BATAN-ONG MGA HAMTONG
Sayo nga Nauli nga mga Misyonaryo: Wala Kamo Mag-inusara
Ang tagsulat, kinsa gikan sa France, nag-eskwela sa Utah, USA.
Ang batan-ong mga hamtong mipaambit kon giunsa nila pagkakaplag og kahulugan ug kalinaw human mipauli og sayo gikan sa ilang mga misyon ug unsaon usab ninyo.
Gilitratohan ni Tiffany Myloan Tong
Ang dakong grupo sa full-time nga mga misyonaryo nga naningkamot sa pagtuman sa ilang katungdanan sa “pangimbitar sa uban sa pagduol ngadto kang Kristo”1 nagdala og “dako nga paglaum ug tuman nga hingpit nga kalipay” (Alma 56:17) ngadto sa daghan. Kadto nga mga misyonaryo, sama sa batan-on nga mga manggugubat sa Basahon ni Mormon, nakig-away kada adlaw uban sa “milagroso nga kusog; ug uban sa ingon ka dako nga gahum” (Alma 56:56).
Apan bisan sa 2,060 ka batan-on nga mga manggugubat, sa gihapon dihay 200 kinsa “nakuyapan tungod sa ka kulang sa dugo” (Alma 57:25). Nakapaminos ba kini sa ilang kaisug? Minos sa kalig-on? Minos sa kawalay kahadlok? Minos ang katakus kay sa uban? Wala gayud.
Sama sa gihapon, kamong mga misyonaryo nga mipauli og sayo tungod sa mga rason sa mental ug pisikal nga kahimsog dili minos sa kaisug, minos sa kalig-on, minos sa kawalay kahadlok, o minos sa katakus. Ang inyong paglahutay sa inyong mga pagsulay makapahingangha—ug angay lang nga makapahingangha. Nakalingkawas kamo—tingali nasamdan pag-ayo, apan nakalingkawas. Ang inyong mga samad, ma-pisikal, mental, o espiritwal man, kinahanglan karon nga atimanon (tan-awa sa Alma 57:28). Alang niadtong mipauli tungod sa mga rason nga adunay kalabutan sa pagkatakus, ang paghinulsol mahimong usa ka mahinungdanong bahin sa inyong pagkaayo.
Samtang nagpahiangay kamo diha sa panimalay, siguroha nga inyong gihatagan og panahon ang inyong kaugalingon nga magpaayo ug hinumdumi nga kanunay nga mosalig sa Dios (tan-awa sa Alma 57:27). Mipahinumdom Siya kanato: “Kon Ako mohatag og usa ka sugo ngadto ni bisan kinsa nga mga anak sa mga tawo nga mohimo og usa ka buhat ngadto sa akong ngalan”—sama pananglit, pagserbisyo og misyon—“ug kadto nga mga anak sa mga tawo moadto uban sa ilang tibuok nga kusog ug silang tanan kinahanglan mohimo niana nga buhat, ug dili mohunong sa ilang kakugi, ug ang ilang mga kaaway”—sa ubang mga sitwasyon, ang atong pisikal o mental nga mga sakit o ubang mga angol—“mosulong diha kanila ug mopugong kanila sa paghimo niana nga buhat, tan-awa, kini angay kanako nga dili na kinahanglan nga ipabuhat diha sa [ilang] mga kamot … , apan sa pagdawat sa ilang mga halad” (Doktrina ug mga Pakigsaad 124:49).
Bisan unsa pa ang mga samad nga inyong naangkon—o naukab pag-usab—diha sa panggubatan, basta takus lang kamo nga miserbisyo o hingpit nga naghinulsol, ang inyong kontribusyon gikinahanglan ug gidawat sa Ginoo.
Mga litrato gikan sa Getty Images
Ang pagbasa sa mosunod nga mga istorya mahimong makatabang kaninyo sa pagkakaplag og pagkaayo diha sa kamatuoran nga kamo wala mag-inusara ug nga ang pagpaambit sa inyong istorya makatabang sa uban.
Hibaloi Nga ang Manluluwas Mibati sa Inyong Kasakit
Sa pagsakay og eroplano padulong sa akong misyon, gihanduraw nako kon sama sa unsa ang akong pag-uli. Ang akong pamilya ug mga higala mohugyaw sa kalipay ug mogakus kanako, ug magpuyo ako sa nahabilin sa akong kinabuhi diha sa kalinaw, magtagamtam sa matag panalangin nga miabut isip dungganong mipauli nga misyonaryo.
