“Usa ka Maanindot nga Pagpangandam sa Kinabuhi,” Liahona, Hulyo. 2024.
Usa ka Maanindot nga Pagpangandam sa Kinabuhi
Unsa ang makat-onan sa mga batan-ong lalaki ug batan-ong mga babaye sa usa ka misyon mopanalangin sa ilang mga kinabuhi hangtod sa kahangtoran.
Sukad pa sa batan-on nga pangidaron, kanunay ko modayeg sa pagkamadasigon sa mga misyonaryo. Atol sa usa ka miting sa sakramento sa akong gamay nga branch sa Minas, Uruguay, ang usa ka misyonaryo mihatag sa iyang pagpamatuod ug mipadayag sa iyang mga pagbati mahitugod sa iyang misyon. Ang iyang mga pulong mipabilin sa akong hunahuna ug sa akong kasingkasing.
“Usa ka adlaw,” miingon ko sa akong kaugalingon, “moserbisyo ko og misyon.”
Sa kadugayan, isip usa ka priest, nakabaton ko og oportunidad sa pagkuyog sa mga misyonaryo diha sa mga leksiyon. Dili kadto makalimtan nga kasinatian nga mahimong usa ka misyonaryo sa edad nga 16!
Sa dihang nag-edad na ko og 18, pipila sa mga batan-on gikan sa akong branch nabalik na gikan sa ilang mga misyon, lakip sa akong igsoon nga si Ana, kinsa mipauli na gikan sa usa ka misyon sa Argentina. Ang ilang mga kasinatian ug mga pagpamatuod nakatandog usab sa akong kasingkasing.
Samtang ang akong ika-19 nga adlawng natawhan nagsingabot, gusto ko nga mohatag sa akong ngalan aron moadto ug mosangyaw sa ebanghelyo sa Manluluwas ug moserbisyo diha sa Iyang ubasan (tan-awa sa Doktrina ug mga Pakigsaad 75:2). Akong giandam ug gipadala ang akong mga papeles sa misyon. Sa dihang ang akong tawag miabot, akong giablihan ang sulat nga pirmado ni Presidente Spencer W. Kimball ug gibasa nga ako moserbisyo didto sa Uruguay/Paraguay Mission. Ako moserbisyo sa akong kaugalingon nga nasod! Ikaw gitawag ug gi-set-apart aron magpahayag og “maayo nga balita sa dako nga kalipay, gani ang walay kataposan nga ebanghelyo” (Doktrina ug mga Pakigsaad 79:1).
Miabot ko sa opisina sa misyon human mibiyahe og duha ka oras sakay sa bus ngadto sa Montevideo, Uruguay. Ang presidente sa misyon mi-set apart kanako isip usa ka misyonaryo alang sa Ang Simbahan ni Jesukristo sa mga Santos sa Ulahing mga Adlaw ug gihatagan ko sa usa ka kompanyon. Pagkahapon, misugod kami sa pagpanuktok og mga pultahan.
Sa sinugdanan, adunay mga panahon nga ang misyon dili ingon ka madasigon sama sa akong gihanduraw nga maingon kini. Salamat nalang, ako adunay masulundon ug kugihan nga kompanyon nga mitabang nako nga makakaplag og kalipay sa pagkalimot sa akong kaugalingon diha sa pagserbisyo sa Ginoo. Ang Iyang ehemplo mipanalangin kanako sa tibuok nakong misyon.
Apan ang akong pagpangandam nga mahimong usa ka representante sa Manluluwas nga si Jesukristo gisugdan kaniadto pa.
Gisugdan Kini sa usa ka Lugpit sa Kurbata
Niadtong Enero 1962, sa dihang nag-edad pa ko og sayis, ang mga misyonaryo miabot sa tindahan sa mga alahas sa akong amahan nangita og puli sa usa ka lugpit sa kurbata kay ang usa niini nawala. Samtang anaa didto, nakadungog sila og usa ka tawo nga nagtugtog sa sista. Sa dihang nangutana sila mahitungod niini, ang akong amahan midapit kanila sa pagsulod ug sa pagpakighimamat sa iyang higala.
Atol sa ilang panag-istoryahanay, ang akong amahan ug ang iyang higala nangutana sa mga misyonaryo kon motukar ba sila og sista. Usa ka elder miingon nga makatukar siya og gamay. Gipasa sa higala sa akong amahan ang iyang sista ngadto niya ug mihangyo kaniya sa pagtukar. Misugod siya sa pagtukar og pipila ka kanta samtang ang iyang kompanyon mikanta.
