Sa Digital Lamang: Mga Young Adult
Unsa ang Gikinahanglan aron Madawat ang Atong Matarung nga mga Tinguha
Sa dihang ang kalisud miigo sa akong pamilya, naglibug ko kon unsaon pa nako pagserbisyo og misyon.
Sa wala pa ako mabunyagi sa Ang Simbahan ni Jesukirsto sa mga Santos sa Ulahing mga Adlaw, gusto na kong moserbisyo sa Ginoo. Kanunay kong moingon sa akong kaugalingon nga akong ipahinungod ang tanan nakong panahon ngadto Kaniya bisan unsa pa. Ang pagserbisyo Kaniya sa akong tibuok kinabuhi mao ang akong damgo. Ug sa pagpamiyembro sa Simbahan ni Jesukristo nakahatag kanako og mas maayo nga kahigayunan sa pagsunod sa akong damgo.
Niadtong Disyembre 2017, nabunyagan ko. Mao kadto ang labing nindot nga adlaw sa akong kinabuhi. Ang ebanghelyo nagtudlo kanako unsaon sa paghunahuna sa lahi nga paagi, unsaon sa pagdasig sa uban, unsaon pagbuntog sa akong mga kahadlok, ug unsaon sa pagpalig-on sa akong mga talento ug makadiskobre og mga bag-o. Sa katapusan nakakat-on usab ako sa oportunidad sa pagserbisyo og full-time nga misyon. Diha-diha dayon nasayud ko nga usa kadto ka butang nga gusto nakong buhaton. Busa kada adlaw, naningkamot ko sa pagpangandam. Mibasa ko sa mga kasulatan, mitambong sa institute, ug mipalambo sa akong calling. Bisan pa niana, dihay usa ka problema sa akong pamilya nga nakahimo nako nga dili sigurado mahitungod sa umaabut.
Ang kakabus.
Sa dihang ako nag-18, ang kakabus miigo sa akong pamilya. Hapit dili mi makakaon, makaeskwela, o gani makapamelete padulong sa simbahan. Ang bugtong butang nga nahabilin namong mahuptan mao ang among hugot nga pagtuo. Kini nga sitwasyon mipalangay gayud sa proseso sa akong pagserbisyo og misyon. Misulti ko ni mama mahitungod sa akong tinguha, apan siya mibalik sa pagsulti sa usa ka butang nga kanunay niyang gisulti kanako: “Humna ang pag-eskwela, dayon sunda ang imong mga damgo.” Tungod sa among pinansyal nga sitwasyon, wala akoy daghang kapilian. Busa nagkugi ko pag-ayo aron mahuman ang pag-eskwela.
Wala madugay migradwar ko ug sa katapusan andam na nga mogawas ug moserbisyo sa Ginoo. Apan ang kakabus nakaapekto gihapon kanamo.
Nasagmuyo ko.
Naghunahuna ko, “nahuman na ko og eskwela, ug nabuhat ko na ang tanan. Ngano nga wala man gihapon kini masulbad?” Dili na ko gusto nga maghulat pa sa akong damgo, apan bisan og nawad-an og paglaum, misalig ko nga ang mga butang mamaayo ra sa paglabay sa panahon.
Mihukom ko nga motrabaho og maayo aron makita ang tanang kwarta alang sa akong mga galastuhan sa misyon. Nag-ampo ko matag adlaw, mibisita sa mga misyonaryo kutob sa mahimo, ug mipalig-on sa akong pagpamatuod pinaagi sa pagtuon sa mga materyal sa Simbahan.
Daghan sa akong mga paryente ang batok sa akong damgo sa pagserbisyo og misyon. Misulti sila kanako nga ang pagserbisyo og misyon makapasamut lamang sa kahimtang nako ug sa akong pamilya. Apan ako nagpabiling lig-on. Nasayud ko nga gusto kong moserbisyo og misyon ug nga ang Langitnong Amahan mohatag og paagi.
Human sa taud-taud nga pagtrabaho ug pagtigum og kwarta, sa katapusan nasumiter nako ang akong mga papeles sa misyon. Sa dihang ang akong bishop mitawag nako ug miingon nga ang akong tawag miabut, misinggit ko ug milukso sa kalipay! Diha-diha dayon miadto ko sa opisina sa stake ug mikuha sa sulat. Nianang gabhiona, akong giablihan ang akong tawag sa misyon ug mipahibalo sa akong pamilya nga ako gitawag nga moalagad sa Philippines Cabanatuan Mission.
Mihilak ko sa hingpit nga kalipay nianang gabhiona. Bisan pa sa tanan nga nahitabo, uban sa hugot nga pagtuo ug kakugi ug pagsalig sa Ginoo, nahuman nako ang tanang butang nga kinahanglan nakong buhaton sa pagserbisyo og misyon ug sa pagtuman sa akong damgo. Nakaamgo ko nga kon wala nako masinati ang kalisdanan sa wala pa ang akong misyon, dili unta ko hingpit nga andam sa pisikal, emosyonal, espiritwal, mental, ug pinansyal nga paagi. Apan tungod sa akong kahimtang, ako milambo sa daghang mga paagi.
Nasayud ko nga ang Langitnong Amahan adunay plano alang kanatong tanan. Ang tanan nga inyong nasinati tingali dili masabut usahay, ug tingali gusto nimong mahitabo ang mga butang sa mas daling panahon imbis unya ra, apan salig sa Iyang tyempo imbis sa inyong kaugalingon. Kon kita mosalig Kaniya ug mopakita og hugot nga pagtuo ug magkugi og maayo, Siya mogiya kanato sa atong matarung nga tinguha sa husto nga panahon ug kita molambo sa ngadto-ngadto (tan-awa sa Enos 1:12 ug Alma 29:4).