Dali, Sunod Kanako

Alma 22

Unsa ang Andam Nimong Biyaan aron Makaila sa Dios?

lalaki naglakaw diha sa baybayon

Ang Pagsunod sa ebanghelyo kanunay nga magkinahanglan og sakripisyo. Ang Langitnong Amahan naghangyo kanato sa pagbiya sa atong natural nga mga kalagmitan sa pagdawat og butang nga mas labaw pa: usa ka kahibalo bahin sa Dios ug sa dili ikatandi nga mga panalangin nga Iyang gitanyag.

Ang Amahan ni Hari Lamoni mipakita niining kaandam sa pagsakripisyo sa dihang siya nag-ampo, “Kon adunay Dios, ug kon ikaw ang Dios, mahimo ba nga ikaw magpaila ngari kanako, ug ako mobiya sa tanan kong mga sala aron makaila kanimo, ug nga aron ako mahimo nga mabangon gikan sa mga patay, ug maluwas sa kataposan nga adlaw” (Alma 22:18).

Si Presidente Russell M. Nelson nagtudlo nga ang pagbuntog sa kalibotan ug pagpaduol ngadto sa Langitnong Amahan ug ni Jesukristo naglakip sa “pagpili sa paglikay gikan sa bisan unsa nga makapabugaw sa Espiritu” ug “andam nga ‘mobiya’ bisan sa atong paborito nga mga sala.”

Mga Pangutana nga Hunahunaon

Ang paborito nga mga sala mahimong lisod maila tungod kay kita sa kasagaran mangatarongan niini o motugot niini nga mahimong magbalikbalik. Hunahunaa ang paggahin og panahon sa pagpamalandong sa “paborito” nga mga sala nga makapugong kanimo gikan sa pagkahimong mas mapaduol ngadto sa Langitnong Amahan ug ni Jesukristo.

• Unsa ang pipila sa akong paborito nga mga sala?

• Unsa nga mga lakang ang akong buhaton aron mabuntog kini nga mga sala?

• Unsa nga mga babag ang akong mahimong atubangon sa akong paningkamot?

• Sa unsang paagi nga ang pagsakripisyo niini nga mga sala makatabang kanako niining mga dapit diin ako nanlimbasog?

Mga Panalangin

Agi og dugang ngadto sa mga panalangin nga gipangita sa amahan ni Hari Lamoni, nga mao ang pagkabanhaw ug kaluwasan, si Presidente Nelson naglista og dugang mga panalangin nga moabot gikan sa atong mga paningkamot nga mamahimong sama ni Jesukristo ug magpabilin diha sa dalan sa pakigsaad. Kini naglakip sa:

• Pag-usab sa kasingkasing ug kinaiyahan

• Gugmang putli

• Pagkamapainubsanon

• Kamanggihatagon

• Pagkamabination

• Pagdisiplina sa kaugalingon

• Kalinaw

• Kamasaligon

• Hingpit nga kalipay

• Kapahulayan

• Espirituhanong Kalig-on

• Personal nga pagpadayag

• Naglambo nga hugot nga pagtuo

• Pagpangalagad sa mga Anghel

• Mga Milagro

Kon naglisod kamo sa pagsakripisyo sa piho nga mga sala, ayaw paghunong. Si Presidente Nelson nagpahinumdom kanato nga “ang pagbuntog sa kalibotan wala gyod magpasabot nga mahimong hingpit niini nga kinabuhi, ni kini nagpasabot nga ang inyong mga problema mawala lang—tungod kay kini dili mawala. Ug kini wala magpasabot nga kamo dili na makahimo og mga sayop. Apan ang pagbuntog sa kalibotan nagpasabot nga ang inyong pagpakigbatok sa sala modako.”

Samtang naggahin kita og paningkamot sa pagbiya sa atong mga sala sama sa amahan ni Hari Lamoni, atong mahibaloan nga ang pagkaila sa Dios angay lang gayod sakripisyohan. Sa pagbuhat sa ingon, ang matag usa sa atong mga kinabuhi mamahimong butang nga mas mahinungdanon kaysa atong mahimo niini nga kita ra.

Mubo nga mga sulat

1. Russell M. Nelson, “Buntoga ang Kalibotan ug Pangita og Kapahulayan,” Liahona, Nob. 2022, 96.

2. Russell M. Nelson, “Buntoga ang Kalibotan ug Pangita og Kapahulayan,” 97.

3. Russell M. Nelson, “Buntoga ang Kalibotan ug Pangita og Kapahulayan,” 96.