-o nga sinugdanan ug bag-o nga mga higala nga nakigbahin sa panaw uban kanamo.”
Ang senior nga mga misyon makatabang sa mga magtiayon sa pagpalig-on usab sa ilang mga kaminyoon. Samtang ang mga tawo moretiro o mopamenos sa panahon sa pagtrabaho, ang mga magtiayon tingali makaamgo nga gikinahanglan nilang ikonsiderar pag-usab ang usa ka komon nga katuyoan nilang duha kay sila wala nay gipadako nga mga anak sa ilang panimalay. Tingali naanad na pod sila nga mag-iyahay sa pagbuhat sa mga butang sa ilang kaugalingong mga eskedyul. Ang pagkatigulang o pagretiro makausab niana. Ang pagsugod og bag-o, giambitan nga kasinatian nga magkauban, pagserbisyo man kini gikan sa panimalay o full-time nga misyon alang sa mga senior, makatabang sa pagmugna og usa ka bag-o nga katuyoan alang sa usa ka magtiayon ug makapalig-on sa ilang pagsalig sa usag usa.
“Adunay karaan nga panultihon nga sa pagretiro ‘makuha nimo ang katunga sa kinitaan ug ang asawa mas doble sa bana kon mogasto kay sa kaniadto,’” nagkatawa nga miingon ang usa ka sister. “Ang pagserbisyo og usa ka misyon didto sa usa ka dapit nga layo sa panimalay nagtugot kanamo sa paghisgot niini nga mga kausaban sa mga paagi nga dili gayod unta mabuhat sa wala pa ang among misyon. Human miretiro ang akong bana, dili kami mag-istorya kon kami adunay mga panagsumpaki. Karon, imbes mag-iyahay kami ug ibaliwala ang usag usa, dili kami ganahan nga makahimo og negatibo nga epekto sa buhat sa Ginoo, mao nga hisgotan namo kon unsa ang nakasamok kanamo.”
“Ang akong asawa ug ako nagsugod sa pag-istorya matag gabii mahitungod sa malumo nga mga kaluoy nga nabatonan namo matag adlaw samtang nagserbisyo sa among misyon,” miingon ang usa ka senior nga misyonaryo. “Dili lang nga nakatabang kini kanamo nga mas motutok sa unsay nahitabo ug dili kaayo motutok sa among mga kaugalingon, apan nakahatag usab kini kanamo og kahigayonan nga makakita sa kamaayo sa tibuok palibot namo bisan kon adunay mga bahin sa adlaw nga dili maayo.”
“Ug tungod kay kini mao ang kataposan nga butang nga among gihimo matag gabii,” midugang ang iyang asawa, “natulog kami nga menos ang kaugtas ug mas nakontento kaysa kaniadto sulod sa mga katuigan. Nakatabang gani kini kanako nga mas makatulog og maayo!”
Mga Panalangin alang Niadtong Ilang Giserbisyohan
Ang kinabuhi adunay mga kalamposan ug mga kapakyasan—maayong mga adlaw ug dili maayong mga adlaw. Mao usab ang mga misyon. Apan ang pagserbisyo sa Ginoo adunay daghang kinaiyanhon nga mga ganti, dili lang human nga natapos ang misyon apan atol usab sa misyon. Sama sa gisulti sa iyang ig-agaw nga si Mardoqueo ngadto ni Ester, “Kinsay nasayod nga nahimo kang rayna tungod ug alang sa panahon nga sama niini?” (Ester 4:14). Sa paghandom sa ilang serbisyo, daghang senior nga mga misyonaryo ang mibati nga gidestino sila ngadto sa usa ka buluhaton o sa usa ka dapit diin sa talagsaong paagi angayan sila sa pagtubag sa usa ka piho nga panginahanglan.
Nasinati gayod nako ang gamhanan nga kaayohan nga mabuhat sa usa ka senior nga magtiayon nga misyonaryo sa dihang nagpuyo ko sa Louisiana, USA. Wala madugay human gitawag sa pagserbisyo sa high council sa New Orleans Louisiana Stake, gitudlo ko sa pagsuporta sa Port Sulphur Branch. Adunay pipila lamang ka aktibo nga mga brother sa pagkapari diha sa branch. Kadaghanan sa mga posisyon sa pagtudlo ug pagpangulo gibuhat sa mga babaye kansang mga bana dili mga miyembro. Usahay, ang senior nga mga misyonaryo o mga lider sa stake gidestino sa branch, apan limitado ra ang ilang kalamposan sa pagtabang niining mga pamilya nga dili tanan miyembro.
Dayon usa ka senior nga magtiayon gikan sa Wyoming, USA, ang gidestino aron sa pagsuporta sa branch. Sila mga mag-uuma sulod sa daghang katuigan ug mitrabaho didto sa usa ka lokal nga gam-anan sa keso duol sa ilang panimalay. Tungod sa ilang kaagi ug kasinatian sa kinabuhi, sayon ra silang nakahimo og koneksiyon ngadto sa daghang tawo didto sa Port Sulphur kinsa mitrabaho sa industriya sa lana. Ang senior nga magtiayon migahin og dako gayod nga panahon sa pagpalambo og mga relasyon ug pagpangalagad ngadto sa mga pamilya nga dili tanan miyembro diha sa branch. Tungod sa ilang serbisyo ug gugma, atol sa ilang panahon didto sa Port Sulphur ang branch sa talagsaong paagi napalig-on ug napanalanginan pinaagi sa ilang matinud-anon nga serbisyo. Pipila ka lalaki gikan niining mga pamilya nga dili tanan miyembro mipasakop sa Simbahan, nagpalig-on sa korum sa mga elder ug sa branch.
Ang senior nga mga misyonaryo mopanalangin og mga kinabuhi—ilang kaugalingon ingon man sa uban. Ayaw kapakyas sa pagpahimulos sa maanindot nga mga kahigayonan nga moserbisyo ug molambo!