Digital Lamang

3 ka Ideya alang sa Pag-ugmad og Emosyonal nga Kalig-on

Ni Derek Hagey ug ni Glenn Schiraldi

Konsultant sa Mga Serbisyo alang sa Pamilya, Kalig-on [Family Services, Resilience Consultant]

Kining tulo ka sayon nga mga ideya makatabang nimo sa pagsugod—o sa pagpadayon—sa pag-ugmad og emosyonal nga kalig-on.

tulo ka babaye nagbarog ug nangatawa

Dili pa gayod ulahi ang pagsugod—o ang pagpadayon—sa pag-ugmad sa imong emosyonal nga kalig-on. Sama sa gitudlo ni Elder Neil L. Andersen sa Korum sa Napulog Duha ka Apostoles, ang Dios “mihimo sa inyong espiritu nga lig-on ug dili mabali sa mga alimpulos sa kinabuhi.” Apan kon imong makita ang imong kaugalingon nga dali masubo sa mga hagit sa kinabuhi, nga mahitabo natong tanan matag karon ug unya, ania ang pipila ka kahanas nga mapraktis nimo aron makasinati og dugang nga kalig-on sa imong kinabuhi:

1. Palig-ona ang imong relasyon ngadto sa Langitnong Amahan ug ni Jesukristo. Moapil sa espirituhanong mga buluhaton sama sa pag-ampo ug pagtuon sa kasulatan nga makatabang nimo nga mobati nga mas duol sa Langitnong Amahan, ug hinumdomi ang imong mahangtorong pagkatawo isip Iyang anak. Motuo ni Jesukristo, modawat og kalig-on gikan Kaniya pinaagi sa Iyang Pag-ula, ug mobati sa Iyang gugma alang nimo. Mangita og kalig-on pinaagi sa imong mga pakigsaad ug sa gahom sa pagkapari nga mahatag niini nganha sa imong kinabuhi kon ikaw magpuyo nga takos.

2. Mopalambo og lig-on nga mga relasyon. Mag-ugmad og makahuloganon nga mga relasyon diin mabati nimo nga konektado ngadto sa ubang mga tawo nga naglig-on nimo subay sa dalan sa pakigsaad. Ug hinumdomi nga ang imong bili anaa na daan ug nakabase sa imong pagkatawo isip anak nga lalaki o anak nga babaye sa Dios, dili sa unsay gihunahuna sa uban bahin nimo. Kon mangandam sa pagpakighinabi sa uban, sulayi kining mubo nga pagpamalandong gikan ni Elder Gary E. Stevenson sa Korum sa Napulog Duha ka Apostoles: “Wow, tan-awa ko! Talagsaon ako! Ako usa ka anak sa Dios! Siya nakaila kanako! Siya nahigugma kanako! Ako gigasahan—gigasahan og Espiritu Santo isip akong makanunayon nga kauban!” Dayon, hinumdomi ang talagsaon nga mga kinaiya nga gipanalangin sa Dios nganha nimo, ug relaks ug kalma lang.

3. Praktisa ang paghunahuna og celestial. Kon ang mga butang mahimong malisod, ang atong panglantaw kasagaran malimitahan, ug mosugod kita sa pagtutok sa kasamtangang gutlo sa kasubo. Pinaagi sa “paghunahuna og celestial,” atong mahinumdoman nga ang kasamtangang panlimbasog anaa sa mubo lang nga panahon.

Si Presidente Russell M. Nelson mipakigbahin: “Ang mga butang gayod nga makapahimo sa inyong mortal nga kinabuhi nga labing maayo nga kini mahimo mao gayod ang samang mga butang nga makapahimo sa inyong kinabuhi hangtod sa kahangtoran nga labing maayo nga kini mahimo! Karon, sa pagtabang kaninyo nga makaangkon sa buhong nga mga panalangin nga giandam sa Langitnong Amahan kaninyo, ako modapit kaninyo sa pagbansay sa ‘paghunahuna og celestial’! …

“Kon kamo mohimo og mga pagpili, ako modapit kaninyo sa pagtan-aw sa taas nga panglantaw—usa ka mahangtoron nga panglantaw.”

Dugang nga mga Kapanguhaan

Sa pagkat-on og dugang pa mahitungod sa pagpalambo og emosyonal nga kalig-on, enrol diha sa kurso nga pagbarog pinaagi sa kinaugalingon nga paningkamot nga “Pagkaplag og Kalig-on diha sa Ginoo: Emosyonal nga Kalig-on” (pakig-istorya sa imong mga lider sa ward o sa branch alang sa dugang nga impormasyon).

Sa pagkat-on mahitungod sa pipila ka benepisyo sa paggahin og panahon sa pagpamalandong ug paghinuklog sa atong mga kinabuhi, basaha ang “The Power of Quiet Moments [Ang Gahom sa Hilom nga mga Gutlo].”

Alang sa tabang sa pagpakig-istorya sa inyong mga anak mahitungod sa emosyonal nga kalig-on, tan-awa sa “6 ka Ideya alang sa Pagpakig-istorya mahitungod sa Emosyonal nga Kalig-on ngadto sa mga Anak.”

Mubo nga mga Sulat

1. Neil L. Andersen, “Espirituhanong mga Alimpulos,” Liahona, Mayo 2014, 18.

2. Tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 3.5, 3.6, Librarya sa Ebanghelyo.

3. Gary E. Stevenson, “Mga Pag-aghat sa Espiritu,” Liahona, Nob. 2023, 45.

4. Russell M. Nelson, “Paghunahuna og Celestial!” Liahona, Nob. 2023, 117.

5. Russell M. Nelson, “Paghunahuna og Celestial!,” 117, 118.