Paglabay sa napulog usa ka bulan, samtang nagsakay og eroplano aron mopauli, ang matag higayon gigahin sa mabalak-ong paghunahuna kon unsay sunod nga mahitabo. Ang akong pamilya naghulat, ug bisan tuod nalipay sila ug migakus kanako, sa kalit lang, nag-inusara na ako nga walay ideya kon unsay sunod nakong buhaton.
Ang Manluluwas nakakita sa akong lisud nga mga panahon. Nasayud siya kon unsay akong gibati nga naghigda sulod sa tulo ka semana nga naghilak ug natulog aron makalikay sa reyalidad. Nasayud Siya nga magkinahanglan ako sa Iyang kusog tungod kay walay lain sa akong palibut nga makasabut o bisan mobati sa unsay akong gisinati. Apan nakasabut Siya. Dili unta nako malahutay ang akong misyon o ang pag-uli og sayo kon wala Siya.
Ali Boaza, Queensland, Australia
Mahimong Andam sa Pagsunod sa Kabubut-on sa Ginoo
Maayo kaayo ang dagan sa akong misyon. Aduna akoy talagsaong mga kasinatian nga magpabilin sa akong kasingkasing hangtud sa kahangturan. Hinoon, human sa walo ka bulan, misugod ko sa pagkaangkon og mga problema sa panglawas. Human sa daghan nga pagpuasa ug pag-ampo, gipapauli ko. Nasagmuyo ako. Nagtuo ko nga ang tanan akong sayop. Mihunong ko sa pagbasa sa mga kasulatan ug sa pag-ampo kanunay. Naghunahuna ko kon gibuhat ba nako ang tanan nga akong mahimo aron magpabilin.
Apan nakaamgo ko nga gisulayan ako aron makita kon magpabilin ba akong maunungon ngadto sa Ginoo. Lisud kadto, apan akong gibutang ang akong pagsalig diha Kaniya, ug nahibalik ako sa natad sa misyon, diin nakaangkon na usab ako og talagsaon nga mga kasinatian.
Dayon, mibalik ang akong mga problema sa panglawas. Apan niining higayuna mas andam na akong mosunod sa kabubut-on sa Langitnong Amahan. Busa mipauli ko sa ikaduhang higayon. Lisud kadto, apan nasayud ko nga makakat-on ako gikan sa tanan nga akong nasinati.
Bisan tuod wala ko makaserbisyo sulod sa 24 ka bulan, nasayud ko nga nakaserbisyo ko og madungganon nga misyon. Nasayud ko nga ang panahon nga nagserbisyo ko sa Ginoo bililhon kanako ug sa mga tawo nga akong gitabangan. Mapasalamaton ko sa akong Manluluwas alang sa Iyang walay kinutuban nga Pag-ula. Nasayud Siya sa matag usa sa atong mga hagit. Ug kon mosalig kita Kaniya uban sa hingpit nga pagtuo, dili gayud kita mag-inusara.
Fillipe Hoffman, Goiás, Brazil
Ayaw Pag-usik og Panahon sa Paghunahuna kon Ngano
Ang hunahuna nga mopauli og sayo nakasagmuyo pag-ayo. Pagkahuman dayon og sugyot sa magtatambag niini, mibati ko og hilabihan ka komplikado nga panagsagul sa mga emosyon: Kaulaw. Kahupayan. Kahasol sa konsensya. Kalinaw. Kasubo. Tanan sa samang higayon.
Nasayud ko nga gisuportahan ako sa Dios tungod kay nakahimo ako sa paglahutay nianang unang semana sa panimalay. Ug dayon nakalahutay ko og lain pa nga semana. Ug lain pa. Hangtud nga sa katapusan mibati ko nga mora na og naulian. Ang akong papa mao ang akong pinakadako nga suporta ug miatiman gayud kanako. Kanunay siyang ganahan nga makig-istorya ug mogahin og panahon uban kanako. Dili aron mag-usisa nganong sayo ko nga mipauli, apan aron lang masayud kon kumusta na ko.
Sa dihang namatay si papa sa usa ka aksidente samtang nagkatkat og bato paglabay sa pipila ka bulan, nasayud ko sa walay pagduha-duha nga ang Dios adunay plano alang kanako. Ang makauban ang akong papa sa katapusang mga bulan sa iyang kinabuhi nakapalig-on sa akong pagpamatuod sa plano sa kaluwasan. Wala gihapon ko makasabut sa tanang rason nganong kinahanglan ko nga mouli sa panahon nga miuli ko, apan nakat-unan usab nako nga kon mogahin ka og dugayng panahon sa paghunahuna kon ngano, niana mataligam-an nimo ang talagsaong mga milagro nga gihatag sa Dios alang kanimo matag adlaw.
