“Pagpili sa Kahayag sa Ebanghelyo kaysa Kangitngit sa Kalibotan,” Liahona, Ago. 2024.
Mga Young Adult
Pagpili sa Kahayag sa Ebanghelyo kaysa Kangitngit sa Kalibotan
Usa ka espirituwal nga kasinatian nagpahinumdom kanako sa kaimportante sa mga panalangin nga wala nako madawat tungod kay wala nako seryosoha ang ebanghelyo ni Jesukristo.
Litrato nga giposingan sa modelo
Sa una usa ko ka lahi nga tawo kaysa karon.
Bisan og ako natawo nga miyembro na sa Ang Simbahan ni Jesukristo sa mga Santos sa Ulahing Adlaw, wala gayod nako kini seryosoha. Wala gayod nako ikonsiderar kon unsa ang gipasabot sa mga kamatuoran sa ebanghelyo alang sa akong kinabuhi.
Sa Bulgaria, ako ang usa sa pipila ka miyembro sa Simbahan. Kada adlaw, gilibotan ako sa daghang kalibotanon nga mga kinaiya ug mga impluwensya. Daghang batan-on dinhi walay maayong mga moral o mga hiyas, ug usahay ang kalibotan ingon og mangitngit.
Pipila ka tuig ang milabay, sa dihang ako nag-edad og 17, ako nawad-an og paglaom ug walay tumong. Wala ako makig-uban sa maayong mga higala o magbuhat og maayo nga mga butang. Usa ka adlaw ang akong papa misulti kanako nga gipalista ko niya nga motambong sa komperensiya sa For the Strength of Youth sa duol nga nasod. Dili ako gusto nga moadto, apan tungod kay gusto siya nga moadto ko, nagduhaduha ako nga miadto.
Makapatingala, ang espirituwal nga mga kasinatian nga akong nasinati niana nga komperensiya miusab sa akong kinabuhi sa hingpit.
Sa FSY nakita gayod nako unsa ang gipasabot nga mahimong usa ka disipulo ni Kristo—nga magpuyo nga lahi kaysa kalibotan. Kining tanan nga matinud-anong mga batan-on lahi kaayo sa negatibo nga mga impluwensya nga sa kasagaran naglibot kanako. Gibati nako nga nakita gayod nako ang kahayag nga gidala niini nga mga disipulo. Kada adlaw, gibati nako nga ang Espiritu kusog kaayo kon ako mogahin sa akong panahon uban sa maayong mga tawo, magtuon sa mga kasulatan, magkat-on og dugang mahitungod sa ebanghelyo, ug mas nakaila sa Langitnong Amahan ug sa Manluluwas.
Paghimo og mga Kausaban
Nakaamgo ko nga kinahanglan ko nga mag-usab sa akong mga kinaiya ug magsugod gayod sa pagsabot kon unsa ang ikahatag sa ebanghelyo ni Jesukristo sa akong kinabuhi.
Human sa akong pagpauli, dili nako gusto nga mawala ang koneksyon sa Espiritu nga akong gibati atol sa komperensiya, mao nga ako mihimo og tumong sa pagbuhat unsa ang gikinahanglan aron magpadayon nga malig-on ang akong bag-ong nakaplagan nga pundasyon sa ebanghelyo ug magpabilin ang Espiritu uban kanako.
Ang paghimo og mga kausaban medyo lisod og gamay sa sinugdanan. Kinahanglan kong mohunong sa paggahin og panahon sa piho nga mga higala tungod kay sila dili maayong impluwensya ngari kanako. Naningkamot ko nga mahunong ang pipila ka dili maayong mga kinaiya. Nagsugod ko sa pagseryoso sa simbahan. Ang paghimo niini nga mga desisyon nakatabang nako sa pagpuno sa akong kinabuhi sa maayong mga impluwensya. Unsa ang nakatabang nako nga magpabilin nga kanunay nga konektado ngadto sa Espiritu mao ang paggahin og panahon kada adlaw sa pagtuon sa mga kasulatan, ilabi na sa Basahon ni Mormon.
