“Gikan sa Kangitngit ngadto sa Pagkamalipayon,” Liahona, Hulyo 2024.
Mga Tingog sa mga Santos sa Ulahing mga Adlaw
Gikan sa Kangitngit ngadto sa Pagkamalipayon
Samtang akong gisubli ang mga pulong sa mga ordinansa sa templo diha sa akong hunahuna, adunay maanindot nga butang nga nahitabo.
Niadtong 1988, mikuyog ko sa uban nga Briton nga mga magtutudlo aron magtudlo sa usa ka eskwelahan sa Sudan. Ang mga bata malipayon, ug kami dali nga nakapahiuyon sa mga kaapiki sa pagpuyo diha sa usa ka gipalambo pa nga nasod. Ang among tig-empleyo, hinoon, nahimong madaugdaugon nga lider nga molutos ni bisan kinsa nga sa iyang tan-aw mosupak kaniya sa bisan unsang paagi. Siya nasilag kanako sukad sa adlaw nga ako midapig sa usa ka tawo nga iyang giabuso.
Usa ka adlaw gipatawag ko niya ngadto sa iyang opisina. Sulod sa tunga sa oras, gipahamtangan ko niya sa tanang matang sa pag-abuso sa pulong ug mga hulga. Mibiya ko sa lawak nga anaa sa kahimtang nga nakalitan. Wala na ko kahinumdom kon giunsa nako paglahutay sa nahabilin nga adlaw sa eskwelahan. Tibuok gabii dili nako matangtang kining mangil-ad nga mga pulong sa akong hunahuna.
Atol sa tingkatulog, milingkod ko sa akong higdaanan ug gibasa ang mga kasulatan. Dayon miluhod ko ug bug-os nga nag-ampo alang sa kahupay ug alibyo, apan ako walay nabati. Mihigda ko apan dili makatulog. Sobra kaduha ko nga mibangon, mibasa, miluhod, ug nag-ampo, apan walay nahitabo.
“Ay,” naghunahuna ko, “ang Langitnong Amahan dili man diay kanunayng motubag sa atong mga pag-ampo sa paagi nga atong gusto ug kanus-a nato gusto.” Midawat nalang ko sa pagkadimalas, walay tulog nga gabii.
Apan sa akong paghigda pag-usab, naghunahuna ko, “Aduna pay usa ka butang nga akong mahimo.” Misugod ko sa pagsubli sa mga pulong sa mga ordinansa sa templo diha sa akong hunahuna. Samtang akoa kining gibuhat, usa ka maanindot nga milagro ang nahitabo. Tanang kaalaot ug kangitngit nga misanap kanako, ug ang labing maanindot nga kalinaw ug kalipay midagayday ug mipuno sa kinatibuk-an kong galamhan.
Ako mibangon ug nag-ampo, naghilak nga nagpasalamat ngadto sa Langitnong Amahan. Dayon mibalik ko sa paghigda ug natulog. Sa pagkasunod adlaw, diin puno unta sa kahadlok ug kauyamot, nahimong labing malipayon nga adlaw nga akong nagahin sukad uban sa usa ka klase sa mga bata.
Nakaamgo ko nga ang Ginoo gusto nga akong pamalandongan ang mga ordinansa sa templo. Ngadto sa mga Santos nga milatas sa kapatagan human sa pagdawat sa ilang mga panalangin sa Templo sa Nauvoo, si Presidente Brigham Young (1801–1877) miingon, “Tugoti nga ang kalayo sa pakigsaad nga inyong gihimo didto sa Balay sa Ginoo, magdilaab sa inyong mga kasingkasing, sama sa kalayo nga dili mapalong.” Samtang ang atong mga pakigsaad sa templo nagdilaab diha sa atong mga kasingkasing ug mga hunahuna, kita usab makakaplag og kalig-on, kalinaw, ug kahupay.