Digital Lamang: Mga Young Adult
Naglisod sa Pagtuon sa Kasulatan? Tutoki Kon Giunsa Nimo sa Pagbasa
Ang tagsulat nagpuyo sa Kisumu, Kenya.
Sa dihang gitutokan na nako ang akong pagtuon sa kasulatan, gibati nako pag-usab ang kalinaw.
Nakahibalo ko nga ang mabalik na sa akong pinuy-anan human sa akong misyon mahimong usa ka hagit nako. Kini mosulay sa akong determinasyon ug tinguha sa pagpadayon sa pagsunod sa ebanghelyo. Apan tungod sa mga kasinatian nga akong naangkon sa akong misyon, ako usab nakahibalo nga ako mapanalanginan kon akong unahon ang gahom ug panalipod nga mahatag nianang kada adlaw nga pagtuon sa kasulatan.
Busa, sa wala pa ko mipauli sa panimalay, mihukom ko nga himoon ang pagtuon sa kasulatan nga akong tumong.
Sa akong misyon, nakahimo ko sa pagtuon sa akong mga kasulatan sa kada adlaw. Kining espesyal nga higayon uban sa Langitnong Amahan mipanalangin sa akong kinabuhi ug mipalawom sa akong gugma sa mga kasulatan.
Apan sa dihang nauli na ako sa panimalay ug sa paglabay sa panahon, ang kinabuhi nahimong busy. Misugod ko sa pag-eskwela sa BYU-Pathway Worldwide, nagtrabaho ko og lapas sa oras, ug kanunay ko nga mabalda.
Ang akong telepono ug ang akong busy nga kinabuhi nagpataliwala tali nako ug sa mga kasulatan. Gibati nako nga ang usa ka bongbong nagkataas tali nako ug sa Langitnong Amahan. Hangtod nga gitutokan nako ang akong pagtuon sa kasulatan diha pa nako nabuntog ang babag ug nakakaplag sa akong dalan pabalik sa akong Manluluwas.
Makugihon nga Pagsiksik batok sa dili makanunayon nga Pagbasa
Sulod sa dugay-dugay nga higayon, nagbasa ko sa mga kasulatan sa gabii ug kon ako adunay bakanting higayon sa buntag. Apan bisan kon ako nagbasa niining mga higayona, ang akong telepono kanunayng mokuha sa akong pagtagad. Inigkahuman sa akong pagtuon, dili na nako mahinumdoman kon unsa ang akong nabasa.
Sa usa sa akong mga kurso sa BYU—Pathway, nagtuon kami og pagdumala sa oras. Gihangyo kami sa pagtan-aw sa among mga tumong sulod sa tuig ug mangita og usa ka paagi nga magpabilin nga makanunayon diha niini. Atol niini nga buluhaton, napugos ako sa pag-atubang sa babag nga akong nahimo gumikan sa akong kaugalingong nabatasan. Nakaamgo ko nga wala nako makab-ot ang akong tumong sa pagtuon sa mga kasulatan sa matag adlaw.
Mao nga pursigido ko nga nag-ampo mahitungod kon unsaon nako nga mahibalik sa akong orihinal nga tumong ug mahimong mas makugihon nga disipulo ni Jesukristo.
Dayon nakaamgo ko nga ang akong problema mao kon giunsa nako sa pagtuon ang mga kasulatan.
Sa dihang sakop pa siya sa Seventy, si Elder Merrill J. Bateman mitudlo: “Aron makaduol ngadto kang Kristo ug mahimong hingpit diha kaniya, ang matag tawo kinahanglan modawat og usa ka pagpamatuod sa mga pulong sa Ginoo. Ang uban nga mga indibiduwal maluya tungod kay sila mapakyas sa pag-abli sa ilang mga basahon, ang uban tungod kay sila kaswal ra ang pagbasa. Sama sa gilaoman sa tawo, adunay kalainan tali sa makugi nga pagsiksik o ‘pagpamalandong sa mga kasulatan’ ug sa kaswal nga pagbasa.”
Sa dihang akong giablihan ang mga kasulatan inubanan sa usa ka tinguha sa pagpamalandong ug pagtuon sa mga kamatuoran sa sulod, akong nabag-o ang ang-ang sa akong panabot sa ebanghelyo ug gibati nga mas nasuod ngadto sa akong Manluluwas, si Jesukristo. Mas kusog nakong nabati ang gugma sa Dios, ug pinaagi sa pagbati niini, mas sayon ra kanako ang pagtabang sa uban nga nagkinahanglan.
Usa sa akong paborito nga mga kasulatan mao ang Mga Taga-Filipos 4:13, nga nagpahinumdom kanako nga, “Mahimo ko ang tanang butang pinaagi kang Kristo nga nagapalig-on kanako.”
Akong nabatyagan nga ang presensiya sa Espiritu kusog kaayo sa akong kinabuhi kon akong tagaan og taas nga prayoridad ang espirituwal nga gimbuhaton ug mohinumdom nga ako makahimo gayod sa tanang butang pinaagi ni Kristo.
Paggahin og Panahon alang Kaniya
Kon ako mobati og mga pagduha-duha sa akong kinabuhi, akong hinumduman nga si Jesukristo mao ang akong Manunubos ug akong tigtudlo. Isip atong tigtudlo, Iyang makita ang atong pag-uswag ug makatabang kanato sa pagbuntog sa bisan unsang butang. Ako nakahibalo nga ang Manluluwas nakabuhat niini ug sa mas daghan pa alang kanako. Inubanan sa Iyang tabang, ako mahimong mas mahisama Kaniya.
Makakaplag ako sa mga kamatuoran nga sama niini diha sa mga pulong sa mga kasulatan sa matag adlaw! Kon akong makaplagan kini nga mga kamatuoran, akong makaplagan si Jesukristo.
Si Presidente Russell M. Nelson mitambag: “Ang Ginoo nakaila kaninyo ug nahigugma kaninyo. Siya mao ang inyong Manluluwas ug ang inyong Manunubos. Siya nangulo ug naggiya sa Iyang Simbahan. Siya ang mangulo ug moggiya kaninyo sa inyong personal nga kinabuhi kon kamo moggahin og panahon alang Kaniya diha sa inyong kinabuhi––matag adlaw.”
Sukad nga akong gibag-o ang akong tumong sa pagtuon sa mga kasulatan sa matag adlaw (ug tinuoray nga mamalandong niini), akong gipasalamatan ang gahom ug panalipod nga nahatag niini ngari kanako. Kon atong maila nga ang Manluluwas kanunayng anaa aron molig-on kanato, ilabi na pinaagi sa mga kasulatan, kita makaangkon og tinuod nga kalinaw. Ang tinuod nga kalinaw dili moabot gikan sa pagtan-aw sa uban—bisan kon kini ingon og aduna sa tanang butang nga inyong gustohon.
Tungod kay si Jesukristo mao ang tubag.