Digital Lamang
Hatagi Ako og Kahayag Aron Luwas Ako nga Makaadto sa Wala Mahibaloi nga Padulngan
Gikan sa pakigpulong nga gihatag sa gradwasyon sa mga estudyante sa Brigham Young University–Hawaii niadtong Disyembre 8, 2023. Alang sa kompleto nga pakigpulong, bisitaha ang speeches.byuh.edu.
Ang sunod ninyo nga mga lakang tingali paingon ngadto sa wala mahibaloi nga padulngan. Apan kon inyong “ibutang ang inyong kamot ngadto sa Kamot sa Dios,” ako nasayod nga ang Iyang giya “mas makaayo kaninyo kaysa kahayag ug mas luwas kaysa nahibaloan nga agianan.”
Saving That Which Was Lost [Pagluwas Nianang Nawala], ni Michael Malm
Akong minahal nga mga higala, nalipay ko nga makauban kamo niining matahom nga lugar ug dakong dungog nga mamulong kaninyo sa mahinungdanong adlaw sa inyong mga kinabuhi.
Samtang nangandam ko og mga hunahuna nga ipakigbahin kaninyo, siyempre wala gayod ako magdahom nga ako mopakigbahin niini sa adlaw nga ako tawagon nga labing bag-o nga sakop sa Korum sa Napulog Duha ka Apostoles. Makapahingangha kini kanako bisan gani ang pagsulti niini. Kini nga tawag miabot kagahapon. Gamay ra kaayo ko og tulog gabii, kahibalo na kamo. Akong naamgohan karon, sa labing talagsaong paagi, nga wala pa gyod ko sukad nag-andam og mga pamahayag alang sa uban nga motukma gayod kaayo sa higayon sa akong kaugalingong kinabuhi. Ang Dios, kinsa mao ang naggiya sa tanan, ug kang kinsang tawag kagahapon dili surprisa (hinuon ang labing nasurprisa mao ako ug sa tinuod ang tanan nga nakaila kaayo nako), migiya nako niini nga mga mensahe alang ninyo. Apan kini usab, niining higayona, alang gayod kanako. Ug magkinahanglan gayod ako niini sa sunod nga pipila ka semana, mga bulan, ug gani katuigan.
Ang pagka-Apostol mao ang pagkahimong usa ka espesyal nga saksi ni Ginoong Jesukristo. Nahibalo gayod ako nga kinahanglan ko nga motubo sa matag mahunahunaan nga maayo nga paagi aron mahimong sulugoon nga gikinahanglan sa Manluluwas nga ako mamahimo. Ang akong mga pagkadili angay, mga kahuyang, ug kakulang naklaro nako sa sakit nga paagi, apan ako adunay hugot nga pagtuo sa pailob sa akong Amahan, sa grasya ni Jesukristo, ug sa panudlo sa Balaang Espiritu.
Gusto ko nga mopakigbahin og pipila ka pulong nga gisulat sa usa ka magbabalak nga si Minnie Louise Haskins:
“Ug miingon ko sa tawo nga nagbarog sa ganghaan sa katuigan: ‘Hatagi ako og kahayag aron ako makaadto nga luwas paingon sa wala mahibaloi nga padulngan.’
Ug siya mitubag: ‘Lakaw ngadto sa kangitngit ug ibutang ang imong kamot ngadto sa Kamot sa Dios. Mas makaayo kana kanimo kaysa kahayag ug mas luwas kaysa nahibaloan nga agianan.’
Busa ako milakaw, ug nakaplagan ang Kamot sa Dios, naglakaw nga malipayon ngadto sa kagabhion.
Ug Siya miagak nako paingon sa kabungtoran ug sa kabuntagon.”
Ang sunod ninyo nga mga lakang tingali paingon ngadto sa wala mahibaloi nga padulngan—ug gani, adunay daghan pang mga latason sa kinabuhi, diin daghan didto sa unahan walay mapa nga makagiya. Apan kon inyong “ibutang ang inyong kamot ngadto sa Kamot sa Dios,” nasayod ko nga, sama sa gisaad sa balak, ang Iyang giya “mas makaayo kaninyo kaysa kahayag ug mas luwas kaysa nahibaloan nga agianan.”