Ang yano nga pagpangita sa mga misyonaryo alang sa usa ka lugpit alang sa kurbata misangpot ngadto sa pagpaila sa akong pamilya sa ebanghelyo ni Jesukristo. Kami nahimong maayo nga mga higala sa mga misyonaryo ug nagsugod sa pagpaminaw sa mga leksiyon. Ang binhi sa ebanghelyo gitanom, ug kini nagsugod sa pagtubo, una sa akong inahan, si Elsa, ug sa akong mga igsoong babaye, sila si Ana ug Stella, ug dayon ako.
Sukad nianang adlawa, usa ka gugma alang sa misyonaryo nga buhat mitubo diha sa akong pamilya. Miserbisyo ko og misyon, ang among mga anak nga lalaki miserbisyo og mga misyon, ug karon ang among mga apo nagsugod na sa pagpangandam ug moserbisyo og mga misyon, naghimo og ikatulo nga henerasyon sa mga misyonaryo.
Dili kanunayng sayon ang mahimong usa ka misyonaryo. Gikinahanglan ang pagpangandam sa dili pa ang usa ka batan-ong lalaki ug babaye maandam sa pag-adto sa natad sa misyon. Dinhi niini nga ang mga ginikanan, pamilya, ug mga lider sa Simbahan mahimong maayong mga ehemplo ug magtrabaho isip usa ka grupo sa pag-andam sa kabatan-onan sa sayo nga edad.
Usa sa paagi sa pagtabang kanila nga maandam mao ang pagpakigbahin sa praktikal nga mga kahanas uban kanila. Ang mga kanahas sama sa pagtigom og kwarta, paglaba ug pagpangutaw sa mga sinina, pagpanahi, pagpasinaw sa mga sapatos, pagluto, pagpakig-istorya sa uban, ug pagserbisyo sa uban makatabang kanila sa ilang misyon. Ang pag-apil diha sa seminary ug institute makatabang usab niana nga pagpangandam ug makakomplemento kon unsa ang ilang nakat-onan sa panimalay ug sa ilang mga korum ug mga klase.
Ang atong pagsuporta kinahanglan magpadayon samtang sila anaa sa ilang mga misyon. Nindot kaayo nga makadungog sa maanindot nga mga kasinatian nga naangkon sa atong mga misyonaryo sa hapit kada adlaw. Kita mahimo usab nga kabahin niadtong mga kasinatian pinaagi sa pagtabang niadtong ilang gitudloan. Pananglitan, ang inahan sa usa sa mga misyonaryo kinsa nagtudlo sa among pamilya mikontak sa akong inahan ug misulat ngadto kaniya sulod sa daghang katuigan, nagtabang sa akong inahan nga magpabilin diha sa dalan sa pakigsaad.
Kon kita motabang sa mga misyonaryo sa umaabot nga maandam, kinahanglan atong hinumdoman nga ang misyonaryo nga buhat labaw pa kaayo kay sa usa ka tradisyon diha sa Simbahan—kini usa ka imbitasyon ug mando gikan sa Ginoo (tan-awa sa Mateo 28:19). Sa sinugdanan, si Adan ug si Eva gitudloan sa ebanghelyo. Gitudlo dayon nila ang ebanghelyo ngadto sa ilang mga anak (tan-awa sa Moises 5:6–12). “Ug sa ingon ang Ebanghelyo gisugdan sa pagsangyaw, gikan sa sinugdanan, ingon nga gipadayag sa balaan nga mga anghel nga gipadala gikan sa atubangan sa Dios” (Moises 5:58).
Kini nga pagsangyaw nagpadayon karon uban sa kasundalohan nga mokapin sa 71,000 ka misyonaryo. Apan kita nagkinahanglan og dugang pa, mas daghan pa, diha sa pangunahan—usa ka sundalo sa mga misyonaryo ug mga miyembro.
Unsa ang Atong Makat-onan sa Atong mga Misyon
Samtang nagmisyon ko, naanad nako sa misyonaryo nga buhat ug nagsugod sa paghunahuna og mas lawom mahitungod sa among mensahe. Ako sa kanunay mibati nga ang ebanghelyo tinuod, apan ako adunay lig-on nga tinguha aron makahibalo nga kini tinuod. Ako nag-ampo, nagpuasa, nagtuon, mitrabaho, ug dayon nagpaabot alang sa usa ka tubag.
