Digital Lamang: Mga Young Adult
Pagbuntog sa Espirituhanong Pagkaluya
Ang tagsulat nagpuyo sa United Arab Emirates.
Sa dihang nauli na ko gikan sa akong misyon, mibati ko og grabeng kabug-at mahitungod sa unsay sunod nga buhaton.
Ganahan ko sa akong misyon. Apan sa dihang ako mipauli na sa Pilipinas, nagsagubang ko og daghang kagul-anan tungod sa butang nga akong gitawag og “espirituhanong pagkaluya.”
Para nako, ang espirituhanong pagkaluya nagpasabot og pagbati og hingpit nga pagkawalay kusog human gihatag na ang tanan nimong mahimo. Kini nakaapekto sa akong kinabuhi hangtod sa punto nga nag-urong na lang ko sa akong lawak sa tibuok adlaw tungod kay gikapoy na kaayo ko.
Isip usa ka nauli na nga misyonaryo, gibati nako ang kabug-at gikan sa pamilya, mga higala, ug komunidad kalabot sa mga desisyon sa akong kinabuhi. Mibati ko nga ang mga tawo nga nagpalibot kanako adunay daghang hunahuna mahitungod sa mga pagpili nga akong gihimo ug kon unsa ang angay nakong buhaton—makapabudlay kaayo kadto. Akong gitago kon unsa ang akong gibati gikan sa tanan tungod kay dili ko gusto nga masagmuyo sila.
Paglabay sa panahon, ang kabug-at nahimong sobra na kaayo alang kanako aron maantos.
Nabati nako ang paagi nga gihulagway ni Elder Dieter F. Uchtdorf sa Korum sa Napulog Duha ka Apostoles:
“Usahay ang espiritwal nga pagkahugno hinay-hinayng moabot nga dili gani ta kamatikod unsay nanghitabo. Sama sa anam-anam nga pagkahulma sa dakong bato, ang espiritwal nga kasakit ug kasubo anam-anam nga matigom, magpabug-at sa atong mga kalag hangtod bug-at na kaayong pas-anon. Sama pananglit, mahitabo kini kon ang atong mga responsibilidad sa trabaho, balay, ug sa simbahan mahimong bug-at na kaayo nga dili na nato makita ang kalipay sa ebanghelyo. Tingali mobati ta sama og wala na kitay ikahatag o ang pagsunod sa mga sugo sa Dios lapas na sa atong kusog.”
Bisan og mibati ako niining paagiha, nakahimo ako sa pagkaplag og kalinaw dihang midangop ako ngadto sa Langitnong Amahan alang sa giya. Aniay tulo ka paagi nga nahimo ko kini:
1. Pasagdan ang mga Gilaoman sa Ubang Tawo
Ang mga gilaoman sa ubang tawo nakapahimong malisod alang kanako nga makakaplag sa kalinaw nga akong gikinahanglan sa pagbalhin balik sa kinabuhi sa panimalay isip usa ka nauli na nga misyonaryo.
Busa nag-ampo ko mahitungod sa unsa nga direksiyon ang gikinahanglan nakong subayon alang sa akong kaugmaon ug misulti sa Langitnong Amahan mahitungod sa kabug-at nga akong gibati. Samtang naninguha ako sa pagdapit sa Espiritu ngadto sa akong kinabuhi, ako mibati nga naaghat sa pagbuhat og usa ka risgo nga desisyon ug mobalhin ngadto sa United Arab Emirates aron panarbaho. Kini nga inspirasyon hilabihan nga wala damha, ug daghang tawo sa akong komunidad nakurat sa dihang ako misunod niini nga pag-aghat.
Sa kalit lang mibati ko og hilabihan ka dakong paglaom! Mibati ko nga pinaagi sa Espiritu, ang Dios naggiya nako sa usa ka direksiyon nga makadala kanako sa pagkaayo nga akong gikinahanglan.