“Ibutang ang Imong Kamot ngadto sa Kamot sa Dios”
Unsay ipasabot sa “ibutang ang imong kamot ngadto sa Kamot sa Dios”? Tingali nagpasabot kini sa pagpakita og hugot nga pagtuo sama sa biyuda sa Sarepta, nga migamit sa iyang kataposang gamay nga mga kapanguhaan aron pakan-on si propeta Elias. Iyang gibutang ang iyang kamot ngadto sa kamot sa Dios uban sa makapahingangha nga pagsalig, ug ang iyang tadyaw sa harina ug tibud-tibod sa lana wala mahutdi apan gisangkapan og pagkaon aron makalahutay siya ug ang iyang anak nga lalaki latas sa kagutom (tan-awa sa 1 Mga Hari 17). O tingali ang minos nga pagsabot apan sa kaulahian mapaubsanon nga kamasulundon ni Naaman, ang magmamando sa kasundalohan nga nag-antos og sakit nga sangla, sa dihang misunod siya ni propeta Eliseo ug naligo og pito ka higayon didto sa Suba sa Jordan aron mamaayo (tan-awa sa 2 Mga Hari 5). Kini makapahinumdom ni Maria, ang inahan ni Jesus, kinsa midawat sa makapahingangha nga bug-at nga responsibilidad nga makausab sa kinabuhi uban sa gamhanang hugpong sa mga pulong “Sulugoon ako sa Ginoo” (Lucas 1:38).
Sa pagkatinuod, ang pagbutang sa inyong kamot ngadto sa kamot sa Dios nagpasabot sa makanunayong pagpaningkamot sa pagpaduol ngadto sa atong Langitnong Amahan ug sa atong Manluluwas, si Jesukristo, ug bation ang kalipay sa ilang hingpit nga gugma. Kini nagpasabot og pagpangamuyo aron makasabot nga sila magauban kanato sa kanunay, pag-ila sa Ilang presensya ingon nga kini nakapalambo sa atong mga kinabuhi, ug pagsinati sa kalipay ug pasalamat nga gidasig gayod niana nga panag-uban. Kini nagpasabot sa “paghunahuna og celestial,” sa pagtan-aw sa unahan ngadto sa “kabuntagon” nga ang Dios mapailobon kaayo nga naggiya kanato paingon didto, ug sa pagpahinungod sa atong mga kaugalingon ngadto nianang hayag nga tumong. Akong mga higala, kon kita maningkamot nga pagagiyahan sa kamot sa Dios ug dili sa bisan unsang impluwensya, kita mahatagan og gahom sa pag-atubang sa mga wala mahibaloi sa atong umaabot uban sa makapatunhay nga hugot nga pagtuo ug makanunayon nga pagsalig.
“Pagkaplag sa Kamot sa Dios”
Nan, unsaon man, nga kita makaadto didto? Unsaon man nga atong makaplagan ang kamot sa Dios ug, sama sa gihulagway sa magbabalak, naglakaw nga “malipayon ngadto sa kagabhion”? Ang ebanghelyo ni Jesukristo napuno sa kahayag nga makahimo ug motabang nato nga “makaplagan ang Kamot sa Dios.”
Si Jesukristo, ang atong minahal nga Manluluwas, mao ang labaw nga tinubdan sa kahayag sa atong mga kinabuhi. Siya Mismo mipaneguro nato, “Ako mao ang kahayag sa kalibotan: ang mosunod kanako dili na gayod maglakaw diha sa kangitngit, kondili makabaton hinuon sa kahayag sa kinabuhi” (Juan 8:12). Ang kahayag sa kinabuhi! Mao kana Siya. Mao kana ang Iyang gitanyag nato. Tungod sa Iyang kahayag, kita makapili gayod sa paglaom ug sa hingpit nga kalipay taliwala sa makalibog nga mga unos sa kinabuhi. Kon kamo nakadiskobre niini, mahibalo kamo sa milagro sa Iyang kahayag nga makatuhop sa bisan unsa nga kangitngit.