Kristen Watabe, Ohio, USA
Ipahiangay ang Inyong mga Gilauman
Sa dihang nasakit ko pag-ayo nga dili na makapadayon sa akong misyon, nasayud ko nga gusto sa Dios nga mopauli ko, apan hingpit kadto nga sukwahi sa unsay akong gusto. Naguol usab ako sa kalit nga pagkawala sa akong kahimsog, nga sa kaulahian namatud-an nga maoy sinugdanan sa usa ka malungtaron, makapaluya nga kahimtang.
Samtang nagpahiangay sa akong sakit, gibati nako nga nawad-an ko sa akong tumong. Nagkinahanglan kaayo ko og tabang ug mibati nga wala akoy ikatanyag. Apan nasayud ko nga kinahanglang magpadayon ko sa pagpakita og pagtuo, mao nga mipadayon ko sa pagtuon, pag-ampo, ug pagpaningkamot sa pagsunod sa Espiritu. Samtang nagtuon sa Bag-ong Tugon usa ka adlaw, akong nakita ang usa ka painting ni James Tissot nga giulohan og Si Jesus Mimando sa mga Apostoles sa Pagpahulay. Kini nga paghulagway sa Marcos 6:30–31 dali nga mihupay kanako. Samtang akong nakita si Kristo nga nagbantay sa Iyang nagpahulay nga mga sulugoon, gibati nako kon unsa kadako ang Iyang gugma kanila. Ug kanako.
Sa katapusan, akong nakat-unan nga ang akong mga gilauman para sa akong kaugalingon dili sama sa gilauman sa Dios alang kanako. Sa ubang paagi, ang Iyaha mas mahagiton sa personal nga paagi, apan mas napahaum kini sa akong mga panginahanglan. Mapasalamaton kaayo ko sa paagi nga Iya akong gitudloan nga mas hingpit nga modawat sa Iyang tabang ug sa Iyang perpekto nga gugma. Ang Iyang pagtuo nganhi kanako mihatag kanako sa paglaum nga akong gikinahanglan aron magpadayon.
Sabrina Maxwell, Utah, USA
Pabilin diha sa Dalan sa Ebanghelyo
Sayo akong miuli gikan sa Philippines Cebu East Mission. Ang pabalik-balik nga paghunahuna kon unsa unta ang akong gibuhat ug ang pagbati nga wala ko mosunod sa naandang sundanan sa mga misyonaryo pinaagi sa pagpauli og sayo nakapalisud sa akong pagpahiangay diha sa balay. Tungod kay nagserbisyo ko sa akong nasud nga natawhan, nanlimbasug ko sa paghunahuna nga akong napakyas ang akong branch ug sa kahibalo nga wala nako makab-ut ang ilang gilauman. Ang pagkumpara sa akong kaugalingon ngadto sa mga misyonaryo nga miserbisyo sa saktong gidugayon sa misyon nakapahimo nako sa pagtan-aw sa akong kaugalingon isip minos ang katakus o isip usa ka sinalikway.
Sa katapusan, ang Ginoo mitudlo kanako nga ang usa ka misyon usa lamang sa daghang paagi sa pagserbisyo Kaniya. Dili kini kon asa o unsa ka dugay apan giunsa ninyo pagserbisyo nga maoy importante. Gitudloan ako Niya nga magmapainubsanon ug magpabilin sa dalan sa ebanghelyo bisan kon ang mga butang mahimong lisud ug dili mahitabo sa unsay akong gusto.
Jasper Gapuz, Philippines
Hunahunaa ang Langitnong Amahan ug si Jesukristo
Gitawag ko nga moserbisyo sa New Zealand Wellington Mission. Sa dihang akong nahibaloan nga kinahanglan ko nga mopauli og sayo, gibati nako nga daw akong gipakyas ang Langitnong Amahan ug ang akong mga ginikanan.