Ang pagkat-on nga pasagdaan ang mga gilauman sa ubang tawo ngari nako ug pagtutok sa giya sa Langitnong Amahan nakatugot kanako sa pagpadayon sa unahan nga adunay paglaom ug hugot nga pagtuo.
Si Elder Uchtdorf mitudlo usab, “Makit-an nato ang espiritwal nga pagkaayo kon mopalayo kita sa mga gabon sa kalibotan ug moadto sa walay kataposang Kahayag ni Kristo.”
2. Paglingkawas sa Akong Kaugalingon gikan sa Pagtandi
Sa dihang nauli na ako sa panimalay gikan sa akong misyon, nanglimbasog usab ako sa pagtandi sa akong kaugalingon ngadto sa uban.
Si Elder Uchtdorf namulong sa mga peligro sa pagtandi, nag-ingon: “Migahin kita og daghan kaayong panahon ug kusog sa pagkompara sa atong kaugalingon ngadto sa uban[.] … Mao kini hinungdan nganong nakamugna kita og mga kalaoman alang sa atong kaugalingon nga imposibling makab-ot. Isip resulta, wala gayod nato pasalamati ang maayo natong mga paningkamot tungod kay daw minos ra kini kay sa nabuhat sa uban.”
Nakatutok ra kaayo ako sa unsay gibuhat sa uban nga mga nauli na nga mga misyonaryo, nga nakapahimo nako nga mobati nga wala kaayo akoy nahimong pag-uswag. Apan sa pagpangayo og tabang sa Langitnong Amahan inubanan sa pag-usab sa akong gitutokan ug aktibong naningkamot sa pagbuhat niini nagtugot kanako nga dili na kaayo mabalaka kon unsa ang gipangbuhat sa uban. Hinoon, gitutokan nako ang akong lahi nga dalan ug ang mga lakang nga mahimo nakong buhaton sa matag adlaw paingon ngadto sa akong espirituhanon ug temporal nga mga tumong.
3. Pagkahimong Aktibo sa Espirituhanong Paagi
Ang pagbalhin ngadto sa Dubai nagtudlo kanako sa kaimportante sa pagka aktibo. Bisan unsa pa man ang atong mga kahimtang, kita mahimong aktibo mahitungod sa paghimo og mga kausaban ug sa pagtinguha kang Kristo bisan asa man kita.
Bisan og ang ebanghelyo ingon og makalaay sa dihang mipauli na ko gikan sa akong misyon, ang akong aktibong pag-apil niini mao gayod ang tubag sa akong mga gibati nga pagkaluya. Akong nakaplagan ang mas dakong kalinaw ug pagkaayo samtang ako naghimo og paningkamot nga mahimong kabahin sa akong ward ug maggahin og oras alang sa Ginoo sa matag adlaw.
Si Presidente Russel M. Nelson mipamatuod bahin niini nga konsepto, nag-ingon: “Kita nagkinahanglan og inadlaw nga mga kasinatian sa pagsimba sa Ginoo ug pagtuon sa Iyang ebanghelyo. Mohangyo ko kaninyo nga ipatigbabaw ang Dios sa inyong kinabuhi. Hatagi Siya og patas nga bahin sa inyong panahon. Kon inyo kining buhaton, panid-i kon unsay mahitabo sa inyong positibo nga esprituhanong paglambo.”
Sa higayon nga mag-atubang ako og espirituhanong pagkaluya, ako karon nakahibalo na nga ang dalan sa pagkaplag og kalinaw mao ang pagpabilin sa espirituhanong paglambo. Usa ka paagi nga kita makahimo niini mao ang pagbalin sa atong pagtutok ngadto sa Manluluwas ug pasagdaan ang mga gilaoman sa ubang tawo.
Sa dihang akoa kining gibuhat, akong nakaplagan ang kalinaw nga akong gikinahanglan sa pagpadayon sa unahan diha sa dalan sa pakigsaad—usa ka lakang sa matag higayon.