“Usa ka Istorya sa Kalamposan sa Misyonaryo: Mikabat og 60 ka Tuig una pa Makita ang Resulta,” Liahona, Hulyo 2024.
Usa ka Istorya sa Kalamposan sa Misyonaryo: Mikabat og 60 ka Tuig una pa Makita ang Resulta
Pagkamalipayon nga kasinatian kadto alang kanako nga makadungog nga ang usa ka binhi sa ebanghelyo nga gitisok mga katuigan nang milabay nagbunga.
Paghulagway ni Carolyn Vibbert
Ganahan ko kanunay sa Doktrina ug mga Pakigsaad 18:10: “Ang bili sa mga kalag mahinungdanon sa panan-aw sa Dios.” Ug usahay nagkinahanglan nga kadaghanan nato magtinabangay sa pagpakigbahin sa pagpamatuod aron sa pagdala og mga kalag ngadto sa Manluluwas (tan-awa sa 2 Mga Taga-Corinto 13:1).
Ako napahinumdoman bahin niining matahom nga konsepto sa hiniusang misyonaryo nga buhat sa dihang ako nakadawat og usa ka email usa ka adlaw. Usa ka brother kinsa miingon nga anak siya sa presidente sa misyon didto sa Witchita, Kansas, naghunahuna kon ako ba ang asawa ni Robert Monson. Ang brother mipadayon sa pagsulti nga siya nangita ni Elder Monson kinsa miserbisyo sa Central States Mission niadtong 1959. Akoa kanang bana.
Siya misulti kanako mahitungod sa duha ka batan-ong mga elder nga nadasig bag-ohay lang sa pagsulod sa usa ka apartment nga bilding. Nanuktok sila sa unang pultahan ug nakakita og usa ka tigulang nga babaye nga midapit kanila sa pagbalik sa sunod nga adlaw. Ilang gitakda ang oras.
Sa dihang mibalik na sila alang sa ilang appointment, ilang nahibaloan nga kining tigulang nga babaye adunay daan nga triple combination sa (Basahon ni Mormon, Doktrina ug mga Pakigsaad, ug Perlas nga Labing Bililhon) nga gihatag sa misyonaryo kaniya niadtong 1959. Gibasa niya kini sa makadaghang higayon ug nasayod nga ang mga pagtulon-an niini tinuod. Wala siya mopasakop sa simbahan kaniadto tungod kay ang iyang bana dili gusto nga motambong siya sa simbahan o mabunyagan. Ang iyang bana namatay na bag-ohay lang, ug siya nag-ampo nga unta iyang makit-an pag-usab ang mga misyonaryo. Diha sa iyang triple combination adunay mga ngalan sa duha misyonaryo gikan pa sa 1959: Robert Monson ug Granade Curran, ang akong bana ug ang iyang kompanyon.
Paglabay sa misunod nga pipila ka semana, kining babaye nakahibalo mahitungod sa plano sa kaluwasan ug sa mga panalangin sa templo. Ang iyang anak nga lalaki namatay sa edad nga 22, ug siya malipayon sa posibilidad nga mahiusa uban kaniya. Dihang ang mga misyonaryo midapit kaniya nga magpabunyag, malipayon niyang gidawat ang ilang imbitasyon.
Ang akong bana ug ang iyang kompanyon, si Elder Curran, namatay na, apan akong mahanduraw sila nga nanambong niining matahom nga bunyag gikan sa pikas tabil.
Samtang ang anak sa presidente sa misyon nagsulti kanako sa sugilanon, nahinumdom ko nga ang Manluluwas dili gayod mahikalimot ni bisan kinsa kanato. Siya kanunay nga nag-uban kanato kon kita motugot Kaniya diha sa atong mga kinabuhi. Ang Bag-ong Tugon nagsulti sa sugilanon ni Saqueo, kinsa mikatkat sa sikomoro nga kahoy aron makita ang Manluluwas (tan-awa sa Lucas 19:1–10). Bisan didto ibabaw sa kahoy, si Saqueo nakit-an sa Manluluwas, nga mihangyo nga mokaon ngadto sa iyang panimalay. Sa samang paagi, ang tigulang na nga babaye nag-ampo ug nagpaabot sa mga misyonaryo nga nanuktok sa iyang pultahan, ug gihimo nila kini. Ang Manluluwas nakaila kanatong tanan. “Kay mianhi ang Anak sa Tawo aron pagpangita ug pagluwas sa nawala” (Lucas 19:10).
Duha ka paresan sa misyonaryo—ang usa 60 kapin na ka tuig ang milabay ug dayon ang usa pa bag-ohay lang—ang midala niining sister ngadto ni Jesukristo ug agig bugti nakapalig-on sa ilang mga pagpamatuod ug nakakaplag og kalipay diha sa Ginoo. Ako mapaubsanon nga nag-obserbar niining istorya, gibati ang kalipay sa tanan nga nalambigit sa pagdala niining sister ngadto sa Manluluwas (tan-awa sa Doktrina ug mga Pakigsaad 18:15).
Ang tagsulat nagpuyo sa Utah, USA.