Daghan kaayo ko og nakat-unan gikan sa akong misyon ug gikan niini nga sitwasyon. Wala ko nagkinahanglan kaniadto nga mosalig sa Langitnong Amahan ug sa Pag-ula sa Manluluwas sama sa akong gibuhat sa dihang mipauli ko og sayo. Gikinahanglan nakong mosalig sa Dios ug modawat sa bisan unsa nga gusto Niya nga akong maagian ug makat-unan. Dili nako ikalimud ang gahum sa Pag-ula ug sa unsang paagi nga tinud-anay nakong nahibaloan nga si Jesukristo mao ang akong Manluluwas. Akong nakat-unan nga ang Dios mipaubos kanako ug mitudlo kanako pinaagi sa akong mga kahuyang ug lisud nga mga panahon.
Bisan asa pa ko, o kon aduna man akoy name tag sa misyonaryo sa akong dughan, usa gihapon ako ka disipulo ni Jesukristo. Nasayud ko nga ang Ginoo nagmahal gihapon kanako ug nag-uban kanako, ug gusto Niya nga magpadayon ko sa pagserbisyo sa uban. Ug bisan tuod nakapauli na ko, nasayud ko nga dili ako pakyas tungod kay mitabang Siya kanako nga mahimong mas maayong tawo pinaagi niini nga kasinatian.
Natasha Krisanalome, Thailand
Lig-ona ang Inyong Relasyon uban sa Manluluwas
Aduna akoy kahigayunan nga moserbisyo sa akong misyon sa Anchorage, Alaska, USA. Makapaguol kaayo nga mopauli og sayo tungod sa mga komplikasyon gumikan sa pagkapiang sa duha nako ka buol-buol ug mga tiil. Siguradong dili gayud kadto sayon, apan aduna akoy daghang mga kasinatian nga mitudlo kanako og bililhon nga mga leksyon sa kinabuhi. Akong nakat-unan nga ang Langitnong Amahan adunay katuyoan alang sa tanan nga nahitabo sa atong kinabuhi. Nakat-unan usab nako kon unsaon sa paglahutay sa mga pagsulay gamit ang mas maayo nga panglantaw. Nahimong mas lig-on ang akong relasyon ngadto sa Manluluwas kay sa kaniadto tungod kay akong nakat-unan unsa ka mapuslanon ang makaayo nga gahum sa Iyang Pag-ula.
Ang Langitnong Amahan mitabang gayud kanako agi niining lisud nga panahon. Bisan tuod og maglisud gihapon ko usahay, nasayud ko nga ang Langitnong Amahan maoy nagkontrolar ug nga nasayud Siya kon unsa ang akong gikinahanglan sa akong kinabuhi labaw kay kanako.
Amber Bangerter, Utah, USA
Hibaloi Nga ang Misyonaryo nga Buhat Magpadayon Bisan Asa man Kamo
Miserbisyo ko sa Hungary Budapest Mission. Sa dihang mipauli ko og sayo, lisud kadto tungod kay ang akong mga kauban anaa pa sa ilang mga misyon ug gimingaw ko sa pagka-misyonaryo. Nahadlok usab ko nga hukman ko sa ubang mga miyembro sa Simbahan, apan maayo gani, ang tanan mahigugmaong mitratar kanako ug nakasabut sa akong sitwasyon.
Paglabay sa panahon, naarang-arang ang akong gibati. Mibasa ko og artikulo sa Liahona mahitungod sa sayong nauli nga mga misyonaryo nga nakatabang kanako nga maarang-arang ang pagbati tungod kay wala na nako gibati nga ako ra ang bugtong misyonaryo nga mipauli og sayo (tan-awa sa Destiny Yarbro, “Nakauli og Sayo Kay sa Giplano,” Liahona, Ene. 2018, 44–47). Ug seryuso nakong gituohan ang gisulti sa akong iyaan: “Ang misyonaryo nga buhat magpadayon bisan asa kita.”
Lucas Ludwig Saito, São Paulo, Brazil
Palibuti ang Inyong Kaugalingon sa Pagkamaayo
Wala gayud ako magtuo nga mopauli ko og sayo gikan sa akong misyon, ug naulaw ug gikulbaan ko nga makig-atubang sa tanan. Bisan tuod og kini mao ang usa sa labing lisud nga mga higayon sa akong kinabuhi, milambo usab ko gumikan sa kasinatian. Mihimo kini kanako nga mas maayong tawo.
Mipauli ko aron moagi sa proseso sa paghinulsol. Ang pipila ka mga pagpili nga akong gihimo sa wala pa ang akong misyon wala mahiuyon sa mga pagtulun-an sa ebanghelyo ug sa mga sugo. Tungod sa akong kaulaw ug sa tinguha nga mapabilin ang akong kahimtang sa pagkamiyembro diha sa Simbahan, wala nako daan gibuhat ang proseso sa paghinulsol uban sa akong bishop. Apan sulod sa unang pipila ka bulan, gibati nako ang panginahanglan nga mopauli aron maghinulsol aron makaserbisyo ko uban sa dungog ug integridad.
