Digital Lamang: Mga Young Adult

Pagpuasa: Usa ka Seguradong Paagi sa Pagpalig-on sa Inyong Pagtuo sa Ginoo

Ni Leizel Conciso

Ayaw kalimti kining gamhanang baroganan sa ebanghelyo.

mga young adult nga magkauban nga naglingkod ug nagkat-on

Nakapangutana na ba kamo kon makasalig ba gayod kamo sa Langitnong Amahan ug ni Jesukristo?

Gibati ko kini kaniadto, ilabi na sa dihang nahimo kong miyembro sa Ang Simbahan ni Jesukristo sa mga Santos sa Ulahing mga Adlaw.

Mipasakop ko sa Simbahan sa dihang 17 anyos ko, ug ako ang kinamanghoran sa akong pamilya ug ang bugtong miyembro sa Simbahan. Mituo ko nga ang ebanghelyo ni Jesukristo tinuod—nag-ampo ko bahin niini ug mibati og tumang kalipay. Gusto kong mosunod sa ebanghelyo, apan sa samang higayon, gibati nako ang hilabihang kamingaw. Nakadawat ko og mapintas nga pagtratar gikan sa akong mga higala ug sa pipila ka sakop sa akong pamilya tungod sa pagpasakop sa Simbahan. Gibati nako nga murag kinahanglan kong mopili tali sa akong relasyon sa akong mga minahal ug sa akong relasyon sa Ginoo. Morag imposible para nako nga makombinsir sila nga nagsubay ko sa husto nga dalan.

Paghinumdom sa Gahom sa Pagpuasa

Usa ka adlaw, nakahinumdom ko og usa ka butang nga gitudlo sa mga misyonaryo kanako sa dihang nagkat-on ko sa ebanghelyo: ang balaod sa pagpuasa.

Ila kong gidapit nga mag-ampo ug magpuasa aron sa paghangyo sa Langitnong Amahan nga humokon ang mga kasingkasing sa akong mga ginikanan aron sila mohatag sa ilang pagtugot aron ko mabunyagan. Gisunod nako ang ilang tambag ug mibati og hilabihan nga kalinaw ug kaseguroan bisan pa sa akong mga kahimtang. Ang akong amahan mipirma sa dokumento sa pagtugot, nga nagtugot kanako nga mabunyagan, bisan og ang akong inahan wala gihapon mouyon.

Samtang namalandong ko sa kakulang sa suporta karon sa akong pamilya, nahinumdom ko niadtong milagro sa kalinaw nga akong gibati sa wala pa ko mabunyagi. Nahinumdom ko nga ang tanang butang posible sa Langitnong Amahan (tan-awa sa Mateo 19:26) ug nga samtang modangop ko Kaniya pinaagi sa pagpuasa ug pag-ampo, mahimo Niyang posible ang mga butang nga daw imposible pinaagi sa pagtuo kang Kristo.

Sama sa atong nakat-onan sa Helaman 3:35, “Bisan pa niana sila nagpuasa ug nag-ampo kanunay, ug nag-anam kalig-on ug nagkalig-on sa ilang pagpaubos, ug nagkalig-on ug nagkalig-on sa hugot nga pagtuo ni Kristo, ngadto sa pagpuno sa ilang mga kalag uban sa hingpit nga kalipay ug kahupayan.”

Gusto nakong palawman ang akong pagsalig sa Langitnong Amahan, pun-on ang akong kasingkasing sa kalipay, ug buhaton unsay akong mahimo sa pagpahumok sa mga kasingkasing niadtong wala mosuporta kanako. Mao nga nagpuasa ug nag-ampo ko kanunay alang sa kahupayan gikan sa kamingaw nga akong giatubang.

Pagdapit sa mga Milagro

Walay nausab dihadiha dayon. Gisultihan ko nga nakahatag ko og mga kalisod sa among pamilya tungod sa akong pagkamiyembro sa Simbahan. Gibati nako nga hilabihang nag-inusara. Apan misalig ko nga ang Langitnong Amahan naminaw sa akong mga pag-ampo ug nga ang akong pagpuasa magdala og mga panalangin. Sa kataposan, nakakita ko og milagro—ang kasingkasing sa akong mga ginikanan hinayhinay nga nalukmay ngadto sa ebanghelyo.