Ang pagpahimulos nianang banwag sa kahayag sa atong mga kinabuhi nagpasabot sa pagdiskobre sa unsay gihulagway ni Presidente Russell M. Nelson isip hingpit nga kalipay sa inadlaw nga paghinulsol. Siya misulti nato nga ang “paghinulsol usa ka talagsaong gasa. Usa kini ka proseso nga dili angay nga kahadlokan. Usa kini ka gasa nga atong dawaton uban ang kalipay ug ang paggamit—gani hangupon—sa matag adlaw samtang kita magtinguha nga mahimong mas sama sa atong Manluluwas.” Ang balikbalik nga pagdangop ngadto sa Dios sa matag higayon nga mosimang kita sa dalan makapalingkawas nato gikan sa mga gapos sa sala ug kaalaotan nga ilaang sa kaaway kanato. Makakat-on kita nga mahimuot sa oportunidad sa inadlaw—gani sa kanunay—nga paghinulsol ug himoon kini nga adunay sinsero nga pasalamat.
Ang mga kasulatan mao ang laing bililhon nga tinubdan sa kahayag sa atong mga kinabuhi. Ang Dutch nga painter nga si Vincent van Gogh makausa misulat ngadto sa iyang igsoong lalaki, “Wala ka kahibalo kon unsa ko kalingaw sa Biblia; gibasa nako kini kada adlaw, apan kinahanglan nga kinasingkasing ko nga mahibalo niini ug motan-aw sa kinabuhi pinaagi sa kahayag niana nga hugpong sa mga pulong, ‘Ang imong mga pulong maoy suga nga magatultol kanako, ug maoy kahayag sa akong agianan.’” Sa dihang nagtan-aw ko sa komplikado nga katahom sa iyang mga painting, ug ilabi na sa iyang nagtuyok-tuyok nga mga paghulagway sa kahayag, naghunahuna ko nga sa iyang art iyang gihulagway ang kalibotan pinaagi sa panglantaw niana nga tinguha sa pagtan-aw sa kinabuhi pinaagi sa kahayag sa pulong sa Dios.
Ang mga pulong sa mga kasulatan nakahatag ba og kahayag ug nakaumol sa paagi sa inyong pagtan-aw sa kalibotan? Tingali nakapalambo na kamo og ingon niana nga lebel sa kasuod ngadto sa pulong sa Dios—tingali wala pa. Bisan asa man kamo sa inyong personal nga pagtuon sa mga kasulatan, ako moawhag kaninyo sa pagpadayon sa pagtinguha ug sa pagkat-on. Dili pa gayod ulahi alang nato nga ablihan ang atong mga kasingkasing ngadto sa mga kasulatan ug magiyahan sa kahayag niini. Si Presidente Dallin H. Oaks, Unang Magtatambag sa Unang Kapangulohan, nagtudlo: “Moingon kami nga ang mga kasulatan naglangkob sa mga tubag sa matag pangutana tungod kay ang mga kasulatan makagiya kanato ngadto sa matag tubag. Kini (ang mga kasulatan) mobutang nato diha sa usa ka kahimtang diin makabaton kita og inspirasyon sa pagtubag sa bisan unsa nga pangutana nga doktrinal o sa kaugalingon, kon kana ba nga pangutana direkta nga may kalabotan o wala sa hilisgotan nga atong gitun-an diha sa mga kasulatan. Kana ang dakong kamatuoran nga wala masabti sa kadaghanan.”
Sama sa usa ka parola diha sa usa ka unos, ang templo usa ka makanunayon nga tinubdan sa kahayag ug usa ka simbolo sa kahilwasan. Ang dili mausab nga doktrina sa pagsimba diha sa templo naghatag og dili matarog nga pagkamakanunayon sa kalibotan nga puno sa kasamok ug kawalay kaseguroan. Ang mga pakigsaad nga atong gihimo diha sa templo magtuga kanato og gahom, gahom sa Dios, ug mopuno nato og kahayag sa Ginoo. Kita mogawas gikan sa templo nga magdala sa Iyang ngalan ngari kanato, ang Iyang himaya maglibot kanato, ug ang Iyang mga anghel magbantay kanato.
