Mga Hulagway sa Hugot nga Pagtuo

Gipakita sa Dios Kanako nga Ako Adunay usa ka Katuyoan

Ni Posenai Patu, Apia, Somoa

Nahulog ko gikan sa kahoy, apan ang Ginoo miluwas kanako aron mabag-o nako ang akong kinabuhi ug makatabang sa mga tawo nga adunay mga kakulangan sama nako.

Mga Litrato pinaagi ni Christine Hair

Nagtambong ko og usa ka relihiyoso nga komperensiya uban sa akong igsoong babaye sa dihang mihangyo siya nako nga mokatkat sa kahoy ug magkuha og daghang lubi alang sa komperensiya. Samtang nanguha ko sa mga lubi didto sa kinatomyan sa kahoy, kalit lang ko nga nawad-an sa panimuot ug natagak. Nahulog ko nga nag-una ang akong buko-buko ug dili na nako mabati ang akong mga bitiis.

Gidala ko sa ospital, diin ang mga doktor mipalig-on sa mga bukog sa akong buko-buko. Sulod sa tulo ka bulan, naghigda ko didto sa ospital, dili gani makalingkod. Usa kadto ka emosyonal ug makapaguol nga panahon. Naghigda ra ko didto ug naghunahuna kon unsa ang mahitabo nako ug unsa ang sunod nakong buhaton.

Pakigtambag uban sa Ginoo

Human sa tulo ka bulan, gisultihan ko nga moadto sa New Zealand alang sa operasyon sa akong buko-buko. Ang operasyon gihimo aron nga makalingkod ko imbes maghigda lang. Samtang didto sa ospital sa New Zealand, nahimamat nako ang usa ka babaye nga nagtrabaho didto. Nangutana siya nako, “Nagkaila na ba ta? “Pamilyar man ka.”

Nagsugod kami sa pag-istoryahanay. Mipakigbahin siya sa ebanghelyo ni Jesukristo ug mihatag nako sa Basahon ni Mormon. Sa sinugdanan, wala ko mobasa niini. Gipasagdan ra nako nga wala kini tandoga sa kiliran sa akong higdaanan. Usa ka adlaw, hinoon, nag-inusara ko ug walay makapainteresado nga matan-aw sa telebisyon. Dayon akong nakita ang Basahon ni Mormon diha sa akong lamesa. Giablihan nako kini ug misugod sa pagbasa ug gibasa.

Samtang ako nagbasa, ako adunay gibati nga adunay butang nga lahi mahitungod sa Basahon ni Mormon ug nga kini naglangkob gayod sa tinuod nga ebanghelyo ni Jesukristo. Ang babaye diha sa ospital mimarka sa pipila ka bersikulo, ang usa niini mao ang Alma 37:37: “Pakitambag sa Ginoo sa tanan nimo nga buhaton, ug siya moagak kanimo alang sa kaayohan.”

Kadto nga mga pulong ingon og masabot ug makapahinuklog kanako. Aron masayod kon Ang Simbahan ni Jesukristo sa mga Santos sa Ulahing mga Adlaw tinuod ba nga Simbahan, nasayod ko nga nagkinahanglan ko nga makigtambag sa Ginoo. Ganahan usab ako nga moadto aron matan-aw nako mismo kining simbahan.

Ang Akong Kawalay Paglaom Nahanaw

Sa dihang mipauli na ko gikan sa New Zealand, gidapit nako ang mga misyonaryo sa pagtudlo kanako. Samtang ako nagkat-on, nakabaton ako og usa ka pagpamatuod nga kini mao ang Simbahan ni Kristo. Mapasalamaton ko sa mga misyonaryo nga nagtudlo kanako. Atol sa akong bunyag, sila adunay kusog sa pagdala kanako ngadto sa tubig—ang usa mipagunit kanako sa iyang mga bukton samtang ang lain mipahigayon sa akong bunyag.

Tungod sa akong bunyag, tanang mga pagbati sa pagkaguol ug kawalay paglaom nga akong giantos nahanaw. Ako nasayod nga ako adunay usa ka katuyoan sa kinabuhi ug nga ang Dios nagmahal kanako.

Sa wala pa ako gibunyagan, gibati nako ang kaulaw kabahin sa akong kaugalingon tungod sa akong wheelchair. Human ko nabunyagan, hinoon, misugod ko sa pag-adto sa ward sa matag Dominggo ug miapil sa mga kalihokan sa single adult. Miadto pa gani ko sa mga sayaw diha sa stake, misayaw nga nag-wheelchair sa matag awit. Miapil usab ko sa usa ka network alang sa mga Samoan nga naangol sa dugokan.

Nakaamgo ko nga naayo ko gikan sa pagbati nga kinahanglan ko nga magtago. Pinaagi sa Simbahan, nakabaton ko og kamasaligon sa pagpakig-uban pag-usab taliwala sa mga tawo.

Ang Ginoo usab mitabang kanako sa pagdasig sa akong kaugalingon ug sa paglambo sa dihang ako giawhag sa pagtambong sa tulo ka tuig nga programa sa Cambodian School of Prosthetics and Orthotics (CSPO). Dili ko segurado kon makaapil ko sa programa tungod kay walay usa nga nag-wheelchair ang miapil sukad. Hinoon, ang mga sirkumstansiya sa kataposan mitugot kanako nga makatambong sa CSPO didto sa Cambodia. Migradwar ko didto isip ang unang estudyante nga may kakulangan sa kasaysayan sa programa.