Mga Pahinumdom sa mga Panalangin sa Ebanghelyo
Ang mga pagtulon-an sa mga kasulatan nagpahinumdom nako unsa gayod ang importante sa akong kinabuhi. Kon ako mobati nga nag-inusara sa akong pagtuo, ilabi na nga gamay ra kaayo ang mga miyembro dinhi sa Bulgaria, akong gitugotan ang mga kamatuoran sa karaang mga propeta sa pagpalig-on sa akong hugot nga pagtuo diha ni Jesukristo.
Usa sa akong paborito nga mga bersikulo mao ang Moroni 10:32: “Duol ngadto kang Kristo, ug paghingpit diha kaniya, ug ilimud ang inyong mga kaugalingon sa tanan nga dili diosnon; ug kon kamo molimud sa inyong mga kaugalingon sa tanan nga dili diosnon, ug mohigugma sa Dios uban sa tibuok ninyo nga gahom, hunahuna ug kusog, niana ang iyang grasya igo alang kaninyo, nga pinaagi sa iyang grasya kamo mahimo nga hingpit diha kang Kristo.”
Ang mga kasulatan nga sama niini nga nagpahinumdom nako sa gitanyag nga kahayag sa ebanghelyo ug nagpalig-on nako kon ako adunay malisod nga panahon. Ang mga kasulatan nagpalig-on kanunay sa akong pundasyon sa hugot nga pagtuo.
Karon, nag-andam ko sa pagserbisyo og misyon, ug nag-atubang gihapon ko sa wala paabuta ug malisod nga mga sitwasyon (sama sa karong bag-o nga ako nadayagnos nga adunay type 1 diabetes). Apan ang pag-una sa espirituwal nga mga kinaiya nakatabang nako nga mobati sa gugma sa Langitnong Amahan sukad masukad.
Si Presidente Russell M. Nelson karon bag-o nagpahinumdom nato nga ang “paghunahuna og celestial nagpasabot nga espirituwal nga maghunahuna.”
Ang pagpaningkamot sa paghimo sa mga butang nga nakapahimo sa Espiritu nga magauban kanako kada adlaw nakatabang gayod nako sa paghunahuna og celestial—aron espirituwal nga maghunahuna. Gibati nako sa akong kaugalingon nga mas mahimong sama ni Kristo samtang ako maghunahuna unsa ang Iyang buhaton. Ang pagbaton sa Espiritu uban nako nakatabang nako nga adunay paglaom ug mahinumdom sa mga panalangin nga giandam sa Langitnong Amahan alang sa tanan kinsa mopili sa pagsunod Kaniya.
Magmatinud-anon sa Kahayag
Ang pagpakabuhi sa daotan nga kalibotan diin ang mga butang ingon og mangitngit mahimong malisod usahay. Apan nakatabang usab kini kanako nga mas makaamgo sa kahayag, nga lahi ang kainit ug kahayag sa ebanghelyo ni Jesukristo. Wala nako masabti ang kaimportante niining talagsaon nga panalangin sa akong kinabuhi sulod sa katuigan. Mapasalamaton kaayo ko sa espirituwal nga mga kasinatian nga mahimong igiya sa Langitnong Amahan kanato, tungod kay karon, ako nagmatinud-anon sa kahayag ug sa kamaya sa ebanghelyo kay sa masukad.
Ako mopamatuod nga kon kamo mosalig sa Ginoo ug magtuon gikan sa Basahon ni Mormon kada adlaw, ang inyong kinabuhi mahimong mas sayon. Kamo magsugod sa pagkakita sa mga panalangin nga ihatag sa atong mahigugmaong Langitnong Amahan kanato kada adlaw, ug kamo makaamgo kon kinsa kamo mahimong mamahimo uban sa tabang sa Ginoo.
Ang tagsulat nagpuyo sa Varna, Bulgaria.