Gibati usab nako ang akong pagtuo sa Langitnong Amahan ug sa akong Manluluwas nga nahimong lig-on. Ang akong mas lig-on nga pagtuo nakatabang nako nga mahibalo unsaon pagtubag sa uban dihang wala sila magmabination ug unsaon pagpalawom sa akong relasyon sa mga minahal ug sa Langitnong Amahan ug ni Jesukristo.

Human sa daghang pagpuasa ug pag-ampo, nadawat nako ang tubag nga magserbisyo og misyon. Sa milagrosong paagi, ang akong mga ginikanan nabunyagan sa wala pa ko mobiya aron sa pagserbisyo, ug ako usab naselyo ngadto kanila sa Manila Philippines Temple pipila ka bulan sa wala pa ko mahuman sa akong serbisyo.

Ang pagpuasa nagpadayon sa pagdala og mga milagro sa akong kinabuhi sa matag Dominggo sa puasa. Apan magpuasa sab ko kon walay kasegurohan ang kinabuhi ug nanginahanglan kaayo ko sa kalinaw ni Kristo.

Sama sa gitudlo ni Presidente Russell M. Nelson: “Atol sa mga panahon sa hilabihan nga kalisod … ang labing natural nga butang nga atong buhaton mao ang pagtawag sa atong Langitnong Amahan ug sa Iyang Anak—ang Bantogang Tig-ayo—sa pagpakita sa Ilang talagsaong gahom nga mopanalangin sa mga tawo dinhi sa yuta.”

Matinuoron kong makapamatuod nga ang pagpuasa usa ka talagsaon nga paagi sa pagtawag sa Langitnong Amahan ug ni Jesukristo. Ang pagpuasa nagpadayon sa pag-usab sa akong kinabuhi ug hugot nga pagtuo. Nanghinaot ko nga makita ninyo ang mga milagro nga mahatag usab niini nga sakripisyo sa inyong kinabuhi.

Unsaon Paghimo sa Pagpuasa nga Makahuloganon

Si Elder Shayne M. Bowen sa Seventy mitudlo: “Ang pagpuasa usa ka baroganan sa gahom. Makausab kini sa kinabuhi.”

Midapit siya kanato sa pagkonsiderar niini nga mga sugyot nga makatabang kanato sa paghimo sa atong pagpuasa nga makahuluganon:

“Samtang magsingabot ang adlaw sa puasa, paghunahuna og usa ka katuyoan sa imong pagpuasa. Kana nga katuyoan mahimong sama ka yano sa pagpahayag og pasalamat.
Sugdi ang imong puasa pinaagi sa pag-ampo. Pakigsulti sa Langitnong Amahan ug isulti ngadto Kaniya ang katuyoan sa imong pagpuasa (tan-awa sa Doktrina ug mga Pakigsaad 59:14).
Pagpuasa og duha ka kan-anan, o mga 24 ka oras. (Kadtong adunay medikal nga mga problema kinahanglan nga mosunod sa mga mando sa doktor.) Kon moabot ang mga kahapdos sa kagutom, gamita kini isip pahinumdom sa pag-ampo pag-usab mahitungod sa katuyoan sa imong pagpuasa.
Hatag og madagayaon nga halad sa puasa.
Kon gibati nimo nga nadasig ka sa pagbuhat sa ingon, ipakigbahin ang imong pagpamatuod sa miting sa puasa ug pagpamatuod.
Sa panahon nga imo untang igahin sa pag-andam og pagkaon ug mokaon, paghimo og maayo nga mga buhat sama sa pagtuon sa mga kasulatan, pagsulat sa imong journal, o pagserbisyo sa uban.
Human sa mga miting sa Dominggo, taposa ang imong puasa pinaagi sa pag-ampo.
Ipasalig nga mahimong mas maayong tawo, ug paghimo og mga plano uban sa Dios kon unsaon nimo sa pag-uswag.”