Si Presidente Nelson mitudlo nato nga “ang paghimo og usa ka pakigsaad uban sa Dios mousab sa atong relasyon uban Kaniya hangtod sa kahangtoran. Kini mopanalangin kanato sa naghingapin nga gugma ug kaluoy. Kini makaapekto kon si kinsa kita karon ug sa unsang paagi ang Dios motabang kanato nga mamahimong unsa ang atong sangpotan.” Sa pagkatinuod, ang paghimo ug pagtuman sa ingon nga mga pakigsaad mao ang “pagbutang sa inyong kamot ngadto sa Kamot sa Dios.” Kon ang templo wala pa mopuno ninyo og kahayag ug kalinaw, ako moawhag ninyo nga mas kanunay nga moadto. Pangitaa ang Dios diha sa Iyang balaan nga balay. Kay, “Kana nga gikan sa Dios mao ang kahayag; ug siya nga nakadawat sa kahayag, ug magpadayon diha sa Dios, makadawat og labaw pa nga kahayag; ug kana nga kahayag mag-anam og labaw kahayag ug labaw sa kahayag hangtod sa hingpit nga adlaw” (Doktrina ug mga Pakigsaad 50:24).
Kanang bililhon nga kasulatan tinuod sa tanang kahayag sa ebanghelyo. Kon inyong “ibutang ang inyong kamot ngadto sa Kamot sa Dios,” kon kamo mangita ni Kristo, makahuloganong magtuon sa mga kasulatan, ug maghimo og sagrado nga mga pakigsaad diha sa templo, ang kahayag “sa kabuntagon,” nianang “hingpit nga adlaw,” mag-anam kasanag. Gani, kamo mismo mahimong kabahin niana nga kahayag.
Usa ka Tibuok Kinabuhi nga Serbisyo
Ang balak nga akong gipasabot karon nahimong sikat pinaagi sa mensahe sa Pasko ni Hari George VI sa United Kingdom. Niadtong Disyembre 1939, ang Europe nalambigit sa gubat, ug ang resulta sa gubat nakaapekto sa mga kasinatian sa minilyon nga katawhan. Ang mga lumulupyo naghunahuna og bag-ong tuig nga limitado ang pagkaon, walay kuryente, ug pagpang-ataki gamit ang eroplanong panggubat. Daghan na ang nagbangotan tungod sa nangamatay, ug daw ang umaabot wala nay paglaom.
Ingon niini ang kahimtang nga si Hari George VI namulong ngadto sa iyang katawhan ug gipakigbahin ang mga pulong ni Minnie Louise Haskins: “Lakaw ngadto sa kangitngit ug ibutang ang [inyong] kamot ngadto sa Kamot sa Dios. Mas makaayo kana [kaninyo] kaysa kahayag ug mas luwas kaysa nahibaloan nga agianan.” Ang mga pulong sa hari naghatag og kahupayan, kaisog, ug pagbati sa panaghiusa sa nasod, nagpahimutang og tono alang sa diwa sa panahon sa gubat nga maghulagway sa katuigan nga moabot. Ang umaabot adunay grabe nga kalisdanan ug kawalay paglaom alang sa katawhan sa Europe niadtong 1939, ug ang umaabot sa walay pagduhaduha adunay mga hagit ug mga oportunidad sa paglambo alang kanato usab. Unsay gisaad sa ebanghelyo kanato mao nga kon kita giyahan sa Dios, ang atong kamot nagkupot sa Iyang Kamot, kita giyahan latas sa mga pagsulay ug mga kalisdanan sa kinabuhi ug paingon ngadto sa Iyang nag-anam ka dako nga kahayag.
Si Hari George VI migiya sa iyang katawhan latas sa usa sa labing grabe nga mga gubat sa kasaysayan. Ang iyang pagserbisyo sa iyang nasod nagkinahanglan og dakong personal nga sakripisyo—nagpanagana siya sa pagdawat sa katungdanan sa trono human sa pagkanaog sa iyang magulang nga lalaki. Ang pagpangulo, ug ilabi na ang pagpamulong sa publiko, wala moabot niya dihadiha dayon. Pinaagi lamang sa taas nga mga paningkamot, lakip na ang pagbuntog sa iyang nagkanga-kanga nga pag-istorya, nga nakahimo siya sa pagserbisyo sa iyang katawhan sa epektibong paagi.
Ang paggiya sa uban sa paagi nga ang Manluluwas migiya, sa paagi nga gusto Niya nga kita mogiya, mao ang pagserbisyo nila. Kasagaran kana nga pagserbisyo nagkinahanglan og sakripisyo ug paglambo gikan nato. Sa kanunay, ang ingon nga pagserbisyo makatabang nga malunsay ug mabalaan kita, mousab sa atong mga kasingkasing ug moumol sa atong mga kinaiya aron mas mahisama sa atong Ehemplo, nga si Jesukristo, ang labing halangdon nga sulugoon sa tanan.