Sa wala pa siya mabunyagi, mibati si Posenai og kaulaw nga mag-wheelchair. Apan human sa iyang bunyag, siya miingon, “Ako nakabaton og kamasaligon sa pagpakig-uban pag-usab taliwala sa mga tawo.”

Sa akong pagbalik sa Samoa, namulong ko diha sa usa ka debosyonal sa YSA mahitungod sa kahimsog. Paghuman sa komperensiya, usa ka babaye miduol nako aron molamano sa akong kamot ug misulti nako nga ganahan siya sa akong pakigpulong. Si Lagimanofia bag-o lang mibalik gikan sa iyang misyon. Gikan niadto nga higayon nga nahimamat nako siya, mibati ko nga siya mikompleto nako. Nag-ampo ko nga makakita og usa ka tawo kinsa akong mahimong kompanyon ug kinsa mohigugma ug modawat kanako.

Samtang si Lagimanofia ug ako misugod sa pagdate, siya miamuma ug midawat kanako, ug ang iyang pamilya misuporta. Kami naminyo, ug ang among mga kinabuhi nausab hangtod sa kahangtoran sa dihang gisagop namo si Posenai Jr. Ang Dios miandam kanamo sa pagsagop kaniya. Ang pagbaton kaniya sa among kinabuhi nakapahimo kanamo nga malipayon kaayo.

Makaserbisyo ba Ako?

Sa simbahan, gitawag ko isip usa ka ward klerk ug sa kadugayan isip usa ka magtatambag diha sa bishopric. Dili ko makatuo nga ang usa ka tawo nga nag-wheelchair makaserbisyo. Ang akong pagkaaksidente nakapahimo nako nga mobati nga walay pulos, apan ang patrabaho diha sa Simbahan nakapahimo nako nga mobati nga mapuslanon ug nakatabang nako nga makaamgo nga ako makatampo. Ganahan ko sa oportunidad nga molambo nga mas mapaduol ngadto ni Jesukristo samtang ako nagserbisyo.

Isip usa ka magtatambag sa bishopric, gusto ko nga magiyahan aron mahimo ko nga mas maayo diha sa akong calling. Kana nakapahimo nako nga gustong mas mangandam pa sa matag Dominggo. Nabatasan na nako ang pagbasa sa akong mga kasulatan, ug nakabaton ko og mga oportunidad sa paghatag sa akong pagpamatuod. Gani ang pagkahimong lider sa simbahan nakatabang nako nga mahimong usa ka lider sa trabaho. Nakapalig-on ko og pagbati nga ako mahimong mangulo ug makapamulong, nagtugot kanako sa pagpangulo sa uban nga mga dapit.

Nagtrabaho ko karon isip usa ka principal sa Prosthetics and Orthoticsd Department sa Tupua Tamasese Meaole Hospital, ang nag-unang ospital sa Samoa. Ang akong departamento mapaigo ang mga 500 ka tawo sa usa ka tuig nga dunay abag sa paglakaw ug mga wheelchair. Ang Simbahan, pinaagi sa Samoan Ministry of Health, nagtabang sa pagsangkap sa gikinahanglan nga mga wheelchair ug ang mga materyales sa paghimo og mga prostetik (tan-awa sa philantropies.ChurchofJesusChrist.org/humanitarian-services). Kini nga mga abag nagtabang sa mga tawo nga makabalik sa trabaho ug mahimong makabarog sa kinaugalingong paningkamot. Sila naghatag usab sa mga tawo og paglaom ug usa ka paagi nga makabalik sa kinabuhi nga sa ilang pagtuo nawala nila.

“Ang pagtrabaho diha sa Simbahan nakapabati nako nga mobati nga mapuslanon ug nakaamgo nga ako makatampo,” miingon si Posenai. “Ganahan ko sa oportunidad nga molambo nga mas mapaduol ngadto ni Jesukristo samtang ako nagserbisyo.”

Salig sa Ginoo

Kon ako adunay ikatambag ngadto sa uban nga adunay mga kakulangan, moingon ko, “Ayaw tugoti ang inyong kakulangan sa pagpahunong kaninyo gikan sa unsay inyong gituohan. Ibubo ang inyong kasingkasing kon unsa ang gusto ninyong makab-ot ug maningkamot og maayo sa pagkab-ot niini. Kon kamo magtinguha sa tabang sa Ginoo, Siya mopanalangin kaninyo [tan-awa sa 2 Nephi 32:9].”

Uban niana nga pagtuo, ako nagpadayon, ug kini nakapahimo nako kon si kinsa ako karon. Ako motuo nga Ako gibutang dinhi ug giluwas alang sa usa ka katuyoan. Nahulog ko gikan sa kahoy, apan ang Ginoo miluwas kanako aron akong mabag-o ang akong kinabuhi ug mobuhat niini nga buhat nga makatabang sa tanan niining katawhan. Ang Ginoo nagtudlo kanako nga Ako makatabang sa daghang tawo—dili igsapayan ang akong kakulangan apan tungod niini.