Atol sa usa ka leksiyon usa ka adlaw, mipakigbahin ko og asoy ni Joseph Smith kabahin sa Unang Panan-awon:
“Ako nakakita og usa ka dako nga gilis sa kahayag ibabaw gayod sa akong ulo, labaw sa kahayag sa adlaw, nga nag-anam og paubos hangtod kini midapat kanako. …
“Sa diha nga ang kahayag midapat kanako ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan. Usa kanila misulti ngari kanako, nagtawag kanako sa akong ngalan ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!” (Joseph Smith—Kasaysayan 1:16–17).
Nianang mga higayona, akong mabati ang Espiritu Santo nga nagkompirmar ngari nako nga ang akong gitudlo tinuod. Si Propera Joseph Smith tinuod gayod nga nakakita sa Amahan ug sa Anak, ug ang Basahon ni Mormon mao ang pulong sa Dios ug, kauban sa Biblia, nagpamatuod kabahin sa atong Manluluwas. Pagkamalinawon ang dala niini ngari sa akong kalag. Bisan mga dekada na ang milabay, nakahatag gihapon kini og kainit sa akong kasingkasing.
Ang akong misyon nahisama sa pagbaton og usa ka espirituhanon nga master’s degree. Unsa ang makat-onan sa mga batan-ong lalaki ug batan-ong mga babaye sa usa ka misyon mopanalangin sa ilang mga kinabuhi hangtod sa kahangtoran. Tali sa daghang butang, sila makakat-on kon:
-
Unsaon sa pagtuon, pag-ampo, pagtudlo, ug paggamit sa mga baroganan sa ebanghelyo sa matag adlaw.
-
Unsaon sa pagpakabuhi uban sa usa ka kompanyon sulod sa 24 oras kada adlaw.
-
Unsaon pag-atiman sa ilang panglawas.
-
Unsaon sa pagplano.
-
Unsaon sa pagpalambo sa mga kahanas sa pagpangulo.
-
Unsaon sa pagpakigdait ngadto sa ubang tawo.
-
Unsaon sa pagpangita, pagpaminaw, ug magiyahan sa Espiritu Santo.
Ang mga batan-ong lalaki ug mga batan-ong babaye nga nagserbisyo og mga misyon napalig-on ug naandam sa pag-atubang sa mga hagit sa kinabuhi samtang sila nagpadayon sa paggamit kon unsa ang ilang nakat-onan samtang sila diha pa sa ilang mga misyon.
Karon mao ang Adlaw
Ang atong minahal nga propeta, si Presidente Russell M. Nelson, nagtudlo:
“Wala pa gayoy panahon sa kasaysayan sa kalibotan nga ang kaalam bahin sa atong Manluluwas adunay mas personal nga kaimportante ug may kalabotan ngadto sa matag kalag sa tawo. Hunahunaa unsa kadali sa makapahugno nga mga kaguliyang sa tibuok kalibotan—ug niadtong anaa sa atong kaugalingon nga mga kinabuhi—masulbad kon kitang tanan mopili sa pagsunod ni Jesukristo ug magtuman sa Iyang mga panudlo.”
Karon mao ang panahon alang kanato nga ipakita ang kinaiya ug kaisog ug sa pagpakigbahin sa ebanghelyo ni Jesukristo. Karon mao ang panahon alang sa atong mga batan-ong katawhan sa pagpangandam sa pagserbisyo sa batalyon sa Ginoo diha sa usa ka pangtudlo o pangserbisyo nga misyon. Ang kalibotan nagkinahanglan kaninyo! Adunay mga tuhod nga kinahanglan palig-onon, mga kamot nga kinahanglang ipataas, ug kamatuoran nga kinahanglang isangyaw (tan-awa sa Doktrina ug mga Pakigsaad 81:5).
Hinaot nga ang mosunod nga imbitasyon gikan sa Ginoo motandog kanato sa paglihok ug sa pag-isa sa bandila sa kamatuoran uban sa gahom:
“Sa pagkatinuod, Ako moingon nganha kaninyo, kini ang akong kabubut-on, nga kamo manglakaw …
“Magpataas sa inyong mga tingog ingon sa tunog sa usa ka trumpeta, magpahayag sa kamatuoran sumala sa mga pagpadayag ug mga sugo nga Ako mihatag kaninyo.
“Ug sa ingon, kon kamo matinud-anon kamo … koronahan uban sa dungog, ug himaya, ug pagka-imortal, ug kinabuhi nga dayon” (Doktrina ug mga Pakigsaad 75:3–5).