Si Presidente Henry B. Eyring, Ikaduhang Magtatambag sa Unang Kapangulohan, nagtudlo:
“Ang yawe ninyo ug nako aron mosaka sa atong potensiyal isip mga sulugoon mao ang pagkaila sa atong Agalon, paghimo alang Kaniya unsay atong mahimo, ug masaligong motugyan sa dili na nato mahimo nganha sa Iyang mga kamot. Tugoti ko nga mohatag ninyo og usa ka ehemplo nga inyong atubangon sa umaabot nga mga adlaw. Matung-an kamo tali sa panginahanglan sa pagbutang og pagkaon sa inyong lamesa ug inyong kapuy-an, sa pag-atiman sa panginahanglan sa pamilya, sa pagtubag sa mga pangaliyupo sa mga balo o sa mga nailo sa inyong palibot, ug sa samang higayon sa pagtubag sa mga gikinahanglan sa calling nga inyong nadawat diha sa Simbahan. Kon mahitabo kana, matental gayod kamo sa pagbagulbol, gani tingali sa pagreklamo.
“Apan hinumdomi nga nagserbisyo kamo sa usa ka Agalon nga nahigugma ninyo, nakaila ninyo, ug gamhanan sa tanan. Wala Siya maghimo og mga buluhaton alang sa inyong pagserbisyo apan mga oportunidad alang sa inyong paglambo. Mahimo kamo nga mag-ampo ngadto Kaniya nga adunay pagsalig ug mangutana, ‘Unsay gusto nimo nga akong sunod nga buhaton?’ Kon kamo maminaw sa mapaubsanong paagi ug adunay hugot nga pagtuo, mabati ninyo ang tubag. Ug kamo, kon kamo maalamon ug buotan, mosugod sa pagbuhat nianang gisugo sa inyong Agalon. Ug inyong itugyan ang dili na ninyo mahimo nganha sa Iyang mga kamot.”
Sa inyong paglakaw “ngadto sa wala mahibaloi nga padulngan,” nga nagkupot ngadto sa putli nga mga tinubdan sa kamatuoran ug kahayag, tugoti nga ang inyong panultihon mao “kang kinsa ko moserbisyo?” Hinumdomi nga si Kristo mitambag, “Ang labing dako kaninyo kinahanglang mahimo nga inyong sulugoon” (Mateo 23:11). Sa panan-aw sa Ginoo, ang kahalangdon pagasukdon dili pinaagi sa atong personal nga mga kalamposan apan pinaagi sa gugmang putli sa atong pagtagad sa Iyang mga anak.
Inyong Amahan sa Langit Nagtuo Kaninyo
Ako mopamatuod sa katinuod sa atong mahigugmaon nga Amahan sa Langit, kinsa naminaw sa inyong matag pag-ampo; sa Iyang buhi nga Anak, atong Manluluwas, si Jesukristo; ug sa walay kinutoban nga gasa sa pag-ula sa Manunubos natong tanan. Adunay pagpahiuli sa mahangtorong kahibalo ug kamatuoran. Nagpadayon kini karon ug magpadayon hangtod nianang mahimayaon nga adlaw sa higayon nga si Jesukristo mobalik. Matag usa ninyo gihigugma sa mga paagi nga dili ninyo masabtan.
Mapasalamaton kaayo ko nga ang umaabot pagahulmahon sa matinud-anon nga sulugoon nga mga lider sama sa inyong mga kaugalingon. Pila ka dili maihap nga mga paagi nga ang matag usa kaninyo “[mo]pataas sa mga kamot sa nawad-an og paglaom” (Doktrina ug mga Pakigsaad 81:5)? Mituo ko sa inyong abilidad sa pagserbisyo sa katawhan. Mas importante, ang inyong Amahan sa Langit mituo kaninyo. Siya nakaila sa matag usa ninyo sa personal nga paagi, ug Siya nagtunol aron ipaabot kaninyo ang Iyang kamot ug mogiya kaninyo paingon sa “kabuntagon.” Padayon, akong mga higala, uban sa kalipay, “ibutang ang [inyong] kamot ngadto sa Kamot sa Dios,” ug tugoti nga Siya mogiya kaninyo nga “luwas paingon sa wala mahibaloi nga padulngan.”