Ang mga butang nga nakaawhag gayud kanako sa akong pag-uli mao ang pag-apil sa mga kalihokan nga espirituhanong makabayaw, lakip sa mga miting sa Simbahan, mga proyekto sa pagserbisyo, ug sa templo, sa dihang makahimo na ko. Hinoon, ang labing nakatabang nako mao ang mga tawo sa akong palibut—pamilya, pipila ka mga higala, ug gani ang mga tawo nga wala pa nako mahimamat kaniadto mipakita kanako og gugma ug pagkamabination.
Sa kinatibuk-an, uban sa tabang sa Ginoo ug sa Kristohanon nga mga ehemplo libut kanako, nakahimo ko sa pagbalik ngadto sa Florida aron sa pagtapos sa akong misyon. Manghinaut ko nga maningkamot kitang tanan nga mahimong Kristohanon ngadto sa uban, kon mipauli man sila og sayo o nanginahanglan lang gayud.
Caigen Stuart, Utah, USA
Salig sa Manluluwas
Nadawat nako ang akong mission call ngadto sa Zambia Lusaka Mission. Usa sa labing lisud nga mga butang mahitungod sa pagpauli og sayo mao nga ang mga miyembro wala makasabut sa sayong miuli nga mga misyonaryo.
Sa akong pagbalik, naospital ko sulod sa tulo ka semana, ug walay miyembro sa simbahan nga mitawag o mibisita. Ang bugtong mga tawo nga miabut mao ang lider sa grupo ug ang mga misyonaryo aron mopahigayon sa sakrament ngari kanako kada Dominggo—ug tungod lamang kini kay mihangyo ako kanila. Magamit gayud unta nako ang tabang sa mga miyembro aron mapalambo ang akong kusog ug akong pagtuo kang Jesukristo niadtong unang pipila ka semana sa panimalay, apan kinahanglan nakong mobuhat niini nga nag-inusara.
Ang Ginoo padayon nga mitudlo kanako sa matag adlaw nganong mas sayo nga miuli kay sa gidahuman, bisan kon usahay lisud gihapon kining sabton. Nakaamgo na ako karon nga ang pagpauli og sayo nakatugot kanako sa pagpangita sa akong amahan ug sa iyang pamilya ug sa pag-ugmad og relasyon uban kanila. Nakatugot kini kanako sa pagdiskubre nga aduna akoy problema sa panglawas nga padayon nga nahimong kabahin sa akong kinabuhi. Ug akong nahibaloan unsa ang akong mga kalig-on ug kahuyang—sama pananglit, unsaon sa pagsulti og “dili.” Kaniadto, lisud kaayo alang kanako ang pagbalibad sa bisan unsa o bisan kinsa. Kanunay akong andam sa pagbuhat og mga butang ug sa pag-una sa uban, bisan unsa pa ko ka kapoy o kadaghan og trabaho—nga dili sayop, apan tungod niini nga pagsulay, akong nakat-unan nga usahay kinahanglan nakong unahon ang akong kaugalingon.
Nagpadayon gihapon ko sa pagdiskubre og bag-ong mga butang mahitungod sa Ginoo ug nganong kinahanglan kong mopauli og sayo. Apan daghang mga panalangin ang miabut kanako, ug nagsalig ako sa Ginoo kada adlaw. Bisan tuod lisud usahay ug ang mga tawo dili kanunay nga makasabut, nasayud ko nga nakasabut ang Manluluwas. Ug padayon ako nga misalig Kaniya ug sa Iyang walay kinutuban nga Pag-ula.
Lindi Chibase, Gauteng, South Africa
Ang saad nga makita diha sa sulat sa inyong misyonaryo nga tawag [missionary call], gihimo alang kaninyo samtang mahimo kamong kabahin niini nga buhat, matuman: “Ang Ginoo mopanalangin kaninyo tungod sa matarung nga pagpakabuhi ug matinud-anon nga pagserbisyo.” Uban sa pagtagad ug pag-amuma, ang inyong mga samad mamaayo ug mamahimong himan alang kaninyo aron makahimo sa pagtabang sa uban nga moduol kang Kristo. Mao kana, sa katapusan, ang katungdanan sa mga misyonaryo.